Anadolu Ajansi - پرەزيدەنت تەلەراديوكەشەنىنىڭ جاڭا مەديا-سەرىكتەسى

استانا. KAZINFORM - انكارادا قازاقستان رەسپۋبليكاسى پرەزيدەنتىنىڭ تەلەراديوكەشەنى مەن Anadolu Ajansi تۇرىك مەملەكەتتىك اقپارات اگەنتتىگى جاڭالىق الماسۋ جانە مەديا سەرىكتەستىك سالاسىندا ىنتىماقتاستىق تۋرالى كەلىسىمگە قول قويدى.

قۇجاتقا قول قويۋ سالتاناتى قازاقستان پرەزيدەنتى قاسىم-جومارت توقايەۆ پەن تۇرىك رەسپۋبليكاسى پرەزيدەنتى رەجەپ تايىپ ەردوعاننىڭ تۇركياعا رەسمي ساپارى اياسىندا ءوتتى. كەلىسىمگە پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا مەن Anadolu Ajansi باسشىسى سەردار كاراگەز قول قويدى.

كەلىسىم قازاقستان مەن تۇركيا اراسىنداعى اقپاراتتىق ءوزارا ارەكەتتەستىكتى تەرەڭدەتۋگە باعىتتالعان جانە حالىقارالىق «Kazinform» اگەنتتىگى مەن Anadolu Ajansi اراسىندا كەڭەيتىلگەن ىنتىماقتاستىقتى كوزدەيدى.

تاراپتار قازاق، تۇرىك، ورىس جانە اعىلشىن تىلدەرىندە جاڭالىق الماسۋعا، ونى ءوز پلاتفورمالارىندا بەيىمدەۋ جانە جاريالاۋ قۇقىعىن پايدالانا وتىرىپ، كاسىبي بايلانىستاردى دامىتۋعا، جۋرناليستەردى تاعىلىمدامادان وتكىزۋ مەن وقىتۋعا كەلىسىم جاساستى.

قازاقستان پرەزيدەنتىنىڭ تەلەراديوكەشەنى - ەلدەگى ءىرى مەديا كومپانيالاردىڭ ءبىر. ونىڭ قۇرامىنا ەڭ كونە حالىقارالىق اقپارات اگەنتتىگى Kazinform ،Jibek Joly ،Silk Way ،Silk Way Cinema تەلەارنالارى جانە دەرەكتى فيلمدەر ورتالىعى كىرەدى.

Anadolu Ajansi - تۇركيانىڭ حالىقارالىق اقپارات اگەنتتىگى. ول جاڭالىقتاردى 13 كە جۋىق تىلدە، ونىڭ ىشىندە اعىلشىن، اراب، ورىس، يسپان، فرانتسۋز جانە تاعى باسقا تىلدەردە تاراتادى. اگەنتتىكتىڭ 100-دەن استام ەلدە، سونىڭ ىشىندە قازاقستان، رەسەي، قىتاي، اقش، گەرمانيا، قاتار، يراندا تىلشىلەر جەلىسى مەن كەڭسەلەرى بار.

2025 -جىلى Anadolu Ajansi مەن «Kazinform» اقپارات اگەنتتىكتەرىنىڭ ەكەۋى دە 105 جىلدىق مەرەيتويىن اتاپ وتەدى.

بۇعان دەيىن حابارلانعانداي، پرەزيدەنت تەلەراديوكەشەنى وڭتۇستىك-شىعىس ازيادا مەديا سەرىكتەستىكتى كەڭەيتەدى.