الەمدىك ب ا ق-تاعى قازاقستان: Ozon مەن Alibaba عا ارنالعان لوگيستيكالىق كەشەن، G20 سامميتى جانە 15 جاڭا ءوندىرىس ورنىن قۇرۋ

استانا. KAZINFORM - اپتا سوڭىندا جاھاندىق ينتەرنەت- باسىلىمداردى ءبىر پاراقتادىق. ونداعى قازاقستانعا قاتىستى جاڭالىقتىڭ كوبى ديپلوماتيالىق قاتىناس پەن حالىقارالىق ساۋداعا نەگىزدەلگەنى بايقالادى. قازاقستاننىڭ G20 سامميتىنە دايىندىعى، Ozon جانە Alibaba ساۋدا الاڭدارىنا ارنالعان لوگيستيكالىق كەشەن سالۋ جوسپارى، سىرتتان تاۋىق جۇمىرتقاسىن اكەلۋگە سالىنعان تىيىم ايتىلىپتى. تولىعىراق Kazinform ءتىلشىسىنىڭ شولۋىنان وقىڭىز.

كوللاج: kazinform/ ج ي

Report: 15 ءوندىرىس ورنى قۇرىلماق

قازاقستاندا مۇناي- گاز ونەركاسىبىنە قاجەتتى ءونىم شىعاراتىن 15 جاڭا ءوندىرىس ورنى قۇرىلاتىن بولدى. الەمدىك جانە وتاندىق ءىرى وندىرۋشىلەرمەن بىرلەسىپ قولعا الىنعان جوبالاردىڭ قۇنى 37,7 ميلليارد تەڭگەنى قۇرايدى. بۇل تۋرالى ۇكىمەت وتىرىسىندا ەنەرگەتيكا ءمينيسترى ەرلان اقكەنجەنوۆ مالىمدەگەن. مينيستر ءسوزىن Report اگەنتتىگى ءبولىستى.

مينيسترلىك جوسپارى بويىنشا، كاسىپورىندار مۇناي- گاز سالاسىنداعى سۇرانىسقا يە ونىمدەردى شىعارادى. قازىر وسىنداي تاۋارلاردىڭ 160 ءتۇرى انىقتالعان.

اتالعان باستاما مۇناي- گاز سەكتورىن قاجەتتى جابدىقپەن دەر كەزىندە قامتۋعا جانە جەرگىلىكتى كادرلاردىڭ وندىرىستىك الەۋەتىن ارتتىرۋعا كومەكتەسۋى ءتيىس. جاڭا زاۋىتتار ءونىم تۇرلەرىن كوبەيتىپ، ىشكى نارىقتاعى شەتەلدىك تاۋارلاردىڭ ۇلەسىن ازايتۋعا مۇمكىندىك بەرەدى.

مۇنداي ءتاسىل بۇعان دەيىن دە وڭ ناتيجە كورسەتكەن. ۆەدومستۆو دەرەگىنشە، 2022- 2025 -جىلدار ارالىعىندا ەلدە قۇنى 7,9 ميلليارد تەڭگە بولاتىن 10 ءوندىرىس ورنى لوكاليزاتسيالانىپ، 350 دەن استام جاڭا تۇراقتى جۇمىس ورنى اشىلعان.

The Times of Central Asia: Ozon جانە Alibaba ساۋدا الاڭدارىنا ارنالعان لوگيستيكالىق كەشەن سالىنادى

پەتروپاۆل قالاسىندا اۋدانى 102000 شارشى مەتردى قۇرايتىن لوگيستيكالىق ورتالىق سالۋ جوسپارلانىپ وتىر. «قىزىلجار» لوگيستيكالىق ورتالىعىنىڭ قۇرىلىسىنا سالىناتىن ينۆەستيتسيا كولەمى 29 ميلليارد تەڭگەدەن اسادى. ورتالىق تاۋارلاردى، سونىڭ ىشىندە Ozon جانە Alibaba پلاتفورمالارى ارقىلى ساتىلاتىن ونىمدەردى ساقتاۋ مەن تاراتۋ ءۇشىن پايدالانىلماق. جاڭالىقتى The Times of Central Asia جازدى.

