«امەريكا داۋىسى» جابىلۋعا جاقىن: قىزمەتكەرلەردىڭ 85 پايىزى جۇمىستان بوساتىلدى

استانا. KAZINFORM - ا ق ش- تىڭ عالامدىق مەديالار اگەنتتىگى (USAGM)، «امەريكا داۋىسى» (Voice of America) راديوسىن باسقاراتىن مەكەمە، تاعى 639 قىزمەتكەرگە جۇمىستان بوساتۋ تۋرالى حابارلاما جىبەرگەنىن مالىمدەدى.

 بۇل - 1942 -جىلى قۇرىلعان اقپارات قىزمەتىن جويۋ باعدارلاماسىنىڭ ءىس جۇزىندە اياقتالعانىن بىلدىرەدى، دەپ حابارلايدى BBC Reuters اگەنتتىگىنە سىلتەمە جاساپ.

بۇل قىزمەتكەرلەردى قىسقارتۋدىڭ سوڭعى تولقىنى - 2025 -جىلدىڭ ناۋرىزىندا باستالعان «امەريكا داۋىسى» كادرلىق قۇرامىن �- عا دەيىن ازايتۋ جوسپارىنىڭ قورىتىندى كەزەڭى. مامىر ايىندا شامامەن 600 جۋرناليست جۇمىستان شىعارىلعان. جالپى، ترامپ اكىمشىلىگىنىڭ مەملەكەتتىك قۇرىلىمداردى قىسقارتۋ باعدارلاماسى اياسىندا ا ق ش عالامدىق مەديالار اگەنتتىگى مەن وعان قاراستى باسقا مەديا ۇيىمداردا 1400-دەي ادامدى جۇمىستان شىعارۋ جوسپارلانعان.

اگەنتتىكتىڭ اعا كەڭەسشىسى كاري لەيكتىڭ مالىمدەۋىنشە، قازىرگى تاڭدا اگەنتتىكتىڭ وزىندە زاڭ بويىنشا رۇقسات ەتىلگەن ەڭ تومەنگى - 81 ادام عانا قالدى، ال «امەريكا داۋىسى» رەداكسياسىندا شامامەن 100 ادام جۇمىس ىستەپ وتىر.

Reuters مالىمەتىنە سۇيەنسەك، بۇل قىسقارتۋ تولقىنى «امەريكا داۋىسى» قىزمەتىنىڭ تولىق جابىلۋىن ءبىلدىرۋى مۇمكىن.

بۇعان دەيىن «امەريكا داۋىسى» راديوستانسياسى ا ق ش پرەزيدەنتى دونالد ترامپتىڭ ساياساتىن قولدايتىن One America News Network تەلەارناسىنىڭ كونتەنتىن رەترانسلياتسيالاۋشى رەتىندە جۇمىسىن جالعاستىراتىنى حابارلانعان بولاتىن.