پاۆلودارداعى اۋىلداردىڭ بىرىندە توعىز جاسار ءتارتىپ ساقشىسى تۇرادى
پاۆلودار. KAZINFORM - تەرەڭكول اۋدانىنىڭ التاي اۋىلىندا تۇراتىن 9 جاسار تيموفەي ستولبوۆوي اۋىلداستارىنىڭ تىنىشتىعىن كۇزەتۋگە ەرتە باستان دەن قويعان بالا. ول ءار كۇنى ەرتە تۇرىپ، اناسى تىگىپ بەرگەن پوليتسيا كيىمىن كيەدى دە قوعامدىق ءتارتىپتى باقىلاۋ ءۇشىن اۋىل كوشەلەرىن ارالاۋعا شىعادى.
تيموفەي - وتە جاۋاپتى بالا. اۋىلداعى وزگە تۇرعىندار ءتاتتى ۇيقىدا جاتقان الا تاڭدا كىشكەنتاي ءتارتىپ ساقشىسى العاشقى بولىپ ويانادى. توسەگىنەن تۇرا سالا جۋىنىپ، ۇستىنە وزىنە شاقتاپ تىگىلگەن پوليتسەي كيىمىن كيەدى. يىعىنا ويىنشىق اۆتوماتىن ءىلىپ الىپ، كوشە ارالاۋعا شىعادى.
ول بۇگىن دە ەرتە تۇردى. كيىمىن كيىپ دالا شىقتى دا، اۋلادا قاڭتارۋلى تۇرعان تەمىر دوسى - «ورلەنوك» ۆەلوسيپەدىنە ءمىندى. اسكەري جورىققا اتتانعالى تۇرعان وفيتسەرلەرشە تۇلپارىنىڭ ءرۋلىن سيپاپ، ەركەلەتىپ قويدى.
«بارلىعى ءبىزدىڭ باقىلاۋىمىزدا، دوستىم. قانەكەي باقىلاۋعا اتتانايىق» دەپ پەدالىنە اياق سالدى.
اۋىل حالقى ەندى عانا ويانا باستاپتى. تيموفەي اۋەلى مەكتەپ اۋماعىن اينالىپ، بارلىعى دۇرىس ەكەنىنە كوز جەتكىزدى. ودان سوڭ كۇندەلىكتى داعدىسىنا وراي دۇكەن، پوشتا عيماراتتارىن ءسۇزىپ ءوتتى. اۋىل ىشىندەگى تىنىشتىقتى ادەتتە ساشا اعايدىڭ قازدارى قاڭقىلداپ بۇزاتىن. ەندى سول جاققا اتتانىپ بارا جاتىر ەدى كەنەتتەن يەسىز قالعان ءۇي جاقتان بوگدە دىبىستار ەستىگەندەي بولدى. ساقشى بالا كىلت توقتادى. ۆەلوسيپەدىنەن اتىپ ءتۇسىپ، دىبىس شىققان جاققا ءجۇردى.
- بۇل جەردە كىم بار؟
ءبىراز ۇنسىزدىكتەن سوڭ الگى ءۇيدىڭ اۋلاسىنان كورشى ءۇيدىڭ ۆاسكاسى زىتىپ شىعا بەردى. الگى جەردە جەم ىزدەپ جۇرگەن كورشىنىڭ تاۋىقتارى مىسىقتى قىت- قىتتاپ قورقىتىپ جىبەرگەن ەكەن.
- ۋف، سەن ەكەنسىڭ عوي ۆاسكا. جارايدى ءبارى تىنىش بولسا بولعانى.
تيموفەي اۋىل ءىشىن كەزىپ ءجۇرىپ ءتۇس ۋاقىتى بولىپ قالعانىن ءبىلدى. وزىنشە ايتقاندا «تۇسكى ءۇزىلىس». اناسى بۇل ءسۇيىپ ىشەتىن كوجەسىن دايىنداپ قويىپتى.
- ءيا وفيتسەرىم، اۋىلداعى جاعداي قالاي ەكەن، - دەيدى كۇلىمدەپ.
- بارلىعى تىنىش، اناشىم، اۋىل ءىشى مەنىڭ باقىلاۋىمدا عوي، - دەپ ماقتانىشپەن تاناۋىن ءبىر تارتىپ قويدى.
تۇستەن كەيىن ول ءۇشىن ەكىنشى اۋىسىم باستالادى. اتا-اجەلەردىڭ جولدان وتۋىنە كومەكتەسەدى، كوشە قيىلىستارىندا جۇرگىزۋشىلەردىڭ باعىتىن رەتتەپ جىبەرەدى. مىنا جاقتا ويناپ جاتقان بالالاردىڭ اندا-ساندا قيىس ۇشقان دوپتارىن ۇستاپ الىپ اكەلىپ بەرەدى دە، كوشە بويىندا دوپ تەبۋگە بولمايتىنىن ەسكەرتەدى.
ءتارتىپ ساقشىسى كەشكىلىك ۇيىنە شارشاپ ورالسا دا كوڭىلى توق. سەبەبى ونىڭ ءار كۇنى نەبىر قىزىق وقيعالارعا تولى، ەڭ باستىسى اۋىل ىشىندە ءتارتىپ ورناعان. ەندەشە تيموفەيدىڭ ماقساتىنىڭ ورىندالعانى.
ۇيقىعا جاتار الدىندا التاي اۋىلىنىڭ كىشكەنتاي ءتارتىپ ساقشىسى كيىمدەرىن ورىندىققا ادەمىلەپ ىلەدى دە:
- ەرتەڭ جاڭا كۇن باستالادى، ەندەشە مەنى جاڭا مىندەتتەر كۇتىپ تۇر دەگەن ءسوز. ءمۇعالىمىمىز ءتارتىپ ءوز- وزىنەن ورنامايدى دەيتىن، ەندەشە ۋچاسكەلىك پوليتسەي رۇستەم اعايعا مەنىڭ كومەگىم ەرتەڭ دە كەرەك دەگەن ءسوز، - دەپ ايتاتىن ادەتى بار.
ال اۋىلدىق ينسپەكتور، پوليتسيا مايورى رۇستەم يمانبايەۆ تيموفەي ستولبوۆويدى قوعامدىق ءتارتىپتى ساقتاۋ ىسىندەگى بەلسەندى كومەكشىسى دەپ تانيدى. بالانىڭ پوليتسيا قىزمەتىنە قىزىعۋشىلىعى ەرەكشە. ول بولاشاقتا ەل تىنىشتىعىن كۇزەتەتىن وفيتسەر بولۋدى ارماندايدى. تارتىپكە دەگەن ىنتاسى مەن جاۋاپكەرشىلىگى اۋىل تۇرعىندارىن ەرەكشە سۇيسىندىرەدى. تيموفەي - اۋىل بالالارىنا ۇلگى. ونىڭ ءاربىر كۇنى - ءتارتىپ پەن تاربيەنىڭ جارقىن كورىنىسى.
ەسكە سالا كەتەيىك، ۇلتتىق دومبىرا كۇنىنە وراي پوليسيا قىزمەتكەرلەرى مەدەۋ مۇز ايدىنىندا كۇي شەرتتى.