پاتەر ۇرىسى تونايتىن ءۇيدى قالاي تاڭدايدى
حالىق اراسىندا پاتەر ۇرلىعى اياق استىنان جاسالادى دەگەن تۇسىنىك بار. ءبىراق بۇل قاتە پىكىر. كەيدە قىلمىسكەرلەر ىقتيمال قۇرباندارىن ءبىراز ۋاقىت اڭدىپ، ولاردىڭ كۇن ءتارتىبىن زەرتتەيدى جانە پاتەردىڭ قانشالىقتى قورعالعانىن باقىلايدى.
- مول اقشا، باعالى اشەكەي بۇيىمدار جانە باسقا دا قۇندى زاتتار بولۋى مۇمكىن پاتەرلەر، ادەتتە، قىلمىسكەرلەردىڭ نازارىن اۋدارادى، - دەدى قوستاناي وبلىسى پوليتسيا دەپارتامەنتى وڭتۇستىك پوليتسيا ءبولىمىنىڭ كريمينالدىق پوليتسيا بولىمشەسىنىڭ باستىعى دامير رايسوۆ.
دەگەنمەن، ۇرلىق كەيدە اياق استىنان دا جاسالادى. ماسەلەن، قۇلىپتالماي قالعان ەسىك، اشىق قالعان تەرەزە قولىنىڭ سۇعاناعى بار كىسىلەردى قىلمىس جاساۋعا يتەرمەلەۋى ىقتيمال.
پوليتسەيلەر بوتەن ادامدارعا ءبىر جاققا جول جۇرگەلى جاتقانىڭىزدى ايتپاۋ كەرەگىن جانە كىرەبەرىس پەن پاتەر ماڭىندا جۇرگەن كۇدىكتى بەيتانىس جانداردان ساق بولۋدى ەسكەرتەدى. الايدا ولارمەن ءوزىڭىز جانجالداسىپ، ءوز بەتىڭىزشە ۇرىنى انىقتاۋعا تىرىسپاعانىڭىز ابزال.
توناۋشى كوممۋنالدىق قىزمەتكەر كەيپىندە كەلۋى مۇمكىن بە
دامير رايسوۆتىڭ ايتۋىنشا، كەي جاعدايدا ۇرىلار تۇرعىنداردىڭ سەنىمىن پايدالانۋ ارقىلى پاتەرگە كىرەدى.
تەلەفون الاياقتارى سياقتى ۇرىلار دا ءوزىن كوممۋنالدىق جانە الەۋمەتتىك قىزمەتتەردىڭ، جوندەۋ ۇيىمدارىنىڭ نەمەسە باسقا دا مەكەمەلەردىڭ قىزمەتكەرى بولىپ تانىستىرۋى مۇمكىن. ولار جابدىقتى تەكسەرۋ، ەسەپتەگىش كورسەتكىشتەرىن الۋ نەمەسە جوندەۋ جۇمىستارىن جۇرگىزۋ دەگەن سەكىلدى سىلتاۋلارمەن ۇيگە كىرۋگە تىرىسادى.
- اسىرەسە الدىن الا ەسكەرتۋسىز كەلەتىن، ەسىكتى دەرەۋ اشۋدى تالاپ ەتەتىن نەمەسە كەلۋ ماقساتىن تۇسىندىرۋدەن باس تارتاتىن بەيتانىس ادامدارعا ساقتىقپەن قاراۋ كەرەك، - دەدى ول.
سونىمەن قاتار، ەسكەرەتىن تاعى ءبىر دۇنيە بار. ەگەر ەسىگىڭىزدى قاققان ادام سىزگە قىزمەتتىك كۋالىگىن كورسەتسە، ول ءشۇباسىز سول ۇيىمنىڭ قىزمەتكەرى دەگەندى بىلدىرمەيدى. مۇنداي جاعدايدا كوممۋنالدىق نەمەسە باسقا قىزمەتتىڭ رەسمي تەلەفون نومىرىنە ءوزىڭىز حابارلاسىپ، كورسەتىلگەن مەكەنجايعا مامان جىبەرىلگەنىن نەمەسە جىبەرىلمەگەنىن ناقتىلاۋ قاجەت.
