امەريكادا اسىراپ الىنعان تاعى ءبىر قازاق قىزى ءوز-وزىنە قول جۇمسادى

استانا. قازاقپارات – ا ق ش- تا تۇراتىن دينارا ەسىمدى قىز ءوز-وزىنە قول جۇمساعانى تۋرالى قايعىلى حابار جەتتى.

بۇل تۋرالى بەلگىلى جۋرناليست جانار بايسەمىزوۆا الەۋمەتتىك جەلىدەگى پاراقشاسىندا جازدى.

«امەريكادان جەتكەن سۋىت حابار جىپ-جىلى بولىپ تۇرعان كۇزدىڭ كۇنىن سۋىتىپ جىبەردى. ءبىر ساتتە اينالامداعى اسەم بوياۋلار قارايىپ، شايىلىپ كەتتى. بۇل قالاي بولعانى، نەگە، نە ءۇشىن؟! سۇراق كوپ، جاۋاپ جوق... نەتكەن وكىنىش... نەتكەن قاسىرەت... دينارا، كەشىر مەنى، كەش ءبىزدى... رۋحىڭ پەيىشتە شالقىسىن. جاپ-جارىق ەدىڭ... قوش بول، جارىق كۇن» - دەپ جازدى جۋرناليست.

دينارا قازاقستانداعى تەلەجوبالارعا قاتىسىپ، ەلگە تانىلعان بولاتىن. قوستاناي قالاسىنان شىققان قىزدى التى جاسىندا ا ق ش وتباسى اسىراپ العان.

ايتا كەتەيىك، 1999-2012-جىلدار ارالىعىندا قازاقستان شەتەلدىكتەرگە بالا اسىراپ الۋعا رۇقسات بەرگەن. بەيرەسمي مالىمەتتەرگە سۇيەنسەك، وسى ۋاقىت ارالىعىندا ا ق ش ازاماتتارى 10 مىڭعا جۋىق قازاقستاندىق بالانى اسىراپ العان. بۇل – ا ق ش- تا اسىراپ الىنعان قازاقستاندىقتار اراسىندا تىركەلگەن ەكىنشى سۋيتسيد جاعدايى.