انكارادا تەراكت ۇيىمداستىرعان 2 ادامنىڭ كوزى جويىلدى

انكارا. KAZINFORM - بۇعان دەيىن تۇركيانىڭ انكارا قالاسىندا اسكەري ۇشاقتار مەن عارىش تەحنيكاسىن شىعاراتىن «TUSAŞ» كورپوراتسياسى عيماراتىنىڭ ماڭىندا تەراكت بولعانىن حابارلاعان ەدىك.

بۇل لاڭكەستىك ارەكەتتى ۇيىمداستىردى دەگەن ەكى كۇدىكتى مەرت بولدى، تاعى ءبىر ادام بوستاندىقتا جۇرگەنى ايتىلادى. بۇل تۋرالى تۇركيانىڭ Sabah اگەنتتىگى حابارلادى.

باسىلىمنىڭ حابارلاۋىنشا، جەرگىلىكتى ۋاقىتپەن ساعات 15:20 شاماسىندا انكارانىڭ كاحرامانكازان اۋدانىنداعى «TUSAŞ» كورپوراتسياسى عيماراتىنىڭ جانىندا بومبا جارىلدى. جارىلىستار مەن وق داۋسىن ەستىگەن قاۋىپسىزدىك كۇشتەرى، ءورت سوندىرۋشىلەر مەن جەدەل جاردەم بريگادالارى وقيعا ورنىنا دەرەۋ جەتكەن.

تۇركيا ىشكى ىستەر ءمينيسترى الي ەرليكايا ەكى لاڭكەستىڭ (ايەل ادام جانە ەر ادام) كوزى جويىلعانىن راستاپ، ولاردىڭ اتى-ءجونى انىقتالىپ جاتقانىن حابارلادى. ول سونداي-اق، سوڭعى لاڭكەس جويىلعانعا دەيىن كۇرەستىڭ جالعاساتىنىن ايتىپ، رەسمي اقپارات كوزدەرىنىڭ مالىمدەمەلەرىنە قۇلاق ءتۇرۋدى سۇرادى.

- ءبىز لاڭكەستەردى انىقتاۋدى جالعاستىرۋدامىز، ولاردىڭ كىم ەكەنىن انىقتاعاننان كەيىن ولاردىڭ قاي لاڭكەستىك ۇيىمعا جاتاتىنىن حابارلايمىز، - دەدى مينيستر.

ەل پرەزيدەنتى رەجەپ تايىپ ەردوعان بريكس سامميتى اياسىندا رەسەي پرەزيدەنتى ۆلاديمير پۋتينمەن كەزدەسۋىندە 4 ادامنىڭ قازا تاۋىپ، 14 ادامنىڭ جارالانعانىن حابارلادى.

- وسى جانتۇرشىگەرلىك لاڭكەستىك ارەكەتتى ايىپتايمىن، شەيىتتەرىمىزگە اللادان راقىم تىلەيمىن، - دەدى.

ەلدىڭ ادىلەت ءمينيسترى يىلماز تۋنچتىڭ ايتۋىنشا، انكارا باس پروكۋراتۋراسى لاڭكەستىك ارەكەتكە قاتىستى تەرگەۋدى باستاپ، وقيعانى تەرگەۋگە باس پروكۋروردىڭ 1-ورىنباسارى مەن 8 پروكۋرور تاعايىندالعان.