انكارادا قارا تەڭىز قاۋىپسىزدىگى ماسەلەسى تالقىلانادى

استانا. KAZINFORM - تۇركيا استاناسى انكارادا ەكى كۇن بويى قارا تەڭىزدەگى قاۋىپسىزدىكتى قامتاماسىز ەتۋ اياسىندا كەلىسسوزدەر وتەدى، دەپ حابارلايدى Kazinform ءتىلشىسى.

تۇركيانىڭ ۇلتتىق قورعانىس مينيسترلىگى 15-16-ءساۋىر ارالىعىندا انكارا اسكەري- تەڭىز كۇشتەرىنىڭ شتابىندا ماڭىزدى كەزدەسۋ وتكىزىلەتىنىن جاريالادى.

تالقىلاۋدىڭ نەگىزگى تاقىرىبى - رەسەي مەن ۋكراينا اراسىنداعى بىتىمگە قول جەتكىزىلگەن جاعدايدا قارا تەڭىزدەگى قاۋىپسىزدىكتى قامتاماسىز ەتۋ بولادى.

ۇلتتىق قورعانىس مينيسترلىگى مالىمدەمەسىنە سايكەس، ءىس-شاراعا شەت مەملەكەتتەردىڭ اسكەري وكىلدەرى، سونىڭ ىشىندە رەسەيدىڭ اسكەري قىزمەتشىلەرى دە قاتىسادى. كەزدەسۋگە قاتىسۋشىلار قارا تەڭىز ايماعىندا بەيبىتشىلىك پەن تۇراقتىلىقتى ساقتاۋعا ىقپال ەتەتىن تەڭىز سالاسىنداعى اسكەري جوسپارلاۋعا نازار اۋدارادى.

سونىمەن قاتار جاڭا شيەلەنىستەردىڭ الدىن الۋعا جانە جاعالاۋداعى ەلدەر اراسىنداعى ىنتىماقتاستىقتىڭ تۇراقتى جۇيەسىن قۇرۋعا باعىتتالعان قادامداردى تالقىلاۋعا ەرەكشە نازار اۋدارىلادى.

كەزدەسۋ ناتيجەلەرى وڭىرلىك قاۋىپسىزدىكتى نىعايتۋعا جانە حالىقارالىق اسكەري ءوزارا ءىس- قيمىل تەتىكتەرىن كەڭەيتۋگە بەلگىلى ءبىر ۇلەس قوسادى دەپ كۇتىلۋدە.

ەكى كۇن بۇرىن تۇركيانىڭ كەيبىر باسىلىمى رەسەي مەن ۋكراينا وكىلدەرىن انكاراعا قارا تەڭىزدەگى كەمە قاتىناسى قاۋىپسىزدىگى ماسەلەلەرىن تالقىلاۋعا شاقىرعانى تۋرالى اقپارات تاراتقانى بەلگىلى بولدى. الايدا كرەملدىڭ باسپاءسوز حاتشىسى دميتري پەسكوۆ كەزدەسۋگە قاتىستى اقپاراتتى راستامادى.