اقان سەرى قورامسا ۇلى ولەڭدەرى
اقان سەرى قورامسا ۇلىنىڭ «ادامنىڭ بىلىمىنە اقىل سەرىك»، «ءبىزدىڭ كوڭىل قايدا جاتىر»، «قىز سيپاتى»، «جىگىت سيپاتى»، «كوڭىل سىرى» سەكىلدى تۋىندىلارى بەرىلدى
ادامنىڭ بىلىمىنە اقىل سەرىك
ادامنىڭ بىلىمىنە اقىل سەرىك،
اقىل كەن تاۋسىلمايتىن جانعا كورىك.
ميدان شىققان سوزىڭە ءتىل سەبەپكەر،
قالاي ايتىپ سويلەسەڭ وزىڭدە ەرىك.
دەگەنگە اياق باسشى، وي جەتەكشى،
راقات تاپپاق ادامزات كوزبەن كورىپ.
جاقسى مەنەن جاماندى سەزبەك ءۇشىن
بىزدەرگە قويعان جوق پا مۇرىن بەرىپ.
جامان، جاقسى ءار ءسوزدى ەستىگەن سوڭ
ءبارى - داعى تۇرادى قۇلاققا ەنىپ.
تىرلىكتە تىربانىپ قال سايران ەتىپ،
اجال كەلمەي تۇرعاندا شاۋىپ جەتىپ.
قۇرمەتسىز زايىبىڭمەن ءومىر سۇرسەڭ،
قوتىر بۇزاۋ سەكىلدى قالدىڭ ءولىپ.
تۇرمىستا ءتىرى كۇندە بول سەبەپكەر،
وتىرما قۇر ۇيىڭدە بويعا سەنىپ.
تالاپ قىل، ازدى - كوپتى جۇمساي ويدى،
ار ءىستىڭ اقىرىن ويلا، كوڭىل ءبولىپ.
ءبىزدىڭ كوڭىل قايدا جاتىر
وي، قالقا، ءبىزدىڭ كوڭىل قايدا جاتىر،
تولقىعان ون تورتىندە ايدا جاتىر.
ات تۇرسا، اتان تۇرسا كوز سالمايتىن،
ارعىماق مىڭ تەڭگەلىك تايدا جاتىر.
قوش ءيىسى جارقىراتىپ كوڭىل اشقان،
اققۇيرىق پاميلنىي شايدا جاتىر.
گۇل شاشاق، جۇپارء يىستى جايلاۋىندا
كوڭىلىم ەل قونباعان سايدا جاتىر.
قيادان تورعا تۇسكەن اقسۇڭقارداي
كوڭىلىم قاپالانعان جاردا جاتىر.
بىلەتىن اسىل جايىن جان بولماسا،
جاماندى نە قىلايىن جولدا جاتار.
تاپسىردىم تەرىس بولساڭ ءبىر تاڭىرگە،
ايتاتىن زارلى سەزىم تولىپ جاتىر...
سىمباتىڭ جاس جۇرەكتى جاندىرعانداي،
بريلليانت گاۋگار ءجۇزىڭ سوندا جاتىر.
اۋزىڭنان شىققان ءسوزىڭ ءتاتتى بالداي،
ويلاسام ءاربىر قارپى مەندە جاتىر.
باعاڭا اسىل، قالقام، نە جەتەدى،
بەس ءجۇز مىڭ التىن قورى سەندە جاتىر.
قارپىڭدى اق قاعازعا تارتىپ كورسەم،
جۇرەكتىڭ اسىل ءسوزى سوندا جاتىر.
قىز سيپاتى
ءبىرىنشى ءبىر قىز كەلەر اقشا ماڭداي،
جاماعات - ۇلكەن - كىشى ماقتاعانداي.
انادان تۋعاننان - اق بولىپ دانا،
الىنشە جاقسىلاردى جاقتاعانداي.
قۇربىسىن جاۋعا بەرمەس ول شاعىباز،
جولداسىن سارى التىنداي ساقتاعانداي.
جۇرەدى تەڭىن تاۋىپ ويناپ - كۇلىپ،
سىنى جوق جۇمىسىنىڭ اقساعانداي.
ەكىنشى ءبىر قىز كەلەر ءتىلى جورعا،
ۇقساعان جۇماقتاعى بەينە حورعا.
اجارى، اقشا بەتى ساعىمدانىپ،
جاراسار قۇلاعىنا التىن سىرعا.
ءۇشىنشى ءبىر قىز كەلەر قارا شاشتى،
كۇلىم كوز، ويماق اۋىز، قيعاش قاستى.
شومىلعان ايدىن كولدىڭ اققۋىنداي،
وتىرار اعاجان دەپ كارى - جاستى.
ءتورتىنشى ءبىر قىز كەلەر قارا تورى،
بۇلعاقتار شەكەسىنە تاققان شوعى.
ءوز ءىسىن ءوزى بىلمەي جۇرتقا كۇلەر،
ءبىلىنىپ جۇرسە - داعى نازىك جولى.
بەسىنشى ءبىر قىز كەلەر سۇرشا جايداق،
وتىرار تاۋەكەلگە بەلىن بايلاپ،
كوڭىلى جاس - كارىنى بىردەي كورىپ،
ءناپسىنى سەمىرتەدى مايداي شايناپ.
