بۇل تۋرالى بۇگىن قۇرىلتايدىڭ جالپى وتىرىسىندا پرەمەر-مينيستر ولجاس بەكتەنوۆ ايتتى.
— بيۋدجەتتىڭ شىعىس بولىگىنە توقتالساق، مەملەكەتتىك شىعىستاردى وڭتايلاندىرۋ جۇمىستارى جالعاسىپ كەلەدى. وزدەرىڭىزگە بەلگىلى، مەملەكەت باسشىسىنىڭ تاپسىرماسى اياسىندا مەملەكەتتىك ورگاندارعا ارنالعان اكىمشىلىك عيماراتتاردى سالۋعا موراتوري جاريالاندى. بۇل باعىتتا ايتارلىقتاي قوماقتى قارجىنى قىسقارتۋعا مۇمكىن بولدى. سونىمەن قاتار، باسقا دا اۋقىمدى شارالار دا قولعا الىندى. ماسەلەن، بيۋدجەتكە تۇزەتۋلەر ەنگىزۋ ارقىلى 2026 -جىلعا جوسپارلانعان شىعىستاردى 360 ميلليارد تەڭگەگە قىسقارتىپ، بوساعان قاراجاتتى باسىمدىعى جوعارى باسقا ماقساتتارعا قايتا باعىتتادىق. الداعى كەزەڭگە ارنالعان بيۋدجەتتى ازىرلەۋ بارىسىندا جالپى سوماسى 36,9 تريلليون تەڭگە بولاتىن قارجىلاندىرۋعا وتىنىمدەر تۇسكەنىمەن، 2027 -جىلعا بەكىتىلگەن شىعىس كولەمى 30,2 تريلليون تەڭگە بولدى. بۇل رەتتە بيۋدجەتتى قاراۋ كەزىندە شىعىس بولىگىن 6,7 تريلليون تەڭگەگە قىسقارتتىق، — دەدى ولجاس بەكتەنوۆ.
ونىڭ ايتۋىنشا، بيۋدجەت شىعىستارىن قىسقارتۋ باعىتىندا الەۋمەتتىك سالاداعى شىعىندار نازارعا الىنعان.
— قازىرگى ۋاقىتتا ءبىز الەۋمەتتىك سالاداعى قامتاماسىز ەتۋ باعىتىندا ءىرى رەفورمانى جۇزەگە اسىرىپ جاتىرمىز. بۇل رەتتە، ادامنىڭ ساناتىنا نەگىزدەلگەن جۇيەدەن قاجەتتىلىككە ارنالعان جۇيەگە كوشەمىز. بۇل قاعيدا كەلەسى جىلدىڭ 1 -قاڭتارىنان باستاپ تولىقتاي جۇمىس ىستەيدى جانە قازىرگى ۋاقىتتا وسىنى كەڭىنەن ءتۇسىندىرىپ جاتىرمىز. ماسەلەن، بۇگىندە اۋقاتتى نەمەسە تابىسى از كوپبالالى وتباسىلار مەملەكەتتەن بىردەي قولداۋ شارالارىن الىپ كەلەدى. بىزدىڭشە، مۇنداي قاعيدا ادىلەتسىز. وزدەرىن قامتاماسىز ەتە الاتىن اۋقاتتى، داۋلەتتى ادامدار مەملەكەتتىك كومەك الماۋى ءتيىس، ولار ءوز رەسۋرستارىنا سۇيەنۋى كەرەك، — دەدى ۇكىمەت باسشىسى.
وسى ورايدا ول مەملەكەت قازىرگى جاعدايىنا بايلانىستى ءوز-ءوزىن قامتاماسىز ەتە المايتىن جاندارعا عانا قولداۋ كورسەتۋى ءتيىس ەكەنىن ايتتى. دەگەنمەن، مەملەكەتتىك كومەكتى الاتىن ادام وسىنى كۇنكورىس كوزى رەتىندە قابىلداماۋى كەرەك. كەرىسىنشە، بۇل كومەك اتالعان وتباسىلارعا مۇقتاج جاندار ساناتىنان شىعۋعا سەپتىگىن تيگىزەتىن دەمەۋشى قۇرال رەتىندە قاراستىرىلادى.
ۇكىمەت باسشىسىنىڭ سوزىنە قاراعاندا، جاڭا جۇيە قوماقتى بيۋدجەت قاراجاتىن ۇنەمدەپ، ولاردى ماڭىزدىراق ماقساتتارعا باعىتتاۋعا مۇمكىندىك بەرەدى. تەك 2027 -جىلدىڭ وزىندە بۇل سوما 700 ميلليارد تەڭگە، ال ءۇش جىلدىق كەزەڭدە 2,5 تريلليون تەڭگەگە جۋىق بولادى.
بۇعان دەيىن كەلەر جىلى قازاقستان ەكونوميكاسى قانشالىقتى ءوسۋى مۇمكىن ەكەنىن جازعان ەدىك.