دەمالىستا تۇسكەن فوتولار نەگە قاۋىپتى بولۋى ىقتيمال
جۇرت ءجيى جىبەرەتىن قاتەلىكتىڭ ءبىرى - ۇيدە ۇزاق ۋاقىت بولمايتىنى تۋرالى اقپاراتتى جاريالاۋ. جاعاجايدا نەمەسە تاۋدا تۇسكەن فوتوعا الەۋمەتتىك جەلىدە دوستارىڭىز جاپپاي لايك باسىپ قانا قويماي، ول ارام پيعىلدى ادامداردىڭ دا نازارىنا ىلىگۋى مۇمكىن.
- الەۋمەتتىك جەلىدە الداعى دەمالىس، شەتەلگە ساپار نەمەسە ەل ىشىندەگى ساياحات تۋرالى جازۋ ارقىلى ادامدار پاتەرىنىڭ بەلگىلى ءبىر ۋاقىت بويى بوس قالاتىنىن وزدەرى حابارلايدى. مۇنداي جازبالاردى دوستارى مەن تۋىستارى عانا ەمەس، ونلاين الەمدەگى بوگدە پايدالانۋشىلار دا كورەدى، - دەپ ءتۇسىندىردى پوليتسەي.
قۇقىق قورعاۋ ورگاندارى سىن- قاتەرلەردىڭ الدىن الۋ ءۇشىن دەمالىستا تۇسكەن فوتولار مەن اسەردى ۇيگە ورالعاننان كەيىن جاريالاۋعا كەڭەس بەرەدى. قازىرگى تىلمەن ايتقاندا، دەمالىستىڭ ءار ءساتىن ءدال سول ۋاقىتتا سەزىنىپ، سۋرەتتەردى الەۋمەتتىك جەلىگە كەيىنىرەك بولىسكەن دۇرىس.
بۇعان قوسا، ۇيدەن ۇزاق ۋاقىتقا كەتەر الدىندا سەنىمدى تۋىستارىڭىزدان نەمەسە كورشىلەرىڭىزدەن پاتەردى وقتىن- وقتىن تەكسەرىپ، پوشتا جاشىگىندەگى حاتتاردى الىپ تۇرۋدى سۇراعان ءجون. ال قوسالقى كىلتتى ەسىك الدىنداعى توسەنىشتىڭ استىنا، پوشتا جاشىگىنە نەمەسە باسقا دا وڭاي تابىلاتىن جەرلەرگە قالدىرۋعا بولمايدى.
كامەرالار مەن قىمبات قۇلىپتار پاتەردى قورعاي الا ما
ماماندار تۇرعىن ءۇي قاۋىپسىزدىگىن قامتاماسىز ەتۋ ءۇشىن بىرنەشە قورعانىس ءتاسىلىن قاتار قولدانۋدى ۇسىنادى.
ەڭ الدىمەن، كىرەبەرىس ەسىك پەن قۇلىپتاردىڭ سەنىمدىلىگىنە كوز جەتكىزۋ قاجەت. اسىرەسە تومەنگى قاباتتارداعى پاتەرلەردىڭ تەرەزەلەرى مەن بالكوندارىنا ەرەكشە نازار اۋدارعان ءجون. دابىل جۇيەسى، بەينەباقىلاۋ كامەرالارى جانە دوموفون قوسىمشا قاۋىپسىزدىك شارالارى سانالادى.
الايدا زاماناۋي تەحنيكالىق قۇرالداردىڭ ءوزى ۇرلىقتىڭ تولىقتاي الدىن الا المايدى. ولاردىڭ نەگىزگى مىندەتى - قىلمىسكەرلەردىڭ ۇيگە كىرۋىن قيىنداتۋ جانە توناۋ فاكتىسى بولعان جاعدايدا ونىڭ ءمان- جايىن انىقتاۋعا كومەكتەسۋ.
كورشىلەرمەن جاقسى قارىم- قاتىناستا بولۋ دا ماڭىزدى. ويتكەنى، ءۇي يەلەرى بولماعان كەزدە پاتەر ماڭىنداعى كۇدىكتى ارەكەتتەردى العاش بولىپ سولار بايقاۋى مۇمكىن.
پاتەر ەسىگى بۇزىلعان بولسا، نە ىستەۋ كەرەك
ەگەر ۇيگە ورالعاندا ەسىك قۇلپىنىڭ بۇلىنگەنىن، قاساقانا بۇزۋ ىزدەرىن نەمەسە زاڭسىز كىرۋدىڭ باسقا بەلگىلەرىن بايقاساڭىز، بىردەن ىشكە كىرمەڭىز. قىلمىسكەر ءالى دە پاتەردىڭ ىشىندە بولۋى مۇمكىن.
