الەمدەگى ەڭ باقىتتى ەلدەر رەيتينگى جاريالاندى

استانا. قازاقپارات - فينليانديا، يسلانديا جانە دانيا ەڭ باقىتتى ەلدەر رەيتينگىندە كوش باستادى.

Фото: depositphotos.com

زەرتتەۋدە تۇرعىنداردىڭ تابىسى مەن ءومىر ءسۇرۋ دەڭگەيىنەن بولەك، شەشىم قابىلداۋ ەركىندىگى، قاۋىپسىزدىگى جانە پاسپورتىنىڭ مۇمكىندىكتەرى دە ەسكەرىلگەن، دەپ حابارلايدى Massaget.kz.

Global Citizen Solutions مالىمەتىنشە، رەيتينگتىڭ العاشقى بەس ورنىنا ەۋروپا ەلدەرى جايعاسقان.

ءبىرىنشى ورىندى 7,764 ۇپايمەن فينليانديا يەلەندى. ەل ءومىر ساپاسى بويىنشا جوعارى باعا الىپ، ىشكى ەركىندىك پەن حالىقارالىق ءجۇرىپ-تۇرۋ مۇمكىندىگى بويىنشا ەكىنشى ورىنعا شىققان.

ەكىنشى ورىندا - يسلانديا. ول ەل ىشىندەگى ەركىندىك دەڭگەيى بويىنشا كوش باستاپ، الەمدەگى ەڭ بەيبىت مەملەكەت دەپ تانىلعان. الايدا پاسپورتتىڭ مۇمكىندىكتەرى بويىنشا 20-ورىندا تۇر.

ءۇشىنشى ورىنعا دانيا تۇراقتادى. بۇل ەل زەرتتەۋدىڭ ءتورت كورسەتكىشى بويىنشا دا ۇزدىك تورتتىككە ەنگەن. ءومىر ساپاسى جاعىنان ءۇشىنشى، ازاماتتىق بوستاندىقتار دەڭگەيى بويىنشا ەكىنشى ورىن العان.

ءتورتىنشى ورىندى شۆەيتساريا يەلەندى. ول ءال-اۋقات، دەنساۋلىق جانە قاۋىپسىزدىك كورسەتكىشتەرى بويىنشا ەكىنشى، ال جان باسىنا شاققانداعى تابىس بويىنشا ءۇشىنشى ورىنعا شىققان.

ۇزدىك بەستىكتى نورۆەگيا تۇيىندەدى.

العاشقى وندىققا شۆەتسيا، نيدەرلاند، جاڭا زەلانديا، اۋستريا جانە سينگاپۋر ەنگەن. وسىلايشا، ۇزدىك ون ەلدىڭ تەك ەكەۋى عانا ەۋروپادان تىس جەردە ورنالاسقان.

رەيتينگتىڭ سوڭعى بەس ساتىسىندا مىنا مەملەكەتتەر تۇر:

گرۋزيا - 46-ورىن؛

تۇركيا - 47-ورىن؛

وڭتۇستىك افريكا رەسپۋبليكاسى - 48-ورىن؛

كەنيا - 49-ورىن؛

ماروككو - 50-ورىن.

زەرتتەۋ الەمنىڭ التى وڭىرىندەگى 50 ەلدى عانا قامتىعان. قازاقستان مەن ورتالىق ازيانىڭ وزگە مەملەكەتتەرى رەيتينگكە كىرمەگەن.

Happy Passports Index 2026 رەيتينگىن Global Citizen Solutions ساراپشىلارى ازىرلەگەن. ولار تۇرعىنداردىڭ ومىرىنە قانشالىقتى كوڭىلى تولاتىنىن عانا ەمەس، ەل ىشىندە جانە شەتەلدە قانداي مۇمكىندىكتەرى بار ەكەنىن دە باعالاعان.

زەرتتەۋ ءتورت نەگىزگى كورسەتكىشكە سۇيەنگەن. ءارقايسىسىنىڭ قورىتىندى باعاداعى ۇلەسى بىردەي - 25 پايىز:

تۇرعىنداردىڭ ومىرىنە قاناعاتتانۋى. ساراپشىلار 2026-جىلعى دۇنيەجۇزىلىك باقىت تۋرالى بايانداماداعى 0 دەن 10 عا دەيىنگى شكالا بويىنشا قويىلعان باعالاردى پايدالانعان.

ەل ىشىندەگى ەركىندىك. تۇرعىنداردىڭ شەشىم قابىلداۋ، پىكىر ءبىلدىرۋ، ءومىر سالتىن تاڭداۋ جانە ازاماتتىق قۇقىقتارىن پايدالانۋ مۇمكىندىكتەرى ەسكەرىلگەن.

حالىقارالىق ءجۇرىپ-تۇرۋ مۇمكىندىگى. پاسپورتپەن قانداي ەلدەرگە كىرۋگە بولاتىنى جانە سول مەملەكەتتەردىڭ ءومىر سۇرۋگە قانشالىقتى قولايلى ەكەنى باعالانعان.

ءال-اۋقات، دەنساۋلىق جانە قاۋىپسىزدىك. جان باسىنا شاققانداعى تابىس، سالاۋاتتى ءومىر ءسۇرۋدىڭ كۇتىلەتىن ۇزاقتىعى جانە ەلدىڭ بەيبىتشىلىك دەڭگەيى ەسەپكە الىنعان.

ءار كورسەتكىش بويىنشا ەلدەر زەرتتەۋگە قاتىسقان وزگە مەملەكەتتەرمەن سالىستىرىلىپ، 0 دەن 100 گە دەيىن ۇپاي العان. كەيىن ءتورت ساناتتىڭ باعاسى تەڭ ۇلەسپەن بىرىكتىرىلىپ، قورىتىندى ناتيجە شىعارىلعان.