پاۆلودارلىق تۇرعىننىڭ موينىنداعى قارىزى ءمىنىپ جۇرگەن كولىگىنىڭ قۇنىنان اسىپ ءتۇستى
پاۆلودار. KAZINFORM - پاۆلوداردا قارجى ۇيىمدارىنىڭ الدىندا 52 ميلليون تەڭگەگە جۋىق قارىزى بار كولىك جۇرگىزۋشىسى ۇستالدى.
بورىشكەر تىزگىندەپ جۇرگەن Mitsubishi Outlander كولىگىن پوليتسەيلەر ايىپ تۇراعىنا قويدى.
«قۇقىقتىق ءتارتىپ» جەدەل-پروفيلاكتيكالىق ءىس-شاراسى بارىسىندا پاۆلودار قالاسىنداعى «كيبەرشەريف» موبيلدى كەشەنى جەكە سوت ورىنداۋشىسىمەن بىرلەسىپ Mitsubishi Outlander اۆتوكولىگىن توقتاتقان.
«مالىمەتتەر بازاسىن تەكسەرۋ كەزىندە بۇل كولىكتىڭ يەسىنىڭ موينىندا 52 ميلليون تەڭگەگە جۋىق قارىزى بار ەكەنى انىقتالدى. ازامات جول-كولىك ەرەجەلەرىن بۇزعانى ءۇشىن ايىپپۇلداردى، اقىلى جول جانە سالىق تولەمدەرىن ۇزاق ۋاقىت تولەمەي كەلگەن. بۇعان قوسا جەكە سوت ورىنداۋشىلارىنىڭ وزگە دە وندىرە الماي جۇرگەن بورىشتارى بار بولىپ شىقتى. پوليتسەيلەر كولىكتى مامانداندىرىلعان ايىپ تۇراعىنا ورنالاستىردى، يەسى ايىپپۇلدار مەن وزگە دە قارىزدارىن تولىق تولەنگەنشە سول جەردە ساقتالادى»، - دەپ حابارلادى پاۆلودار وبلىسى پوليتسيا دەپارتامەنتىنىڭ باسپا ءسوز قىزمەتىنەن.
اۆتور
مۇرات اياعان