انتونيۋ گۋتەرريش بارشا ەلدى ب ۇ ۇ-نى قولداۋعا شاقىرادى

استانا. KAZINFORM - بۇگىن - حالىقارالىق بەيبىتشىلىك پەن قاۋىپسىزدىكتى ساقتاۋعا، حالىقتار اراسىنداعى دوستىق قاتىناستاردى دامىتۋعا، حالىقارالىق ىنتىماقتاستىققا قول جەتكىزۋگە جانە مەملەكەتتەردىڭ ءىس-ارەكەتتەرىن ۇيلەستىرۋ ورتالىعى بولۋعا باعىتتالعان بىرىككەن ۇلتتار ۇيىمى كۇنى. وسى ورايدا، Kazinform ب ۇ ۇ باس حاتشىسى انتونيۋ گۋتەرريشتىڭ جولداۋىن ۇسىنادى.

«بىرىككەن ۇلتتار ۇيىمىن بۇكىل الەم قۇردى جانە ول بۇكىل الەم ءۇشىن قۇرىلدى. 1945 -جىلدان بەرى ول - ەلدەردىڭ جاھاندىق ماسەلەلەردىڭ شەشىمىن تابۋ ءۇشىن بىرىگەتىن ورنى. بۇل - شيەلەنىستى باسۋعا، كوپىر ورناتىپ، بەيبىتشىلىكتى نىعايتۋعا سەپتىگىن تيگىزەتىن شەشىمدەر. بۇل - كەدەيلىكتى جويۋ، تۇراقتى دامۋعا ىنتالاندىرۋ جانە حالىقتىڭ ەڭ وسال توپتارىن قورعاۋ شەشىمدەرى. بۇل - قاقتىعىس، زورلىق-زومبىلىق، ەكونوميكالىق قيىندىقتار جانە كليماتتىق اپاتتار جاعدايىندا ءومىر ءسۇرىپ جاتقان ادامدارعا ءومىر ءۇشىن قاجەتتى كومەك كورسەتۋ شەشىمدەرى. بۇل - ايەلدەر مەن قىزدار ءۇشىن ادىلدىك پەن تەڭدىك تارازىسىن تەڭەستىرەتىن شەشىمدەر. بۇل - 1945 -جىلى ەلەستەتۋ مۇمكىن ەمەس ماسەلەلەردى قامتيتىن شەشىمدەر - كليماتتىڭ وزگەرۋى، سيفرلىق تەحنولوگيالار، جاساندى ينتەللەكت جانە عارىش كەڭىستىگى.

قىركۇيەك ايىندا باس اسسامبلەيا «بولاشاق ءۇشىن» پاكتىنى، جاھاندىق سيفرلىق شارتتى جانە بولاشاق ۇرپاق تۋرالى دەكلاراتسيانى قابىلدادى. بۇل ماڭىزدى كەلىسىمدەر جيناعى بىرىككەن ۇلتتار ۇيىمى جۇيەسىنىڭ اينالامىزداعى وزگەرىستەر مەن سىن-قاتەرلەرگە ساي بولىپ، بارلىعى ءۇشىن شەشىمدەر شىعاراتىنداي بەيىمدەلۋىن، رەفورمالانۋىن جانە جاسارۋىن قامتاماسىز ەتۋگە كومەكتەسەدى.

ءبىراق ءبىزدىڭ جۇمىسىمىز ءارقاشان بىرىككەن ۇلتتار ۇيىمىنىڭ جارعىسىندا جانە حالىقارالىق قۇقىق نورمالارىندا بەكىتىلگەن قۇندىلىقتار مەن قاعيداتتارعا جانە ءاربىر ادامنىڭ ءقادىر- قاسيەتى مەن قۇقىقتارىن قۇرمەتتەۋگە نەگىزدەلەدى.

قازىرگى قيىن زاماندا جالعىز ءۇمىت ازدىق ەتەدى. ءۇمىت بەيبىتشىلىك، ورتاق ءال-اۋقات پەن عالامشاردىڭ گۇلدەنۋىن قامتاماسىز ەتۋ ءۇشىن شەشۋشى ارەكەت پەن كوپجاقتى شەشىمدەردى تالاپ ەتەدى. ءۇمىت بارلىق ەلدىڭ جۇمىلا ارەكەت ەتۋىن تالاپ ەتەدى. ءۇمىت بىرىككەن ۇلتتار ۇيىمىن تالاپ ەتەدى.

بىرىككەن ۇلتتار ۇيىمى كۇنى مەن بارلىق ەلدى بۇكىل الەم مەن ول بەينەلەيتىن يدەالدار ءۇشىن باعدار بولىپ وتىرعان وسى شامشىراقتى جارقىراتىپ ۇستاۋعا شاقىرامىن»، - دەلىنگەن جولداۋدا.

ايتا كەتسەك، «بىرىككەن ۇلتتار» اتاۋىن ا ق ش پرەزيدەنتى فرانكلين دەلانو رۋزۆەلت ۇسىندى. دەكلاراتسياسى سان-فرانسيسكودا 1945 -جىلى 24-قازاندا قابىلداندى. سول كۇن ب ۇ ۇ كۇنى دەپ جاريالاندى. الەمدەگى ەڭ ءىرى، حالىقارالىق دەڭگەيدە ۇسىنىلعان جانە ەڭ قۋاتتى ۇكىمەتارالىق ۇيىمنىڭ باس كەڭسەسى نيۋ-يوركتە ورنالاسقان.

ەسكە سالايىق، نيۋ-يوركتەگى ب ۇ ۇ باس اسسامبلەياسى 79-شى سەسسياسىنىڭ جوعارى دەڭگەيدەگى اپتالىعى اياسىندا قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ بىرىككەن ۇلتتار ۇيىمىنىڭ باس حاتشىسى انتونيۋ گۋتەرريشپەن كەزدەسىپ، ق ر مەن ب ۇ ۇ ىنتىماقتاستىعىنىڭ كەلەشەگىن تالقىلاعان بولاتىن.

اۆتور
گۇلنۇر عازيز قىزى