امەريكالىق Amazon تۇركيادا سپۋتنيك بولشەكتەرىن شىعارادى
ASTANA. Kazinform - امەريكالىق Amazon كورپوراتسياسى تۇركيادا سپۋتنيكتىك قۇرامداس بولىكتەر شىعارۋعا ينۆەستيتسيا سالاتىنىن مالىمدەدى.
Amazon شەشىمى بىرنەشە فاكتورلارعا نەگىزدەلگەن. انىقتالعانداي، تۇركيا ماشينا جاساۋدى دامىتۋ ءۇشىن قولايلى جاعداي ۇسىنا الادى، بىلىكتى تەحنيكالىق ماماندارعا يە جانە قىتاي مەن ەۋروپادان قاجەتتى بولشەكتەردى جەتكىزۋ وڭايعا سوعادى.
جوبا تۇركيانىڭ جوعارى تەحنولوگيالىق وندىرىسكە ماماندانعان Tezmaksan كومپانياسىمەن بىرلەسىپ جۇزەگە اسىرىلماق. سيۆاس، يوزگات، توكات جانە كايسەري سياقتى تۇركيانىڭ ءتورت پروۆينتسياسىنداعى زاۋىتتاردا ءوندىرىس جولعا قويىلادى. جوبا جاقىن ارادا جۇزەگە اسىرىلا باستايدى، ونىمدەردىڭ العاشقى جەتكىزىلىمى 2025 -جىلدىڭ باسىنا جوسپارلانعان.
Amazon ينۆەستيتسياسى كومپانيانىڭ سپۋتنيكتىك تەحنولوگيالار سالاسىنداعى پوزيتسياسىن نىعايتىپ قانا قويماي، تۇرىك ونەركاسىپ سەكتورىنىڭ دامۋىنا ايتارلىقتاي ۇلەس قوسۋى كۇتىلۋدە. وسىلايشا، تۇركيا ءوزىنىڭ گەوگرافيالىق جاعدايى مەن دامىپ كەلە جاتقان تەحنيكالىق تاجىريبەسىنىڭ ارقاسىندا بىرتە-بىرتە الەمدىك جوعارى تەحنولوگيالىق نارىقتا ماڭىزدى ويىنشى بولۋدى جوسپارلاپ وتىر.
Amazon قاتىساتىن بۇل جوبا حالىقارالىق كومپانيالاردىڭ تۇرىك ءوندىرىسىنىڭ الەۋەتىنە قىزىعۋشىلىعىن كورسەتەدى جانە تەحنولوگيالىق ىنتىماقتاستىق ءۇشىن جاڭا مۇمكىندىكتەر اشادى.
ايتا كەتەيىك، قازاقستان يلون ماسكتىڭ Starlink ينتەرنەتىنە بالاما بولاتىن Amazon Kuiper سپۋتنيكتىك ينتەرنەت قىزمەتىمەن كەلىسىمگە قول قويۋدى جوسپارلاپ وتىر.