اقشاعا قۇمار ەكەنىڭىزدى كورسەتەتىن 6 بەلگى

استانا. KAZINFORM - ءبىزدىڭ ومىرىمىزدە اقشانىڭ ماڭىزى زور. ونى مويىنداۋىمىز كەرەك. سوندىقتان قارجىلىق جاعدايىڭىز جايلى ويلاۋ قالىپتى نارسە.

الايدا اركەز بىردەڭە ساتىپ الىپ جاتقاندا نەمەسە تاپسىرىس بەرگەندە كارتاڭىزداعى سوما ازايىپ قالادى دەگەن وي مازالاپ، دەنەڭىزدەن سۋىق تەر بۇرق ەتسە، بۇل ءسىزدىڭ اقشاعا دەگەن قۇمارلىعىڭىزدى كورسەتۋى مۇمكىن.

Massaget.kz اقشاعا قۇمارلىقتىڭ 6 بەلگىسىن ۇسىنادى.

1. ۇنەمى اقشا جايلى ايتا بەرەسىز

كەي ادامدار كەز كەلگەن اڭگىمەنى اقشاعا الىپ كەلەدى. بۇل ادامنىڭ اقشاعا قۇمار ەكەنىن كورسەتۋى مۇمكىن. قارجى جايلى قانشالىقتى ءجيى ايتاتىنىڭىزدى ويلانىپ كورىڭىز. مىسالى، قۇربىلارىڭىزبەن سويلەسكەندە جالاقىڭىزدىڭ باسقالاردان ايىرماشىلىعىن ايتا بەرەسىز. نەمەسە بونۋستار مەن سكيدكالار جايلى ايتا بەرۋىڭىز مۇمكىن. ءار ادامنىڭ قارجىلىق ءبىلىمى بولۋى كەرەك. الايدا كەز كەلگەن اڭگىمەگە اقشانى ارالاستىرۋ ءسىزدىڭ وعان دەگەن دۇرىس ەمەس قارىم-قاتىناسىڭىزدى كورسەتۋى مۇمكىن.

2. اقشانى بارلىق پروبلەمادان قۇتقاراتىن نارسە رەتىندە قابىلدايسىز

قارجىلىق مولشىلىق شىنىمەن دە ءومىردى جەڭىلدەتەدى. وسى ايدا پاتەرگە تولەۋ ءۇشىن نەمەسە ساياحاتقا شىعۋ ءۇشىن اقشا جەتە ما دەپ ۋايىمداماعان جاقسى. الايدا اقشا بارلىق پروبلەمادان قۇتقارادى دەپ ويلاۋدىڭ قاجەتى جوق. كەيدە ادام ءوزىنىڭ قانداي دا ءبىر پسيحولوگيالىق پروبلەماسىن اقشانىڭ كومەگىمەن جابۋعا تىرىسادى. ادەمى كيىم ءوزىن-ءوزى باعالاۋىڭىزدى جاقسارتادى دەپ ويلاۋىڭىز مۇمكىن. نەمەسە كافەدەگى شوتتى تولەمەسەڭىز، جاقسى دوس بولمايمىن دەپ ويلايسىز. قارجىلىق تاۋەلدىلىكپەن كۇرەسۋ ءۇشىن ءوز-وزىڭىزبەن جۇمىس ىستەۋگە تىرىسىڭىز.

3. ءوز قارجىڭىزدى باسقالاردىكىمەن سالىستىراسىز

ءسىزدىڭ سالاڭىزدا جۇمىس ىستەيتىن ماماندار قانشا جالاقى الاتىنىن بىلگىڭىز كەلۋ قالىپتى نارسە. بۇل ءسىزدىڭ قانشالىقتى جاقسى جۇمىسقا تۇرعانىڭىزدى جانە قارجىلىق جاعدايىڭىزدى جاقسارتۋ ءۇشىن نە ىستەۋ كەرەگىن تۇسىنۋگە كومەكتەسەدى. الايدا كىرىسىڭىزدى ۇنەمى باسقالاردىكىمەن سالىستىرا بەرۋ جانە سونىڭ سالدارىنان مازاسىزدانۋ پروبلەمانى بىلدىرەدى.

باسقالاردىڭ تابىسىنا ەمەس، جەكە ءوزىڭىزدىڭ پروگرەسكە ءمان بەرىڭىز. سوڭعى بىرنەشە جىلدا قارجىلىق جاعدايىڭىز قالاي وزگەرگەنىنە اناليز جاساڭىز. ەگەر ەشقانداي وزگەرىس بايقاماساڭىز، ول نەمەن بايلانىستى ەكەنىن ويلانىڭىز. كاسىبي داعدىڭىزدى جاقسارتاتىن ەشتەڭە ىستەمەدىڭىز نەمەسە ەڭبەگىڭىزدى باعالامايتىن جۇمىستا وتىرىپ قالدىڭىز.

4. اقشا تابامىن دەپ دەنساۋلىعىڭىزدى قۇرتاسىز

كوپشىلىك ادام قاناعاتسىز بولىپ كەلەدى. بۇل اسىرەسە ءومىردىڭ قارجىلىق سالاسىنا قاتىستى. كەي ادامدار اقشانىڭ ارتىنان «جۇگىرەمىن» دەپ ءوزىنىڭ فيزيكالىق جانە ەموتسيونالدىق دەنساۋلىعىن قۇربان ەتەدى. ناتيجەسىندە، كىرىس دەڭگەيى ارتادى، ءبىراق ودان ءلاززات الۋعا كۇش تە، ۋاقىت تا قالمايدى.

ادامعا دەمالىس كەرەك ەكەنىن ۇمىتپاڭىز. ەگەر ۇنەمى اقشا ءۇشىن ۇيقىڭىزدى، دەنساۋلىعىڭىزدى، قارىم-قاتىناسىڭىزدى قيساڭىز، بۇل جايلى جاقسىلاپ ويلانۋ كەرەك.

5. جاقىندارىڭىزعا ساراڭ ادامسىز

ارينە، اقشانى قالاي بولسا سولاي شاشۋعا بولمايدى. الايدا جاقىندارىڭىزعا ساراڭ بولۋ دا ادامگەرشىلىك قاسيەتكە جاتپايدى. اراسىندا جاقىندارىڭىزعا سەبەپسىز سىيلىق بەرىپ قۋانتۋدى، مۇقتاج ادامدارعا قايىرىمدىلىق جاساۋدى ۇمىتپاڭىز. اقشا ءوزارا قۇرمەت پەن شىنايى دوستىقتىڭ ورنىن جابا المايدى.

6. ناقتى ماقساتسىز اقشا جيناي بەرەسىز

ماقساتسىز اقشا جيناي بەرۋ ادەتى دە اقشاعا قۇمارلىقتىڭ بەلگىسى بولۋى مۇمكىن. ياعني، ءسىز اقشانى ءومىرىڭىزدى جاقسارتۋ نەمەسە پروبلەمالاردى شەشۋ ءۇشىن قولدانبايسىز، سىزگە جاي عانا ونىڭ بولۋى ماڭىزدى. سول ءۇشىن دە ءار نارسەدەن ۇنەمدەيسىز، ءبىراق اقشانى نە نارسەگە جيناپ جاتقانىڭىزدى بىلمەيسىز جانە ونى جۇمساعىڭىز كەلمەيدى.