پاۆلودارلىق ستۋدەنتتەر NASA وتكىزەتىن الەمدىك كونكۋرسقا قاتىسادى

پاۆلودار. KAZINFORM - پاۆلودارداعى اقپاراتتىق تەحنولوگيالار كوللەدجىنىڭ ستۋدەنتتەرى ا ق ش- تىڭ NASA عارىش ۇيىمى جاريالاعان كونكۋرستىڭ الەمدىك كەزەڭىنە قازاقستاننىڭ اتىنان قاتىسادى.

ولار ىرىكتەۋ تۋرىندا، 3D سايت ازىرلەپ، كۇن جۇيەسىنىڭ مودەلىن ۇسىنعان.

قازان ايىنىڭ باسىندا بۇكىل الەمدە NASA SPACE APPS CHALLENGE 2024 بايقاۋىنىڭ ايماقتىق كەزەڭدەرى ءوتتى. وعان 152 ەلدەن 8715 كوماندا قاتىستى. پاۆلودار اقپاراتتىق تەحنولوگيالار كوللەدجىنىڭ ستۋدەنتتەرى رومان ۋستيمەنكو مەن جان بەيسەكەيەۆ، سونداي-اق احمەت بايتۇرسىنوۆ اتىنداعى مەكتەپتىڭ وقۋشىسى يگور مارتىنيۋك كوماندا قۇرىپ، 3D سايت ازىرلەدى جانە كۇن جۇيەسىنىڭ مودەلىن جاسادى.

— ءبىزدىڭ ستۋدەنتتەرىمىز ەڭ باستىسى لايىقتى ءبىلىم دەڭگەيلەرىن كورسەتتى جانە الەمدىك نوميناتسياعا يە بولىپ، بايقاۋدىڭ كەلەسى كەزەڭىنە ءوتتى. دۇنيە جۇزىندەگى 8,7 مىڭ كوماندانىڭ 940 ى ىرىكتەلدى، ونىڭ ەكەۋى عانا قازاقستاننان. ەكى فلاگماندىق وقۋ ورنى - پاۆلودار اقپاراتتىق تەحنولوگيالار كوللەدجى مەن استاناداعى نازاربايەۆ ۋنيۆەرسيتەتى IT ماماندارىن دايارلاۋ سالاسىنداعى كوشباسشىلىق ۇستانىمدارىن راستادى، - دەپ حابارلادى اقپاراتتىق تەحنولوگيالار كوللەدجىنەن.

NASA SPACE APPS CHALLENGE 2024 جاھاندىق تورەشىلىگىنىڭ الەمدىك كەزەڭى 19-قاراشادا وتەدى. ۇمىتكەرلەردىڭ جوبالارىن NASA مەن سەرىكتەس عارىش اگەنتتىكتەرىنىڭ ساراپشى تورەشىلەر توبى قاراستىرىپ، جاھاندىق فيناليستەردى انىقتايدى.

ەسكە سالا كەتەيىك، 9-سىنىپ وقۋشىسى كۇن ەنەرگياسىن پايدالانۋدىڭ تيىمدىلىگىن ارتتىراتىن يننوۆاتسيالىق جوبا جاسادى.