الىبەك قۋانتىروۆ: قىتاي ەكونوميكاسىن 20-30 جىلدا قۋىپ جەتۋگە بولادى

ۇلتتىق ەكونوميكا ءمينيسترى الىبەك قۋانتىروۆ ءماجىلىس وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا قازاقستان دامىعان 30 ەلدىڭ قاتارىنا كىرۋگە قاۋقارلى ەكەنىن ايتتى.

«قازاقستان قىتاي سياقتى ەلدەردەن ەكونوميكانىڭ دامۋى جونىنەن نەشە جىلعا ارتتا قالىپ كەلەدى؟ ەۋروپانىڭ دامىعان ەلدەرىنە قاشان جەتەمىز؟»، - دەپ سۇرادى ب ا ق وكىلى مينيستردەن.

الىبەك قۋانتىروۆ وڭتۇستىكتەگى كورشى ەلدىڭ ەكونوميكاسى نەلىكتەن قارقىندى دامىپ جاتقانى تۋرالى پايىمىن ايتتى.

«قۋىپ جەتۋىمىز مۇمكىن. ءبىراق ونى سەرپىندى جاساۋىمىز كەرەك. مىسالى، قىتايدا 1,5 ميلليارد ادام بار. قازاقستان حالقىنان سانى نەشە ەسە كوپ ەكەنىن سالىستىرىپ كورىڭىز. ارينە، ول جەردە ادامي كاپيتال بار. ونىڭ دا رەسۋرستارى بار. ەڭ باستىسى، ءبىزدىڭ قيىنشىلىعىمىز - اشىق تەڭىزگە جول جوق. ول بىزگە قوسىمشا شىعىندار اكەلەدى. ال قىتايدا اشىق تەڭىزگە جول بار»، - دەيدى مينيستر.

ۆەدومستۆو باسشىسى قىتاي ەكونوميكاسى مەن قازاقستان ەكونوميكاسىنىڭ اراسىنداعى دامۋ الشاقتىعىن 30 جىلدا ەڭسەرۋگە بولادى دەپ ەسەپتەيتىنىن ايتادى.

«قانشا جىلعا ارتتا قالعانىن ەسەپتەۋ كەرەك. 20-30 جىلدا جەتۋگە بولادى. سەبەبى الدىمىزعا دامىعان 30 ەلدىڭ قاتارىنا ەنۋ تۋرالى ماقسات قويىپ وتىرمىز عوي. مەنىڭ پىكىرىمشە، ول مۇمكىن»، - دەدى الىبەك قۋانتىروۆ.