پاۆلودارلىق سپورت ۇيىمدارى ميلليونداعان قاراجاتتى ءتيىمسىز پايدالانعان - انتيكور

پاۆلودار. KAZINFORM - پاۆلودارلىق سپورت مەكتەبى ۇستەل تەننيسىنە قاجەت 45 جابدىقتى ساتىپ الۋعا بولاتىن قاراجاتقا نەبارى 6 ۇستەلدى جالداپ كەلگەن. وڭىردەگى سپورت سالاسىنان جالپى سانى 15 جەمقورلىق تاۋەكەلى انىقتالعان.

بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگىنىڭ وڭىرلىك دەپارتامەنتىنەن حابارلادى.

«وبلىستىق انتيكور سپورت سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى. تالداۋ بارىسىندا سپورت باسقارماسى مەن وعان باعىنىستى سپورت مەكەمەلەرى تەكسەرىلدى. ناتيجەسىندە بيۋدجەت قاراجاتىن ءتيىمسىز پايدالانۋ فاكتىلەرى انىقتالدى. كاسىبي كلۋبتاردى قارجىلاندىرۋ كەزىندە، سپورت نىساندارى مەن جابدىقتارىن جالداۋدا قارجىلىق زاڭ بۇزۋشىلىقتارعا جول بەرىلگەن. بۇعان قوسا سپورت رازريادتارىن بەرۋ، جۇلدەلى ورىن العانى ءۇشىن تولەنەتىن سىياقى بويىنشا كەمشىلىكتەر، اقشا جيناۋ، جالعان ديپلوممەن جۇمىسقا تۇرۋ سياقتى زاڭ بۇزۋشىلىقتار تىركەلدى»، - دەپ حابارلادى دەپارتامەنتتەن.

مىسال ءۇشىن اقسۋ قالاسىنداعى №2 بالالار- جاسوسپىرىمدەر سپورت مەكتەبى «DAAB GROUP» ج ش س- مەن 2022 -جىلدان بەرى جىل سايىن 6 ۇستەل تەننيسىن جالعا الۋ تۋرالى شارت جاساسىپ كەلگەن. ول ءۇشىن جىل سايىن 18 ميلليون تەڭگە جۇمسالعان. الايدا تالداۋ كورسەتكەندەي، ءبىر ۇستەل تەننيسىنىڭ جيىنتىعى - 200-400 مىڭ تەڭگە تۇرادى. الگى قاراجاتقا سپورت مەكتەبى ۇستەل تەننيسىنىڭ كەم دەگەندە 45 جيىنتىعىن ساتىپ الۋىنا بولاتىن ەدى. مەكەمە وسىلايشا قاتارىنان بىرنەشە جىل بيۋدجەت قاراجاتىن ىسىراپ ەتىپ كەلگەن.

تاعى ءبىر مىسال، «بىرلىك» سپورت كلۋبى سەگىز سپورتشىنىڭ جولساپار شىعىندارىنا جارتى ميلليون تەڭگەدەن استام قاراجات بولگەن. ءبىراق ولاردىڭ سپورتتىق جيىنعا قاتىسپاعانى بەلگىلى بولدى.

جالپى سىرتقى تالداۋ ناتيجەسى سپورت سالاسىنان 15 جەمقورلىق تاۋەكەلىن انىقتادى.

ەسكە سالا كەتەيىك، انتيكور پاۆلودارلىق كاسىپكەرلەردىڭ 160 ميلليون تەڭگەدەن استام قاراجاتقا شىعىندالۋىنا جول بەرمەدى.

اۆتور

مۇرات اياعان