Xinhua News: قازاقستان جاڭا اليانسقا باقىلاۋشى بولدى
قىتاي حالىق رەسپۋبليكاسىنىڭ حاڭجوۋ قالاسىندا ازيانىڭ مادەني مۇراسىن قورعاۋ اليانسى كەڭەسىنىڭ IV وتىرىسى ءوتتى. كەڭەس وتىرىسىنىڭ قورىتىندىسى بويىنشا قازاقستان ۇيىمعا باقىلاۋشى مەملەكەت مارتەبەسىن الدى. جاڭالىقتى قىتايلىق Xinhua News تاراتقان.
مادەنيەت جانە اقپارات ۆيتسە-ءمينيسترى ايبەك سىدىقوۆ ءوز سوزىندە قازاقستاننىڭ يۋنەسكو-مەن ورتاق جۇمىسى تۋرالى ايتىپ، اليانسپەن ىنتىماقتاستىقتى ءۇش باعىتتا دامىتۋدى ۇسىندى. ولار: ماماندار دايارلاۋ جانە تاجىريبە الماسۋ، سيفرلىق تەحنولوگيالار مەن جاساندى ينتەللەكت كومەگىمەن ەسكەرتكىشتەردى قاشىقتان باقىلاۋ، سونداي-اق ۇلى جىبەك جولى بويىنداعى نىسانداردا بىرلەسكەن ارحەولوگيالىق جانە عىلىمي زەرتتەۋلەر جۇرگىزۋ.
قازاقستان دەلەگاتسياسى IV ليانجۋ فورۋمىنىڭ اشىلۋىنا دا قاتىستى. فورۋمعا يۋنەسكو، يككروم، ALIPH جانە يبەرو-امەريكا مەملەكەتتەرىنىڭ ءبىلىم، عىلىم جانە مادەنيەت جونىندەگى ۇيىمىنىڭ وكىلدەرى جينالدى.
Report: جەڭىل اۆتوكولىك ءوندىرىسى 8 عا ارتتى
2026 -جىلعى قاڭتار- قىركۇيەك ايلارىندا قازاقستاندا 136548 جەڭىل اۆتوكولىك ءوندىرىلدى. بۇل وتكەن جىلدىڭ سايكەس كەزەڭىمەن سالىستىرعاندا 38 پايىزعا كوپ. اقپاراتتى Report جاريالادى.
قىركۇيەك ايىندا ەلدە 19377 جەڭىل اۆتوكولىك شىعارىلدى. ءوندىرىس كولەمى 2025 -جىلعى قىركۇيەكپەن سالىستىرعاندا 66,4 پايىزعا، ال بيىلعى تامىزبەن سالىستىرعاندا 35,5 پايىزعا ءوستى.
قازاقستاندا اۆتوكولىك وندىرۋمەن 12 كاسىپورىن اينالىسادى. جەڭىل اۆتوكولىك ءوندىرىسىنىڭ نەگىزگى بولىگى الماتى قالاسى مەن قوستاناي وبلىسىنا تيەسىلى. ولاردىڭ ۇلەسى تيىسىنشە 50,5 پايىز جانە 49,5 پايىزدى قۇرايدى.
2026 -جىلدىڭ العاشقى توعىز ايىندا «اۆتوكولىكتەر، تىركەمەلەر جانە جارتىلاي تىركەمەلەر» ساناتىنداعى ونەركاسىپ ءونىمىنىڭ كولەمى اقشالاي ماندە 1,67 تريلليون تەڭگەگە جەتتى. وسى سانات بويىنشا ونەركاسىپ ءوندىرىسىنىڭ يندەكسى وتكەن جىلدىڭ سايكەس كەزەڭىمەن سالىستىرعاندا 129,9 پايىزدى قۇرادى.
The Times of Central Asia: اسكەري رەفورما جوسپارى تانىستىرىلدى
كاسپيي تەڭىزىندەگى اسكەري وقۋ- جاتتىعۋ كەزىندە ورىن العان قايعىلى وقيعادان كەيىن قازاقستان رەفورماعا بەت بۇردى. جاقىندا پرەزيدەنت قاسىم-جومارت توقايەۆ قاۋىپسىزدىك كەڭەسىنىڭ وتىرىسىنا قاتىسىپ، جاڭا رەفورما جوسپارىنىڭ جوباسىمەن تانىستى. اقپاراتتى The Times of Central Asia بولىسكەن.