مۇنداي جاعدايدا قاۋىپسىز جەرگە بارىپ، پوليتسياعا 102 ءنومىرى ارقىلى حابارلاسۋ قاجەت.
قۇقىق قورعاۋ ورگاندارىنىڭ قىزمەتكەرلەرى كەلگەنگە دەيىن ەسىكتىڭ تۇتقاسىن، قۇلىپتى جانە قىلمىس ىزدەرى ساقتالۋى مۇمكىن باسقا دا زاتتاردى ۇستاماعان دۇرىس.
ەگەر پاتەرگە كىرىپ، ۇرىمەن بەتپە-بەت كەلسەڭىز، ەڭ باستىسى - ونى ءوز بەتىڭىزشە ۇستاۋعا تىرىسپاڭىز. اسىرەسە، قىلمىسكەردىڭ قارۋى بولسا جانە سىزگە شابۋىل جاسايتىنىن اڭعارساڭىز، ونى ودان ءارى ەرەگىستىرۋدىڭ كەرەگى جوق. مۇمكىندىك بولسا، قاۋىپسىزدىگىڭىزدى ويلاپ، رەتىن تاۋىپ ءۇي-جايدان شىعىپ، پوليتسياعا كۇدىكتىنىڭ سىرتقى بەلگىلەرىن جانە قاي باعىتقا قاشقانىن حابارلاۋ قاجەت.
بۇزۋ ىزدەرى جوق ۇرلىق: قىلمىسكەردى تابۋعا بولا ما
دامير رايسوۆتىڭ ايتۋىنشا، كەيدە پاتەردەن اقشا، اشەكەي بۇيىمدار نەمەسە تەحنيكا جوعالىپ كەتەدى، ءبىراق ەسىك پەن تەرەزەدە بۇزىلماعان بولىپ شىعادى. ءتىپتى ءۇي يەلەرى زاتتارىنىڭ جوعالعانىن بىرنەشە كۇن وتكەن سوڭ عانا بايقاپ جاتادى.
الايدا بۇزۋ ىزدەرىنىڭ بولماۋى ۇرلىقتىڭ اشىلماي قالاتىنىن بىلدىرمەيدى. مۇنداي جاعدايدا پوليتسياعا مۇمكىندىگىنشە تەزىرەك حابارلاسىپ، مۇلىكتىڭ قانداي جاعدايدا جوعالعانىن ەگجەي-تەگجەيلى تۇسىندىرگەنىڭىز ابزال. تەرگەۋ بارىسىندا قۇقىق قورعاۋ ورگاندارىنىڭ قىزمەتكەرلەرى بەينەباقىلاۋ كامەرالارىنداعى جازبالاردى زەرتتەپ، كورشىلەر مەن كۋاگەرلەردەن جاۋاپ الۋى، سونداي اق پاتەرگە كىرۋگە مۇمكىندىگى بولعان ادامدار تۋرالى مالىمەتتەردى تەكسەرۋى مۇمكىن.
سونىمەن قاتار، ۇرلانعان مۇلىككە قاتىستى قۇجاتتار، فوتوسۋرەتتەر، تەحنيكانىڭ سەريالىق نومىرلەرى جانە جوعالعان زاتتاردىڭ سوڭعى رەت قاي ۋاقىتتا ورنىندا بولعانى تۋرالى اقپاراتتىڭ ماڭىزى زور.
ال ەگەر جابىرلەنۋشى ناقتى ءبىر ادامنان كۇدىكتەنسە، بۇل تۋرالى پوليتسيا قىزمەتكەرلەرىنە حابارلاعانى جانە سەبەبىن تۇسىندىرگەنى ءجون.
ءسوزىنىڭ تۇيىنىندە مامان پاتەردى قىلمىسكەرلەردەن تولىقتاي قورعايتىن امبەباپ ءارى ءمىنسىز ءتاسىل جوق ەكەنىن اتاپ ءوتتى. دەگەنمەن، تۇرعىن ءۇي قاۋىپسىزدىگىنە مۇقيات قاراۋ، ۇيگە كەلگەن بەيتانىس جانداردى تەكسەرۋ جانە عالامتوردا جەكە اقپاراتتى جاريالاعاندا ساق بولۋ سەكىلدى امالدار پاتەر ۇرلىعىنىڭ الدىن الۋعا كومەكتەسەدى.
اۆتور
الپامىس فايزوللا