تولىعىراق Kazinform ءتىلشىسىنىڭ شولۋىنان وقىڭىز.
Anadolu: ورتالىق ازيا مەن ازەربايجان ساۋداسىن $20 ميللياردقا جەتكىزۋ ۇسىنىلدى
قاسىم-جومارت توقايەۆ ورتالىق ازيا ەلدەرى مەن ازەربايجاننىڭ ءوزارا ساۋدا كولەمىن قازىرگى 13 ميلليارد دوللاردان 20 ميلليارد دوللارعا دەيىن ۇلعايتۋ بويىنشا بىرلەسكەن ءىس-قيمىل جوسپارىن ازىرلەۋدى ۇسىندى. بۇل تۋرالى مەملەكەت باسشىسى تۇرىكمەنستاندا وتكەن ورتالىق ازيا ەلدەرى مەن ازەربايجان كوشباسشىلارىنىڭ VIII كونسۋلتاتيۆتىك كەزدەسۋىندە مالىمدەگەن.
Anadolu اگەنتتىگىنىڭ جازۋىنشا، قاسىم- جومارت توقايەۆ شەكارا ماڭىنداعى ايماقتاردا قۇرىلىپ جاتقان ساۋدا-لوگيستيكالىق كەشەندەر مەن ونەركاسىپتىك كووپەراتسيا ورتالىقتارىنىڭ جۇمىسىنا ءمان بەردى. سونىڭ ىشىندە كولىك ينفراقۇرىلىمىن دامىتۋعا جانە ءوڭىردىڭ ترانزيتتىك الەۋەتىن نىعايتۋعا ەرەكشە نازار اۋدارعان.
دۇنيەجۇزىلىك بانكتىڭ باعالاۋى بويىنشا، جوسپارلانعان ينفراقۇرىلىمدىق جوبالار ىسكە اسىرىلعان جاعدايدا، كاسپي تەڭىزى ارقىلى وتەتىن جۇك تاسىمالىنىڭ كولەمى 2040-جىلعا قاراي ءتورت ەسەگە ارتۋى مۇمكىن. وسىعان بايلانىستى قازاقستان پرەزيدەنتى ورتا ءدالىزدى TRIPP كولىك باستاماسىمەن ينتەگراتسيالاۋدى ۇسىندى.
BBC: التىن وردا مۇراگەرى
پرەزيدەنت قاسىم-جومارت توقايەۆتىڭ باسشىلىعىمەن قازاقستان ءوز تاريحىن دەربەس زەردەلەۋ ناۋقانىن باستادى. ەل ىشىندە دە، حالىقارالىق دەڭگەيدە دە قازاقستان مەملەكەتى التىن وردانىڭ مۇراگەرى رەتىندە ۇسىنىلۋدا. جاڭا تاريحي كوزقاراس - توقايەۆتىڭ قازاقستاندى الەمدىك ارەنادا ىقپالدى ورتا دەرجاۆا رەتىندە ناسيحاتتايتىن سىرتقى ساياساتىنىڭ ءبىر بولىگى. وسى ورايدا BBC سايتى تاقىرىپقا قاتىستى اۋقىمدى ماقالا جاريالاعان.
قاسىم-جومارت توقايەۆ 2019-جىلى پرەزيدەنت بولعاننان كەيىن التىن وردانىڭ تاريحىن زەرتتەۋدى بەلسەندى تۇردە قولداي باستادى. ول 2021-جىلى جوشى ۇلىسىن زەرتتەيتىن ينستيتۋت قۇرۋعا باستاماشى بولدى ءارى ورتالىق قازاقستانداعى شىڭعىس حاننىڭ ۇلى جوشى حان كەسەنەسىن قالپىنا كەلتىرۋدى تاپسىردى. جاقىندا جارىق كورگەن قازاقستاننىڭ جەتى تومدىق تاريحىندا 1465-جىلى قۇرىلعان قازاق حاندىعىنىڭ باستاۋى رەتىندە التىن وردانىڭ تاريحى جان-جاقتى باياندالعان.
ت ا س س: 16 جاسقا دەيىن الەۋمەتتىك جەلىگە تىيىم سالىنباقشى
قۇرىلتايدىڭ رەسمي سايتىندا ولجاس بەكتەنوۆتىڭ بالالاردى الەۋمەتتىك جەلىلەردە تىركەۋدى شەكتەۋ جانە تسيفرلىق ورتادا ولاردىڭ قاۋىپسىزدىگىن قامتاماسىز ەتۋ تۋرالى دەپۋتاتتىق ساۋالعا جاۋابى جاريالاندى. ونىڭ سوزىنشە، ۇكىمەت قولدانىستاعى زاڭعا 16 جاسقا دەيىنگى پايدالانۋشىلاردى ونلاين-پلاتفورمالاردا تىركەۋدى رەتتەۋگە بايلانىستى تۇزەتۋلەر ازىرلەگەن. پرەمەر-مينيستر ءسوزىن رەسەيلىك ت ا س س اگەنتتىگى تاراتتى.