التىنشى ءبىر قىز كەلەر تولىق سارى،
بوينىنا تەڭ كەلمەيدى جاننىڭ ءبارى.
لايىقتى وزىنە تەڭ تاپپاعان سوڭ،
كەتپەيدى كوكىرەكتەن قايعى - زارى.
جەتىنشى ءبىر قىز كەلەر الىم - سالىم،
بولعاندا موينى قىسقا، شاشى قالىڭ.
ءار قاشان وسىندايعا كەز كەلەدى.
قاشاننان ارىلماعان سورى قالىڭ.
جىگىت سيپاتى
جىگىت بوپ گاۋعار تاستاي اسىل بولسا،
السىزگە جانى كىلەڭ اشىر بولسا.
ءارقاشان جىگىت سونداي ءتاۋىر بولماس،
نە پايدا شۇبەرەكتەي جاسىل بولسا.
كوزى دە، كوڭىل دە سوقىر قاراڭعىنىڭ،
نەسى ادام تۇك بىلمەيتىن ماسىل بولسا.
ناركەسكەن قايرىلمايتىن قىلىش بولسا،
مىنەز، اقىل، ونەرى دۇرىس بولسا.
ءبىر سىرلى، سەگىز قىرلى بولسا جىگىت
جورعاداي ءتىلى مايدا ءجۇرىس بولسا.
اقىلدى، سابىرلى ەر دەپ سونى ايتامىز،
ەتكەنى بەرەكەلى جۇمىس بولسا.
بۇل ايتقان اقىلىمدا جالعان بار ما؟
كورىڭدەر ميعا سالىپ بۇرىس بولسا.
بوزبالا شامشىراقتاي فانار بولسا،
ىشىندە قالىڭ توپتىڭ جانار بولسا.
اقيقات ادامدىقتىڭ بەلگىسى سول،
سۋ بەرسەڭ، بالداي كورىپ قانار بولسا.
اقىلسىز كەيبىرەۋدىڭ مىنەزى سول،
ءبىر ءسوزدى ەكى قىلىپ جامار بولسا.
بۇل ساعان ايتقان، دوسىم، وسيەتىم،
جۇرە بەر تىڭداماي - اق زالال بولسا.
كوڭىل سىرى
كوزىڭنىڭ قۇمارتامىن قاراسىنا،
عاشىقتىق قۇلاعىڭ ال نالاسىنا.
بايگە العان توپتان اسىپ قۇلاگەردەي،
ءۇش جۇزدىڭ ءماشعۇر بولدىڭ بالاسىنا.
مەن بولىپ قىران بۇركىت ىلەر ەدىم،
تۇلكى بوپ شىقساڭ تاۋدىڭ بالاسىنا.
ءوزىڭنىڭ مارتەبەڭە حات جازامىن،
قالدىرما دۇشپانىمنىڭ تاباسىنا.
ەجەلدەن قىز - بوزبالا بولعانناڭ سوڭ
بىرەۋدىڭ بىرەۋ قالار جالاسىنا.
اداسقان جالعىز قازداي ءۇنىڭ شىقپاس،
ىلىنسەڭ جايعان توردىڭ شاراسىنا.
شەن العان اق پاتشادان كنيازدايىن،
ءبىلىندىڭ توعىز دۋان قالاسىندا.
كوڭىلىم سەنى كورسەم بولادى شات،
قونعانداي بايتەرەكتىڭ پاناسىنا.
پەريزات كوركىڭ ارتىق تامام جاننان،
سويلەسەڭ ءسوزىڭ ءتاتتى شەكەر - بالدان.
سۇمبىل شاش، ويماق اۋىز، مەرۋەرت ءتىسىڭ،
قۇربىڭدا سەنى قۇشقان قالماس ارمان.
اسىل زات، القىزىل گۇل سەن بولماساڭ،
جامانعا كىسى ەمەسپىن قولقا سالعان.
ايتاتىن ءبىر - ەكى اۋىز بار ەدى نازىم،
ايتايىن سول نازىمدى كوڭىلىمە العان.
قىز - جىگىت تەڭىن تاۋىپ ويناپ - كۇلمەك،
بۇل ميراس بۇرىنعىدان بىزگە قالعان.
ءبىر كۇنى قاپا بولىپ وكىنەرسىڭ،
باسىڭدا تۇرا بەرمەس دۇنيە جالعان.
پەريزات، ءبىر سەن ءۇشىن قاپالاندىم،
ساعىنىپ سيپاتىڭدى حاتقا سالدىم.
ويلاسام ءسىز تاراپتان جاۋابىڭدى،
باسا الماي اياعىمدى ەستەن تاندىم.
ەتپەسەڭ ءوزىڭ ءبىلىپ ءبىر داۋاسىن،
تاڭىم دەرت، كوڭىلىم قاپا، وت بوپ جاندىم.
ەي قالقا، سەنىڭ ءۇشىن جايدىم توردى،
تانيتىن كەزىڭ بولدى وڭ مەن سولدى.
سۇمبىل شاش، قاراقات كوز، جازىق ماڭداي،
كورەتىن كۇن بولاما بەينە حوردى.
جۇزىڭدى كوپتەن بەرى كورمەگەن سوڭ،
جۇرەككە بىتپەيتىندەي قايعى تولدى.
تاس ەسىك تامنان ءۇيدى مەكەن ەتىپ،
ءجۇزىڭدى كورە المايتىن زامان بولدى.