اقمارال ءالنازاروۆا م ءا م س جۇيەسىنەن تىس قالعان ادامدارعا قاتىستى پىكىر ءبىلدىردى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا م ءا م س جۇيەسىنەن تىس قالعان 3,3 ميلليون ادامنىڭ ماسەلەسىنە قاتىستى پىكىر ءبىلدىردى. ونىڭ اراسىندا 1 ميلليون ادام جەرگىلىكتى اتقارۋشى ورگاندار ەسەبىنەن م ءا م س- كە ەنگىزىلمەك.

اتاپ ايتقاندا، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

زاڭ جوباسىندا جەرگىلىكتى بيۋدجەت قاراجاتى ەسەبىنەن جۇمىسسىزدار مەن حالىقتىڭ وسال توبى ساناتىنداعى ادامدار ءۇشىن م ءا م س جارنالارىن تولەۋ ەسكەرىلگەن. وسى شارالاردىڭ ەسەبىنەن 2026 -جىلى م ءا م س جۇيەسىمەن قوسىمشا 1 ميلليوننان استام ادام قامتىلادى.

وسى ورايدا ءماجىلىستىڭ جالپى وتىرىسىنان كەيىن تىلشىلەر قالعان 2 ميلليوننان استام م ءا م س جۇيەسىمەن قالاي قامتىلاتىنىن سۇرادى.

- بۇل ادامداردى م ءا م س كە ماجبۇرلەپ كىرگىزۋ جۇيەسى قاراستىرىلماعان. باسقا مەملەكەتتەردە جەكە ادامداردىڭ مەديتسينالىق ساقتاندىرۋ جۇيەسىنە جارنانىڭ ۋاقىتىلى تولەنۋىن قارجى مينيسترلىكتەرى قاداعالايدى. قازاقستاندا بۇل ماسەلە ءالى دە زاڭناما اياسىندا شەشىمىن تاپپادى. سوندىقتان ەلىمىزدەگى ادامدار ونى ءوزى شەشەدى، ياعني جارنا تولەسە، ءتيىستى كومەكتى الادى. 20 ميلليون ادامنىڭ 12,1 ميلليونىنا مەملەكەت تولەپ جاتىر. تاعى 1 ميلليون ادامدى جەرگىلىكتى اتقارۋشى ورگانداردىڭ ەسەبىنەن م ءا م س جۇيەسىنە ەنگىزۋدى ۇسىنىپ وتىرمىز. جالپى، مۇگەدەكتىگى بار ادامداردىڭ ساناتىنا جاتپاسا، كوپبالالى انا نەمەسە ستۋدەنت بولماسا، رەسمي تۇردە جۇمىسسىز اتانباسا، وندا بۇل ادامدار وزدەرىنىڭ قاراجاتى ەسەبىنەن م ءا م س جۇيەسىنە قوسىلۋى كەرەك، - دەدى ا. ءالنازاروۆا پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ەسكە سالساق، قازىر شامامەن 16,7 ميلليون (82,3 پايىز) ادام ساقتاندىرىلعان بولسا، ونىڭ 12,1 ميلليونى (72,5 پايىز) جەڭىلدىكتى ساناتتارعا جاتادى، 3,3 ميلليون ادام م ءا م س جۇيەسىنەن تىس قالعان.

ونىڭ ىشىندە 2,4 ميلليون ادامنىڭ ءومىر ءسۇرۋ دەڭگەيى قاناعاتتانارلىق ازاماتتار بولسا، ال 1 ميلليونى الەۋمەتتىك ءال- اۋقاتتىڭ داعدارىستىق جانە شۇعىل دەڭگەيلەرىنە جاتاتىن وسال توپتاعى ازاماتتار، ياعني تابىسى تومەن ءارى وتباسىنىڭ بازالىق قاجەتتىلىكتەرىن ارەڭ جاباتىن ادامدار.

اۆتور

رۋسلان عابباسوۆ