ساۋد ارابياسىنداعى دجيددا-تاۋەر مەن ب ا ءا- دەگى بۋردج-ازيزي مۇنارالارىنىڭ قۇرىلىسى اياقتالعان سوڭ، الەمدەگى ەڭ بيىك عيماراتتار رەيتينگىندە تيىسىنشە ءبىرىنشى جانە ءۇشىنشى ورىنعا جايعاسۋى مۇمكىن. ولار دۋبايداعى بۋردج-حاليفامەن بىرگە الەمدەگى ەڭ بيىك ءۇش عيماراتتىڭ قاتارىنا ەنەدى، دەپ حابارلايدى Arabian Business.
قىزىل تەڭىز جاعالاۋىندا سالىنىپ جاتقان ساۋد ارابياسىنداعى دجيددا-تاۋەر مۇناراسىنىڭ بيىكتىگى ءبىر شاقىرىمنان اسادى دەپ جوسپارلانعان.
قۇرىلىستى 2028-جىلدىڭ سوڭىندا اياقتاۋ كوزدەلىپ وتىر. بۇعان دەيىن جوبا بىرنەشە رەت كەيىنگە شەگەرىلىپ، قۇرىلىس بىرنەشە جىل بويى توقتاپ تۇرعان.
جوبا تولىق جۇزەگە اسسا، بيىكتىگى 1000 مەتردەن اساتىن دجيددا-تاۋەر الەمدەگى ەڭ بيىك عيمارات اتانادى. وسىلايشا 2010-جىلدان بەرى 828 مەترلىك بيىكتىگىمەن الەمدىك رەكوردتى ساقتاپ كەلە جاتقان دۋبايداعى بۋردج-حاليفادان دا وزادى.
Saudi Binladin Group جوباسىنىڭ اعا اتقارۋشى ديرەكتورى يەن نورمان ميللەردىڭ ايتۋىنشا، دجيددا-تاۋەر مۇناراسىنىڭ قۇرىلىسى 118 قاباتقا دەيىن جەتىپ، بيىكتىگى شامامەن 474 مەتر بولعان. بۇل الەمدەگى ەڭ بيىك تۇرعىن ءۇي سانالاتىن نيۋ-يوركتەگى Central Park Tower عيماراتىنىڭ بيىكتىگىمەن شامالاس.
قازىر مۇنارانىڭ قۇرىلىسى ءجۇرىپ جاتىر. جوبا بويىنشا ول 157 قاباتتان تۇرادى.
مۇنارادا Four Seasons قوناق ءۇيى، ەليتالىق تۇرعىن ۇيلەر، كەڭسەلەر جانە جوبانى ازىرلەۋشىلەردىڭ ايتۋىنشا، الەمدەگى ەڭ بيىك شولۋ الاڭى ورنالاسادى. ءزاۋلىم عيمارات «دجيددا ەكونوميكالىق قالاسى» جوباسىنىڭ ساۋلەتتىك سيمۆولى بولماق.
دجيددا-تاۋەر مۇناراسىنىڭ جوباسىن امەريكالىق Adrian Smith Gordon Gill Architecture ساۋلەت بيۋروسى ازىرلەگەن. Newsweek باسىلىمىنىڭ جازۋىنشا، جوبانىڭ اۆتورلارىنىڭ ءبىرى - دۋبايداعى بۋردج-حاليفا مۇناراسىن دا جوبالاعان ساۋلەتشى ادريان سميت.
دجيددا-تاۋەر مۇناراسىنىڭ ءپىشىنى جاس پالما جاپىراقتارىنىڭ شوعىرىن ەسكە تۇسىرەدى. ال قاسبەتىندەگى ويىقتار كولەڭكە ءتۇسىرىپ، نىساننىڭ قىزۋىن ازايتادى.
بولاشاقتا الەمدەگى ەڭ بيىك ءۇش عيماراتتىڭ قاتارىنا ەنۋى مۇمكىن ەكىنشى نىسان - دۋبايداعى شەيح زايد كوشەسىندە سالىنىپ جاتقان بۋردج-ازيزي مۇناراسى. ونىڭ جوبالىق بيىكتىگى - 725 مەتر.
Azizi Developments كومپانياسى مۇنارا قۇرىلىسىن 2028-جىلى اياقتاۋدى كوزدەپ وتىر. الايدا جوبا ازىرگە باستاپقى كەزەڭدە.
قازىر نەگىزگى قۇرىلىس ۇدەرىسى ىرگەتاس پليتاسى مەن توعىز دەڭگەيلى جەراستى اۆتوتۇراعىنا باعىتتالعان.
بۋردج-ازيزي مۇناراسىندا تۇرعىن ۇيلەر، قوناق ءۇي، ساۋدا ورىندارى، مەيرامحانالار مەن شولۋ الاڭى ورنالاسادى. جوباداعى بيىكتىگىنە جەتسە، ول دجيددا-تاۋەر مەن بۋردج-حاليفادان كەيىنگى الەمدەگى ءۇشىنشى بيىك عيمارات اتانباق.
قازىرگى تاڭدا الەمدەگى ەڭ بيىك عيماراتتار رەيتينگىندە كۋالا-لۋمپۋرداعى بيىكتىگى 679 مەترلىك مەردەكا-118 ەكىنشى، ال شاڭحايداعى 632 مەترلىك مۇنارا ءۇشىنشى ورىندا تۇر.
پارسى شىعاناعى ەلدەرىندەگى ەكى جوبانىڭ قۇرىلىسى اياقتالىپ، مۇنارالار جوسپارلانعان بيىكتىككە جەتسە، مەردەكا-118 مەن شاڭحاي مۇناراسى الەمدەگى ەڭ بيىك ءۇش عيماراتتىڭ قاتارىنان شىعادى.
بۇعان دەيىن گرۋزيادا ەڭ بيىك ءزاۋلىم عيماراتتىڭ جوباسى تانىستىرىلعانى حابارلانعان بولاتىن.