بىرىككەن اراب امىرلىكتەرىنىڭ Royal Investment International ينۆەستيتسيالىق كومپانياسى جوبانى 18-قاراشادا تانىستىردى. ونىڭ نەگىزىن قالاۋشى مارات ساليحوۆ جوبانى سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆپەن تالقىلاعان.

2025 -جىلى قازاقستانداعى ونلاين- ساۋدا كولەمى 19,4 پايىزعا ءوسىپ، 3,77 ترلن تەڭگەگە جەتتى. ونىڭ جالپى بولشەك ساۋداداعى ۇلەسى 14,3 پايىز. ساۋدا جانە ينتەگراتسيا مينيسترلىگى 2030 -جىلعا قاراي بۇل ۇلەستى 20 پايىزعا دەيىن ۇلعايتۋدى ماقسات ەتىپ وتىر.

سونداي- اق Wildberries كومپانياسى قازاقستانداعى قويمالارىن كەڭەيتۋدى قاراستىرىپ جاتىر. مينيسترلىك ەگەر كومپانيا رەسمي سۇرانىس جىبەرسە، كەز كەلگەن ۇسىنىستى قاراستىرۋعا دايىن ەكەنىن مالىمدەگەن.

Reuters: قازاقستان G20 سامميتى قارساڭىندا ا ق ش-قا تىكەلەي رەيس اشۋ ءۇشىن FAA ماقۇلداۋىن كۇتىپ وتىر

قازاقستان جەلتوقسان ايىندا وتەتىن G20 سامميتىنە دەيىن ۇشۋ قاۋىپسىزدىگى بويىنشا امەريكالىق رەيتينگكە يە بولۋدان ءۇمىتتى. اتالعان جيىنعا قازاقستان پرەزيدەنتى قاتىسادى. اقپاراتتى Reuters حابارلاعان.

قازاقستاننىڭ كولىك ۆيتسە-ءمينيسترى تالعات لاستايەۆ سەيسەنبىدە ا ق ش-قا تىكەلەي اۋە رەيسىن اشۋعا مۇمكىندىك بەرەتىن 1-ساناتتى قاۋىپسىزدىك رەيتينگىن بەرۋ تۋرالى شەشىم جەلتوقساندا بەلگىلى بولاتىنىن ايتتى.

ۆيتسە- ءمينيستردىڭ سوزىنشە، قىركۇيەك ايىندا قازاقستاندا جۇرگىزىلگەن اۋديتتەن كەيىن ا ق ش-تىڭ فەدەرالدىق ازاماتتىق اۆياتسيا باسقارماسى (FAA) تەكسەرىسىنىڭ الدىن الا ناتيجەلەرى وتە جاقسى بولعان.

- ءبىز جەلتوقسان ايىندا، وسى ماڭىزدى كەزدەسۋ قارساڭىندا رەسمي تۇردە ءبىرىنشى ساناتتى الامىز دەپ ويلايمىز، - دەدى تالعات لاستايەۆ.

قازىرگى ۋاقىتتا FAA-نىڭ قازاقستانعا قاتىستى بەكىتىلگەن رەيتينگى جوق. ۆەدومستۆو وكىلى FAA تەكسەرىستەردىڭ ەگجەي-تەگجەيىنە تۇسىنىكتەمە بەرمەيتىنىن مالىمدەدى.

ەل بيلىگى اۆياتسيا جۇيەسىنە ينۆەستيتسيا تارتۋ ارقىلى اۋە تاسىمالىن ارتتىرىپ، ەكونوميكاسىن ىلگەرىلەتۋگە نيەتتى.

