امەريكالىق كوكپارشىنىڭ ەرەكشە جاتتىعۋى قازاقستاندىقتاردى تاڭقالدىردى
استانا. قازاقپارات - امەريكالىق كوكپارشى بۇعان دەيىن 2018 -جىلعى دۇنيەجۇزىلىك كوشپەندىلەر ويىندارىندا جانە 2020 -جىلى كوكبورى سپورتىنان چەمپيوناتتا ونەر كورسەتىپ ۇلگەرگەن.
امەريكالىق كوكپارشى نيك ۋيللەرتتىڭ وسى كۇزدە استانا قالاسىندا وتەتىن 5-دۇنيەجۇزىلىك كوشپەندىلەر ويىندارى اياسىنداعى كوكپار سايىسىنا دايىندىعى الەۋمەتتىك جەلىدە كوپتىڭ نازارىنا ءتۇستى.
كوكپارشى دايىندىق بارىسىندا سەركەنىڭ ورنىنا گىر تاسىن پايدالانىپ، ال جىلقىنى قولدان جاسالعان اعاش اتقا الماستىرعان. بەينەتاسپا ۇلتتىق سپورت قاۋىمداستىعىنىڭ Instagram جانە Tik Tok جانە الەۋمەتتىك جەلىلەرىنە جاريالانعان ەدى. ۆيدەو 150 مىڭنان استام قارالىم جيناپ، كوپتىڭ نازارىنا ءتۇستى. جەلى قولدانۋشىلارى كوكپارشىنى قولداپ، ساتتىلىك تىلەدى.
ايتا كەتەيىك، نيك ۋيللەرت - كوكپاردان ا ق ش قۇراماسىنىڭ سپورتشىسى، وسى كۇزدە استانادا وتەتىن 5-دۇنيەجۇزىلىك كوشپەندىلەر ويىندارىندا كوكپار جانە اۋدارىسپاق (ات ۇستىندەگى كۇرەس) سپورتى بويىنشا باق سىناماق. سونىمەن قاتار، ۋيللەرت كوكپاردان باسقا شاڭعى، سەرفينگ جانە مما سپورتىمەن شۇعىلدانادى.
«2018 -جىلى ا ق ش قۇراماسىنىڭ قاتارىندا كوكبورى سپورتىنا جانە ات ۇستىندەگى كۇرەسكە قاتىسقان العاشقى امەريكالىق بولدىم. ال دۇنيەجۇزىلىك كوشپەندىلەر ويىندارىندا كاسىبي سپورتشىلارمەن باسەكەگە ءتۇسۋ مۇمكىندىگىنە يە بولعانىما وتە قۋانىشتىمىن. مىنەكەي، مەنىڭ قازاقستانعا بارسام دەگەن ارمانىم ورىندالماق. تالاي ۋاقىتتان بەرى بۇل مەكەنگە ساياحاتتاۋدى جوسپارلاپ ەدىم، ەندى وسى مۇمكىندىك ءۇشىن العىس ايتقىم كەلەدى. ارينە، كوپشىلىك ا ق ش سپورتشىلارىن كوكپار مەن ات ۇستىندەگى كۇرەستە وڭاي قارسىلاس ساناۋى مۇمكىن. دەسە دە بار مۇمكىنشىلىگىمىزدى كورسەتىپ، دەڭگەيىمىزدىڭ وسكەنىن دالەلدەي الامىز دەپ ويلايمىن»، - دەپ اتاپ ءوتتى سپورتشى.
امەريكالىق كوكپارشى بۇعان دەيىن 2018 -جىلعى دۇنيەجۇزىلىك كوشپەندىلەر ويىندارىندا جانە 2020 -جىلى كوكبورى سپورتىنان چەمپيوناتتا ونەر كورسەتىپ ۇلگەرگەن.
كوكپار باسەكەسى 5-دۇنيەجۇزىلىك كوشپەندىلەر ويىندارى اياسىندا 9-12-قىركۇيەك ارالىعىندا «قازانات» يپپودرومىندا وتەدى.
ەسكە سالا كەتەيىك، رەسپۋبليكالىق «كوكپار» فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە «بايگە»، «ساداق اتۋ»، «تەڭگە ءىلۋ»، «اۋدارىسپاق»، «جامبى اتۋ»، «قۇسبەگىلىك»، «اسىق اتۋ»، «JORYQ» ات سپورتى جانە ت. ب. فەدەراتسيالار بار. ق ر ۇلتتىق سپورت قاۋىمداستىعىن يسلامبەك سالجانوۆ باسقارادى.