پاۆلوداردىڭ ەلدى مەكەندەرىن جاپىراق جەمىرى مەن ءبۇيى باسىپ بارادى
پاۆلودار. KAZINFORM - ەرتىس-بايان وڭىرىندەگى بىرنەشە ەلدى مەكەندى راپس جاپىراق جەمىرى جايلاپ، وسىمدىك جاپىراقتارىن كەمىرىپ، وراسان زور زيان كەلتىرىپ جاتىر. تۇرعىندار بۇعان قوسا ۇيلەرىندە بۇيىلەردىڭ قاپتاپ جاتقانىنا الاڭداۋلى.
مايقايىڭ كەنتىنىڭ تۇرعىنى ماحاببات ابساتتاروۆانىڭ ايتۋىنشا، قىزىل-قوڭىر تۇستەس قوڭىزدار سوڭعى كۇندەرى جەر ۇيلەردىڭ ماڭايىنا تولىپ كەتكەن.
- ۇيلەرىمىزدىڭ ماڭايىندا قوڭىزدان اياق الىپ جۇرەتىن جەر جوق. قوڭىزدار جەر استىنان شىقتى ما بىلمەيمىز، ايتەۋىر كەن جىنىستارى ۇيىلگەن جاقتان توپ-توبىمەن ۇزدىكسىز كەلىپ جاتىر. باۋ-باقشالاردى، جاسىل ءشوپتى جەرلەردى بىلاي قويىپ، ءۇي قابىرعالارىنا ورمەلەپ، ءتىپتى كەيبىر ءۇيدىڭ ىشىنە كىرىپ جاتقانى بايقالادى. بۇعان قوسا ءۇيىمىزدىڭ ىشىندە ۇلكەن بۇيىلەر پايدا بولدى. بالالارىمىز قورقادى، - دەيدى تۇرعىن.
ادامداردىڭ ايتۋىنشا، قوڭىزدارعا ءۇي جاعدايىنداعى حيميالىق زاتتار ەشقانداي اسەر ەتپەيتىن كورىنەدى. كەيبىرەۋلەر سىركە سۋىن قۇيىپ، سارىمساق سۋىمەن دە وڭدەپ كورىپتى. ودان ەش ناتيجە شىقپاعان سوڭ كوپشىلىك جەرگىلىكتى اكىمدىككە حابارلاسىپ، كومەكتەسۋدى وتىنگەن.
كەنت اكىمى ەرباتىر مولداتايەۆ اتالعان جايت بويىنشا فيتوسانيتاريا ورگاندارىنا حات جازىلعانىن جەتكىزدى. ەندى جاۋابىن كۇتىپ وتىر.
ايتۋىنشا، قوڭىزدار مەن بۇيىلەردىڭ قاپتاۋى ازىرشە جەر ۇيلەر ورنالاسقان «شانحاي» شاعىن اۋدانىندا عانا بايقالىپ وتىر. جاعداي بۇلاي جالعاسا بەرسە جاندىكتەر كەنتتىڭ بارلىعىن جايلاۋى عاجاپ ەمەس. سوندىقتان فيتوسانيتاريالىق مەكەمەلەر قولۇشىن بەرەدى دەگەن ۇمىتتە. قازىرگى ۋاقىتتا كەنتتە 10 مىڭعا تارتا حالىق تۇرادى.
اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ پاۆلودار وبلىستىق اۋماقتىق ينسپەكتسياسىنىڭ باسشىسى ارمان شۇيكەنوۆتىڭ سوزىنشە، بۇل قوڭىزدار - «راپس جاپىراق جەمىرى» دەپ اتالادى. سىرتقى ءتۇرى كولورادو قوڭىزىنا ۇقسايدى.
- راپس جاپىراق جەمىرى ورامجاپىراق تۇقىمداسىنىڭ جابايى وسىمدىكتەرىمەن، سونداي-اق شالقان، ارپا، قىرىققابات، شالعاممەن قورەكتەنەتىن زيانكەس. جاندىك وسىمدىكتەر كارانتينى شارالارى بەلگىلەنەتىن جانە جۇرگىزىلەتىن كارانتيندىك وبەكتىلەر مەن وزگە دە تۇرلەرىنىڭ تىزىمىنە كىرمەيدى. سوعان سايكەس، ونى وڭدەۋگە بيۋدجەتتەن اقشا قاراستىرىلمايدى. قازىرگى جاعدايدا جاپىراق جەمىرى پاۆلودار وبلىسى بويىنشا اقسۋ قالاسىنا قاراستى اقجول اۋىلىندا، باياناۋىلدىڭ مايقايىڭ كەنتىندە، پاۆلودار اۋدانىنىڭ چەرنوياركا اۋىلىندا تىركەلىپ وتىر. باۋ-باقشاسى بارلارعا بۇل اسا زور قاۋىپ. ال ەلدى مەكەندەردە تارالسا، وعان حيميالىق وڭدەۋ جۇرگىزۋگە بولمايدى. تەك قولمەن تەرىپ الۋ، ورلار قازۋ سياقتى مەحنيكالىق جۇمىستار جۇرگىزىلۋى ءتيىس. اۋماقتىق ينسپەكتسيا ماماندارى جەكە تۇرعىندارعا، باۋ-باقشالار مەن شارۋا قوجالىقتارىنىڭ يەلەرىنە پرەپاراتتاردى قولدانۋ بويىنشا ۇسىنىستار بەرەدى. ال ازىرشە بىزگە مايقايىڭ كەنتىنەن شاعىم تۇسكەن جوق، - دەيدى باسقارما باسشىسى.
مامانداردىڭ ايتۋىنشا، راپس جاپىراق جەمىرىنىڭ كوبەيۋى ەلىمىزدە بىلتىردان بەرى بايقالعان. بۇعان ىلعالدىڭ مول بولۋى اسەر ەتۋى ىقتيمال. جاندىكتىڭ ادامعا ەش زيانى جوق.
اۆتور
مۇرات اياعان