تاسس: قازاقستان تاۋىق جۇمىرتقاسىن يمپورتتاۋعا تىيىم سالدى

قازاقستاننىڭ اۋىل شارۋاشىلىعى مينيسترلىگى ەل اۋماعىنا بارلىق ەلدەردەن، سونىڭ ىشىندە ەۋرازيالىق ەكونوميكالىق وداققا (ە ا ە و) مۇشە مەملەكەتتەردەن تاۋىق جۇمىرتقاسىن اكەلۋگە قايتادان تىيىم سالدى. ۆەدومستۆونىڭ بۇيرىعىنا سايكەس، شەكتەۋ ەكى اي بويى - 2027 -جىلدىڭ قاڭتار ايىنىڭ ورتاسىنا دەيىن كۇشىندە بولادى. جاڭالىقتى رەسەيلىك تاسس اگەنتتىگى جاريالادى.

مۇنداي تىيىم 2025 -جىلى جانە بيىل دا بىرنەشە رەت ەنگىزىلگەن بولاتىن. سوڭعى رەت يمپورتقا 2026 -جىلدىڭ ءساۋىر ايىندا تىيىم سالىنىپ، التى اي بويى قولدانىستا بولدى. شەكتەۋ وتاندىق وندىرۋشىلەردى قولداۋ ماقساتىندا جاسالىپتى.

Euronews: يادرولىق قارۋعا قارسى ونەر

Euronews سەمەي يادرولىق پوليگونىنان زارداپ شەككەن سۋرەتشى كارىپبەك كۇيىكوۆ تۋرالى ارنايى باعدارلاما دايىندادى. باعدارلامادا سۋرەتشىنىڭ ونەرى مەن انتيادرولىق قوزعالىسقا قاتىستى وي- پىكىرى كورسەتىلگەن.

جاقىندا سۋرەتشى كارىپبەك كۇيىكوۆ العاشقى ءومىرباياندىق كىتابىن جارىققا شىعاردى. ول بۇل ەڭبەكتى 35 جىل بۇرىن باستاعانىمەن، تەك جاقىندا اياقتاي العان. سۋرەتشى ەستەلىكتەرىن داۋىستىق حابارلاما رەتىندە جازىپ، ال رەداكتورلار سونىڭ نەگىزىندە قولجازبانى دايىنداپتى.

كىتاپتىڭ تۇساۋكەسەرىندە قولتاڭبا العىسى كەلگەندەردىڭ قاتارى كوپ بولدى. كۇيىكوۆ قالامدى تىسىنە قىستىرعان كۇيى ءار داناعا سابىرمەن قولتاڭبا قويىپ بەردى. جاسى ۇلعايعان سايىن وعان اياقپەن سۋرەت سالۋ جانە جازۋ قيىنداي ءتۇسىپ، بىرتىندەپ بۇل قابىلەتىنەن ايىرىلىپ بارادى. قازىر ول قىلقالامدى دا، قالامدى دا اۋزىنا تىستەپ ۇستايدى.

1989 -جىلى اقىن جانە قوعام قايراتكەرى ولجاس سۇلەيمەنوۆ «نيەۆادا - سەمەي» انتيادرولىق قوزعالىسىن قۇردى، كارىپبەك كۇيىكوۆ تە وسى قوزعالىسقا قوسىلعان بولاتىن.

ونىڭ انتيادرولىق تاقىرىپتاعى العاشقى كارتيناسى «العاشقى جارىلىس» دەپ اتالدى. وندا يادرولىق جارىلىس سوققىسىنىڭ استىندا قالعان كيىز ۇيدەگى وتباسى بەينەلەنگەن.

- جارىلىس تولقىنى كيىز ءۇيدى ۇشىرىپ اكەتەدى، ءبارى استاڭ-كەستەڭ بولادى. مەن سول جەردە تۇرعان ادامداردىڭ باسىنان نە وتكەنىن، يادرولىق سىناقتاردىڭ ولارعا قالاي اسەر ەتكەنىن كورسەتكىم كەلدى، - دەپ ءتۇسىندىردى سۋرەتشى.