امەريكالىقتار قازاق اسكەريلەرىنىڭ شىدامدىلىعىنا تاڭ قالدى
استانا. KAZINFORM - قازاقستاندىق اسكەري قىزمەتشى ا ق ش- تىڭ اريزونا شتاتىندا رەكورد ورناتقان ەدى.
جىل سايىن وتەتىن Best Warrior بايقاۋىنا قاتىسقان قوس اسكەري Kazinform تىلشىسىنە سۇحبات بەرىپ، جارىستان جيناعان تاجىريبەلەرىمەن ءبولىستى.
كەمپ ناۆاحو اسكەري بازاسىندا ۇيىمداستىرىلعان باسەكەدە قازاقستاننىڭ نامىسىن 54835-ا اسكەري ءبولىمى باتالونىنىڭ 3-سىنىپتى سەرجانتى دارحان اسلان مەن 18404 اسكەري ءبولىمى روتاسىنىڭ 3-سىنىپتى گۆارديا سەرجانتى راۋان توقتاربەكوۆ قورعاعان ەدى. 800 مەتر قاشىقتىقتى 2 مينۋت 5 سەكۋندتا جۇگىرىپ ءوتىپ، رەكورد ورناتقان دارحان اسلان بۇل جارىسقا دايىندالۋ اسا قيىنعا تۇسپەگەنىن ايتادى.
- ءبىز اسكەري قىزمەتكەر بولعاندىقتان، جۇگىرۋ - ءبىزدىڭ كۇندەلىكتى ىستەيتىن جۇمىسىمىز. ال وزگە جارىس تۇرلەرىنە ءبىز 1 ايداي دايىندالدىق. ويتكەنى ا ق ش اسكەريلەرىنىڭ فيزيكالىق نورماتيۆتەرى بىزدىكىنە قاراعاندا وزگەشەلەۋ. سول سەبەپتى ولاردىڭ نورماتيۆتەرىنە ساي جاتتىعۋلارىنا كوبىرەك دايىندالدىق. ىرىكتەۋدەن وتكەننەن كەيىن 1 ايدان كەيىن وسى جارىسقا باراتىنىمىزدى ايتتى. سول ساتتەن-اق ءوزىمىزدى مورالدىق تۇرعىدان دايىندادىق. ەلىمىزدىڭ نامىسىن قورعاۋ كەرەك بولدى. قارۋلاس دوسىمىز ەكەۋىمىز ءبىر-بىرىمىزبەن تاجىريبە الماسىپ، 10 كۇن قالعاندا بىرگە دايىندالدىق، - دەيدى 3-سىنىپتى سەرجانت.
ال مارە سىزىعىن وتانداسىنان 5 سەكۋندقا كەشىگىپ كەسكەن راۋان توقتاربەكوۆ سايىستى ەكىنشى بولىپ اياقتاعان. وسىلايشا، قازاقستاندىق قوس جاۋىنگەر شاشاسىنا شاڭ جۇقتىرماي، قارسىلاستارىن باسىپ وزدى. 18404 اسكەري ءبولىمى روتاسىنىڭ 3-سىنىپتى گۆارديا سەرجانتى بيىلعى جارىستىڭ ەرەكشە بولعانىن ايتادى.
- بۇل بايقاۋدىڭ باستى ماقساتى - ەكى ەلدىڭ ىنتىماقتاستىعىن نىعايتىپ، تاجىريبە الماسۋ. بۇعان دەيىن ا ق ش- تىڭ اريزونا شتاتى مەن ءبىزدىڭ قازاقستان قارۋلى كۇشتەرىنىڭ اراسىندا بۇل جارىس جىل سايىن ۇيىمداستىرىلاتىن. ءبىراق بيىل ەرەكشە كۇردەلى بولىپ ءوتتى. سەبەبى بىزدەن بولەك تاعى 5 مەملەكەت پەن ا ق ش- تىڭ 7 شتاتى باق سىنادى. جارىس وزگە ەلدە بولسا دا، بۇل بىزگە اسا قاتتى اسەر ەتە قويعان جوق. وزگە ەلدىڭ اسكەريلەرى ءبىزدىڭ شىدامدىلىعىمىزعا ءتانتى بولدى، - دەيدى راۋان توقتاربەكوۆ.
اسكەريلەر ەلىمىزدە تۇراقتى تۇردە وتەتىن «اسكەر تارلانى» سايىسىنىڭ بىلتىرعى ۇزدىكتەرى. سولاي، ولار Best Warrior بايقاۋىنا قاتىسىپ، تاجىريبە الماسۋ مۇمكىندىگىنە يە بولدى. ساربازدار قوس ەلدىڭ اسكەريلەردى دايىنداۋدا وزىندىك ەرەكشەلىكتەرى بار ەكەنىن ايتادى.
- ول جاقتا كوبىنەسە جاقىن قاشىقتىقتا باق سىنايدى. كۇشتىك جاتتىعۋلارعا باسىمدىق بەرىلىپ، فيزيكالىق تۇرعىدا وتە كوپ ماشىقتانادى ەكەن. ءبىراق ونداي جاتتىعۋلار بىزدە دە قولدانىلادى. دەگەنمەن تاجىريبەدە ولار سەكىلدى ءجيى پايدالانبايمىز. تاجىريبە الماسۋ بارىسىندا ولار ءبىزدىڭ توزىمدىلىگىمىزدى نازارىنا الدى دەپ ويلايمىن. سەبەبى ءبىزدىڭ نورماتيۆتەرىمىزدىڭ باسىم بولىگى شىدامدىلىققا ۇيرەتەدى، - دەيدى ولار.
قازاقستاندىق جاۋىنگەرلەر وزگە ەلدىڭ اسكەريلەرىن شىدامدىلىعىمەن ءتانتى ەتىپ تە ۇلگەرىپتى.
- ولار كوبىنەسە كۇشتى قاجەت ەتەتىن جاتتىعۋلاردى ورىندايدى. ال ءبىز شىدامدىلىققا داعدىلانامىز. ولار ءبىزدىڭ دەنە بىتىمىمىزگە قارايدى. ءبىز ولار سەكىلدى ەمەسپىز. ءبىراق جاتتىعۋعا كەلگەندە ەكەۋىمىز جاقسى ناتيجە كورسەتەمىز. ولار سونى كورىپ، «سەندەر قالاي دايىندالاسىڭدار؟» دەپ تاڭ قالادى، - دەيدى دارحان اسلان.
ايتا كەتەيىك، قازاقستاندىق اسكەري قىزمەتشى ا ق ش- تا رەكورد ورناتقانى تۋرالى جازعان ەدىك.