بۇل تۇزەتۋلەر قۇرىلتاي قاراۋىندا. الدىن الا اقپارات بويىنشا، شەكتەۋ تەحنولوگيالىق مۇمكىندىكتەر ارقىلى قاداعالاناتىن بولادى. ياعني Face ID- گە ۇقساس بەت-الپەتتى تانۋ تەحنولوگياسى، قارالاتىن كونتەنت، جازىلىمدار، قاۋىمداستىقتار، اككاۋنتتىڭ بەلسەندىلىگى جانە وزگە دە مىنەز-قۇلىق بەلگىلەرى ەسەپكە الىنادى.
- جاڭا تالاپتاردىڭ ساپالى ورىندالۋىن قامتاماسىز ەتۋ ماقساتىندا اتالعان نورمانى قولدانىسقا ەنگىزۋ ءۇشىن وتپەلى كەزەڭ كوزدەلەدى. 16 جاسقا دەيىنگى ونلاين-پلاتفورمانى پايدالانۋشىلاردىڭ قولدانىستاعى اككاۋنتتارىن ۋاقىتشا توقتاتۋ قارالاتىن بولادى، - دەلىنگەن و. بەكتەنوۆتىڭ جاۋابىندا.
JIJI PRESS: قازاقستاندا 2028-جىلى اەروتاكسي ىسكە قوسىلادى
قازاقستاندا 2028-جىلى اۋە تاكسيىنىڭ كوممەرتسيالىق ساپارى باستالادى. بۇل تۋرالى ۇكىمەت وتىرىسىندا پرەمەر-ءمينيسترىنىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ مالىمدەگەن. لاۋازىمدى تۇلعا ءسوزىن جاپوندىق Jiji Press حابارلادى.
ماديەۆتىڭ ايتۋىنشا، پيلوتتىق جوبا استانا، الماتى جانە قوسشى قالالارىندا ىسكە اسىرىلىپ جاتىر. ال الماتىدا درونمەن جەتكىزۋ پيلوتتىق قىزمەتى دە ىسكە قوسىلدى. جوباعا جاۋاپتى AutoFlight كومپانياسى العاشقى اەروتاكسيدى 19-مامىردا الاتاۋدا ۇشىردى، كەيىن 24-شىلدەدە استانادا قايتالاعان.
The Times of Central Asia: يادرولىق جانە رادياتسيالىق وقيعالارعا جەدەل دەن قويۋ ورتالىعى اشىلدى
قازاقستاندا يادرولىق جانە رادياتسيالىق وقيعالارعا جەدەل مونيتورينگ جۇرگىزۋ جانە ارەكەت ەتۋ ورتالىعى اشىلدى. اتوم ەنەرگياسى اگەنتتىگىنىڭ حابارلاۋىنشا، اتالعان ورتالىق اقش ەنەرگەتيكا مينيسترلىگىنىڭ يادرولىق قاۋىپسىزدىك جونىندەگى ۇلتتىق اكىمشىلىگىنىڭ (DOE/NNSA) قولداۋىمەن قۇرىلعان. جاڭالىقتى The Times of Central Asia جازدى.
ورتالىقتىڭ نەگىزگى مىندەتى - رادياتسيالىق جاعدايدى مونيتورينگتەۋ جانە تالداۋ، جەدەل اقپارات الماسۋ، سونداي-اق يادرولىق جانە رادياتسيالىق وقيعالار تۋىنداعان كەزدە ءىس-قيمىلداردى ۇيلەستىرۋ. ورتالىق جەدەل ءارى نەگىزدەلگەن شەشىم قابىلداۋ ءۇشىن قاجەتتى اقپاراتتى ۋاقتىلى الۋعا مۇمكىندىك بەرەدى.
اتوم ەنەرگەتيكاسى ەلدە دامىعان سايىن توتەنشە جاعدايعا دايىندىق ارتا ءتۇستى. ويتكەنى 2024-جىلعى رەفەرەندۋمدا داۋىس بەرگەندەردىڭ 71,12 پايىزى اتوم ەلەكتر ستانسياسىنىڭ قۇرىلىسىن قولدادى. سودان بەرى بيلىك ەكىنشى جانە ءۇشىنشى ستانسيالاردىڭ قۇرىلىسىنا دايىندىقتى باستاپ كەتتى.