اقمولا وبلىسىندا 38 جاڭا مەديتسينالىق نىسان اشىلادى
استانا. KAZINFORM - جىل سوڭىنا دەيىن اقمولا وبلىسىنىڭ اۋىلدارىندا 38 جاڭا مەديتسينالىق نىسان اشىلادى. بۇل - زاماناۋي دارىگەرلىك امبۋلاتوريالار، فەلدشەرلىك-اكۋشەرلىك پۋنكتتەر (ف ا پ) جانە مەديتسينالىق پۋنكتتەر. «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وسى ماقساتتارعا بيۋدجەتتەن 10 ميللياردقا جۋىق تەڭگە بولىنگەن. بارلىق نىسان قاجەتتى مەديتسينا ماماندارىمەن، دارىگەرلەرمەن جانە سانيتارلىق كولىكپەن قامتاماسىز ەتىلەدى. ناتيجەسىندە 43 مىڭنان استام اۋىل تۇرعىنى مەديتسينالىق قىزمەتكە قول جەتكىزە الادى.
العاشقىلاردىڭ ءبىرى بولىپ ەگىندىكول اۋدانىنىڭ باۋمانسكوە اۋىلىندا جاڭا فەلدشەرلىك- اكۋشەرلىك پۋنكت اشىلدى. ونىڭ قۇرىلىسىنا بيۋدجەتتەن 246 ميلليون تەڭگە بولىنگەن. فاپ كۇنىنە قىرىققا جۋىق ناۋقاستى قابىلداي الادى. نىساننىڭ سالتاناتتى اشىلۋ راسىمىنە اقمولا وبلىسىنىڭ اكىمىنىڭ ورىنباسىرى التىناي امىرەنوۆا قاتىستى. ول جاڭا مەديتسينالىق نىسانداردى سالۋ اۋىلدىق جەرلەردە ءومىر ساپاسىن جاقسارتۋعا ۇلكەن ۇلەس قوساتىنىن اتاپ ءوتتى.
«قازىر باسقا مەديتسينالىق نىسانداردىڭ قۇرىلىسى جالعاسۋدا. ولاردى جىلدىڭ سوڭىنا دەيىن كەزەڭ-كەزەڭىمەن اشامىز. بارلىق العاشقى مەديتسينالىق-سانيتارلىق پۋنكتەر وبلىستىڭ شالعاي اۋىلدىق ەلدى مەكەندەرىندە سالىنۋدا، بۇل اۋىل تۇرعىندارى ءۇشىن مەديتسينانى قولجەتىمدى ەتۋگە ايتارلىقتاي مۇمكىندىك بەرەدى. سونىمەن قاتار قازىرگى تاڭدا 20 دان استام دەنساۋلىق ساقتاۋ نىسانىنا كۇردەلى جوندەۋ جۇرگىزىلۋدە. وعان بيۋدجەتتەن شامامەن 3 ميلليارد تەڭگە بولىنگەن. بۇل مەديتسينالىق ينفراقۇرىلىمنىڭ توزۋىن ازايتىپ، مەديتسينالىق قىزمەتتەردىڭ ساپاسىن جاقسارتۋعا كومەكتەسەدى»، - دەدى ءوڭىرباسشىسىنىڭ ورىنباسارى.
باۋمانسكوە اۋىلىنىڭ تۇرعىندارى جاڭا پۋنكتتىڭ اشىلعانىنا ءدان ريزا. سەبەبى، بۇل مەديتسينالىق كومەككە قول جەتكىزۋدى ايتارلىقتاي جەڭىلدەتتى.
«اۋىلىمىزدا فەلدشەرلىك- اكۋشەرلىك پۋنكتتىڭ بولعانى جاقسى، ويتكەنى مەديتسينالىق كومەك كەز- كەلگەن ۋاقىتتا، كەز كەلگەن ادامعا قاجەت بولىپ قالۋى مۇمكىن. العاشقى مەديتسينالىق كومەك قولجەتىمدى بولۋى كەرەك. بۇل ءبىز ءۇشىن، اسىرەسە، بالالار مەن قارت ادامدار ءۇشىن وتە ماڭىزدى»، - دەپ ءبولىستى باۋمانسكوە اۋىلىنىڭ تۇرعىنى الماگۇل ەڭسەبايەۆا.
فەلدشەرلىك- اكۋشەرلىك پۋنكت باۋمانسكوە جانە قورجىنكول اۋىلدارىنىڭ 800 گە جۋىق تۇرعىنىنا قىزمەت كورسەتەدى. وندا ءارتۇرلى مەديتسينالىق كومەك كورسەتۋگە ارنالعان مامانداندىرىلعان كابينەتتەر جابدىقتالادى. مۇندا ءۇش مەديتسينا قىزمەتكەرى جۇمىس ىستەيدى. سونىمەن قاتار شۇعىل كومەك كورسەتۋ ءۇشىن اۋداندىق اۋرۋحانادان اۆتوكولىك بولىنەدى.