انكارادا تۇركى مەملەكەتتەرى ۇيىمىنىڭ پانەلدىك وتىرىسى ءوتتى

استانا. KAZINFORM - تۇركيا استاناسى انكارادا «تۇركى ىنتىماقتاستىعىنىڭ قازىرگى جاعدايى مەن بولاشاعى» تاقىرىبىندا پانەلدىك سەسسيا ءوتتى. وعان تۇرىك مەملەكەتتەرى ۇيىمىنا (ت م ۇ) مۇشە باۋىرلاس ەلدەردىڭ وكىلدەرى قاتىستى.

شارا ناحچىۆان شارتىنىڭ 15 جىلدىعىنا جانە «3-قازان - تۇركى مەملەكەتتەرىنىڭ ىنتىماقتاستىعى كۇنىن» مەرەكەلەۋگە وراي ۇيىمداستىرىلدى.

شاراعا قازاقستان، قىرعىزستان، تۇركيا، ازەربايجان، وزبەكستان جانە باسقا دا مەملەكەتتەردىڭ جوعارى لاۋازىمدى تۇلعالارى جينالىپ، تۇركى ەلدەرى اراسىنداعى جەتىستىكتەر، قيىندىقتار مەن بولاشاقتاعى ىنتىماقتاستىق باعىتتارىن تالقىلادى.

سەسسيانى ۇيىمنىڭ باس حاتشىسى كۋبانىچبەك ومۋراليەۆ اشتى. ول تۇركى الەمىنىڭ گۇلدەنۋى مەن بىرلىگى ءۇشىن تۇركى حالىقتارى اراسىنداعى ساياسي، ەكونوميكالىق جانە مادەني بايلانىستى نىعايتۋدىڭ ماڭىزدىلىعىنا توقتالدى.

«سوڭعى 15 جىلدا ت م ۇ تۇركى الەمىندەگى كولىك پەن كوممۋنيكاتسيانىڭ دامۋىنا زور ۇلەس قوستى. ترانسكاسپي حالىقارالىق كولىك باعدارى سياقتى باستامالار ايماقتىق ساۋدادا توڭكەرىس جاساپ، ونى تيىمدىرەك جانە تۇراقتى ەتىپ وزگەرتتى. «باكۋ- تبيليسي- كارس» تەمىر جولى سياقتى ماڭىزدى جوبالار - ازيانى ەۋروپامەن بايلانىستىراتىن، ەكونوميكالىق ينتەگراتسياعا جاردەمدەسۋ جانە جاھاندىق قاتىسۋىمىزدى كەڭەيتۋ جولىنداعى بىرلەسكەن كۇش- جىگەرىمىزدىڭ جارقىن مىسالى»، - دەپ اتاپ ءوتتى ت م ۇ باس حاتشىسى.

ونىڭ سوزىنەن كەيىن تۇركى ينۆەستيتسيالىق قورىنىڭ پرەزيدەنتى باعداد امىرەيەۆ، تۇرىك اكادەمياسىنىڭ پرەزيدەنتى شاحين مۇستافايەۆ، تۇركى حالىقتارىنىڭ مادەنيەتى مەن مۇراسى قورىنىڭ پرەزيدەنتى اقتوتا رايىمقۇلوۆا، تۇركپا باس حاتشىسى مەحمەت سۋرەيا ەر جانە ت. ب. قاتىسۋىمەن پانەلدىك پىكىرتالاس ءوتتى.

وندا تۇركى ىنتىماقتاستىعىنىڭ ءتۇرلى اسپەكتىلەرى، سونىڭ ىشىندە ەكونوميكالىق دامۋ، مادەني مۇرانى ساقتاۋ، ءبىلىم بەرۋ جانە ايماقتىق ماسەلەلەردى شەشۋ ماسەلەلەرى تالقىلاندى. سونداي-اق جاھاندىق ۇردىستەر مەن سەرپىندى گەوساياسي جاعداي جاعدايىندا ىنتىماقتاستىقتى تەرەڭدەتۋ جولدارى قاراستىرىلدى.

ينتەراكتيۆتى سۇراق-جاۋاپ سەسسياسى تىڭداۋشىلارعا پانەلدىك پىكىرتالاسقا قاتىسۋشىلارمەن تىكەلەي بايلانىس ورناتۋعا جانە جاھاندىق كۇن تارتىبىندەگى وزەكتى ماسەلەلەردى قويۋعا مۇمكىندىك بەردى.

4-قازاندا ت م ۇ سىرتقى ىستەر مينيسترلەرىنىڭ ورىنباسارلارى دەڭگەيىندەگى كوپجاقتى ساياسي كونسۋلتاتسيالاردىڭ 2- وتىرىسى وتەدى.

كەزدەسۋ بارىسىندا 2024 -جىلعى 6-قاراشادا بىشكەكتە وتەتىن ت م ۇ 11- سامميتىنە دايىندىق بارىسى تۋرالى پىكىر الماسۋ وتەدى.