پاۆلودارلىق پوليتسەيلەر ءيىسشىل يتتەردىڭ كومەگىمەن 80 قىلمىستى ءىزىن سۋىتپاي اشتى
پاۆلودار. KAZINFORM - وڭىردەگى 25 قىلمىستىق وقيعا ەسىرتكىگە قاتىستى بولعان. ءيىسشىل يتتەر قىلمىسكەرلەردى ۇستاپ قانا قويماي، قارۋ-جاراق پەن ەسىرتكى قويمالارىن ىزدەپ تاپقان.
پاۆلودار وبلىسى پوليتسيا دەپارتامەنتىنىڭ كينولوگيالىق قىزمەت ورتالىعى قىلمىسقا قارسى كۇرەستە قىزمەتتىك-ىزدەستىرۋ يتتەرىن ساۋاتتى جانە بارىنشا ءتيىمدى پايدالانىپ وتىر. قىزمەتتىك يتتەر قوعامدىق ءتارتىپتىڭ ساقتالۋىنا قاتىسىپ، قىلمىسكەرلەردى ۇستاۋ، قارۋ-جاراق پەن ەسىرتكى قويمالارىن ىزدەۋ ءىس-شارالارىنا جۇمىلدىرىلادى.
«قازىرگى ۋاقىتتا ورتالىقتا 28 ءيىسشىل يت قىزمەت اتقارادى. ءار ءيتتىڭ ءوز مىندەتى بار. اقىلدى جانۋارلار ىزدەستىرۋ جۇمىستارىنان بولەك، ەسىرتكى، جارىلعىش زاتتاردى ىزدەۋگە ماماندانعان، پوليتسەيلەرمەن بىرگە وبلىس ورتالىعىنىڭ كوشەلەرىن پاترۋلدەيدى. كۇن سايىن پوليتسياعا ءتۇرلى شاقىرۋلار كەلىپ تۇسەدى. كوبى ۇرلىق، توناۋ، ادامداردىڭ جوعالۋىنا قاتىستى. ءبىزدىڭ قىزمەتكەرلەر دەرەۋ وقيعا ورنىنا بارىپ، ءيىسشىل يتتەرمەن قىلمىسكەردى جەدەل تابۋعا تىرىسادى. ولار دا ادام سياقتى ءبارىن سەزەدى، ءوزىنىڭ قىزمەتتىك مىندەتىن تولىقتاي ورىنداعانشا كادىمگىدەي ۋايىمعا سالىنادى»، - دەيدى كينولوگيالىق قىزمەت ورتالىعىنىڭ باستىعى نياز ۆاليەۆ.
جىل باسىنان قىزمەتتىك يتتەردى پايدالانا وتىرىپ، 80 قىلمىس اشىلعان. ونىڭ ىشىندە 25 وقيعا ەسىرتكى جەلىسىنە قاتىستى بولعان. مىسالى، مەتەل ەسىمدى باتىل كومەكشى ەسىرتكىنى كەز كەلگەن جەردەن تابا الادى.
مامانداردىڭ ايتۋىنشا، ەگەر ادام يتتەردى شىنىمەن ۇناتپاسا، ولارمەن تولىق جۇمىس ىستەي المايدى. جانۋارلاردى كوماندالاردى ورىنداۋعا ۇيرەتە العانىمەن اراسىندا بايلانىس بولمايدى. ال كينولوگ پەن يت - ءبىر كوماندا. ولار ءبىر- ءبىرىن ءتۇسىنىپ، سەزىنۋى كەرەك.