رەفوما قىسقا مەرزىم ىشىندە زاماناۋي، ۇتقىر جانە تەحنولوگيالىق تۇرعىدان دامىعان ارميا قۇرۋعا باعىتتالىپ وتىر. بولاشاقتا مەرزىمدى اسكەري قىزمەت ەكى كەزەڭنەن تۇرماق. اسكەرگە شاقىرىلعاندار العاشقى التى ايدا وقۋ ورتالىقتارىندا دايارلىقتان وتەدى. كەيىنگى التى ايدا تىكەلەي اسكەري بولىمدەردە قىزمەت ەتەدى. بۇل كەزەڭدە جاۋىنگەرلىك دايارلىققا جانە بولىمشەلەر قۇرامىندا مىندەتتەردى ورىنداۋعا باسىمدىق بەرىلەدى.
سونداي-اق رەفورما اياسىندا قارۋلى كۇشتەردىڭ قۇرىلىمى مەن قۇرامى، باسقارۋ جانە قورعانىستى جوسپارلاۋ جۇيەسى جەتىلدىرىلەدى. جاقىن ارادا ۇشقىشسىز كۇشتەردى قۇرۋ جوسپارلانعان.
Jiji Press: شۆەيتساريادا قازاقستاننىڭ مادەني-ىسكەرلىك ورتالىعى اشىلدى
21 قازاندا شۆەيتساريانىڭ شاففحاۋزەن قالاسىندا شۆەيتساريا- قازاقستان مادەني-ىسكەرلىك ورتالىعى اشىلدى. ورتالىق Eurasia Group كومپانياسىنىڭ باستاماسىمەن جانە قازاقستان رەسپۋبليكاسىنىڭ شۆەيتسارياداعى ەلشىلىگىنىڭ قولداۋىمەن قۇرىلدى.
Jiji Press- تىڭ جازۋىنشا، ورتالىقتىڭ نەگىزگى باعىتىنىڭ ءبىرى قازاقستاندىق ونىمدەردى شۆەيتساريا جانە باسقا دا حالىقارالىق نارىقتارعا شىعارۋ بولماق. اتاپ ايتقاندا، مەتاللۋرگيا، اگروونەركاسىپ، تاماق جانە حيميا ونەركاسىبى ونىمدەرىن ىلگەرىلەتۋگە باسىمدىق بەرىلەدى. قازاقستاندىق وندىرۋشىلەر مەن شەتەلدىك يمپورتتاۋشىلار جانە ساۋدا جەلىلەرى اراسىندا تىكەلەي ىسكەرلىك بايلانىستار ورناتىلادى.
ينۆەستيتسيالىق ىنتىماقتاستىقپەن قاتار قازاقستاننىڭ تاريحي-مادەني ەرەكشەلىگىن ناسيحاتتاۋ دا نازاردا بولادى.
Euronews: سۋرەتشى گۇلنۇر مۇقاجانوۆا لوندونداعى «بوساعانى» تانىستىردى
قازاقستاندىق سۋرەتشى گۇلنۇر مۇقاجانوۆا Frieze London 2026 كورمەسىندە «بوساعا» اتتى توقىما سەرياسىن ۇسىندى. اۆتور ماتا ارقىلى ۇلتتىق تانىمدى، بولاشاق مەجەنى ءدال سۋرەتتەي بىلگەن. وسى ورايدا Euronews تەلەارناسى ونەر يەسى تۋرالى ارنايى باعدارلاما ازىرلەدى.
Frieze London الەمدەگى ەڭ ىقپالدى جارمەڭكە سانالادى. بيىل شاراعا قازاقستاننىڭ تۋماسى، بەرليندە تۇراتىن سۋرەتشى گۇلنۇر مۇقاجانوۆا قاتىستى. سۋرەتشى 2021 -جىلى «بوساعا: مادەنيەت پەن ۋاقىت شەڭبەرىندەگى ساياحات» اتتى جوباسىن باستاعان. بۇل جولى «بوساعا» اتتى ۇزدىك ءتريپتيحىن كورەرمەنگە ۇسىنۋعا مۇمكىندىك العان.