پاۆلوداردا سۇراپىل جەل شاتىرلاردى ۇشىرىپ، اعاشتاردى قۇلاتىپ جاتىر

پاۆلودار. KAZINFORM - پاۆلودار وبلىسىنىڭ اۋماعىندا وتكەن تۇننەن بەرى قاتتى داۋىل تۇرىپ، عيماراتتار مەن كوممۋنالدىق جەلىلەرگە زاقىم كەلتىرىپ جاتىر. جەلدىڭ جىلدامدىعى كەيبىر جەرلەردە سەكۋندىنا 32 مەترگە دەيىن جەتكەن.

پاۆلوداردا جىلدامدىعى سەكۋندىنا 32 مەترگە دەيىن جەتەتىن سۇراپىل جەل سوعىپ تۇر. داۋىل سالدارىنان وبلىس اۋماعىندا عيماراتتاردىڭ شاتىرلارى ۇشىپ، اۋلالاردا ءوسىپ تۇرعان اعاشتار قۇلاعان. كەيبىر جەرلەردە قۇلاعان اعاشتاردىڭ اۆتوكولىكتەردى باسىپ قالعانى تۋرالى بەينەجازبالار تاراپ كەتتى. 

109 ءبىرىڭعاي بايلانىس ورتالىعىنىڭ حابارلاۋىنشا، بۇگىن تاڭەرتەڭنەن بەرى پاۆلودار قالاسى تۇرعىندارىنان شاتىرلاردىڭ ۇشۋى، اۋلاداعى اعاشتاردىڭ قۇلاۋىنا قاتىستى ءوتىنىش- شاعىمدار تولاسسىز ءتۇسىپ جاتىر.

- اعاشتاردىڭ قۇلاۋى بويىنشا شامامەن — 25، ال شاتىرلاردىڭ زاقىمدالعانى تۋرالى 7-8 ءوتىنىش تىركەلدى. ءبىزدىڭ ماماندارىمىز قابىلداپ العان وتىنىشتەردىڭ بارلىعى قالالىق تۇرعىن ءۇي-كوممۋنالدىق شارۋاشىلىق بولىمىنە بىردەن جولدانادى. ال ءبولىم ءوز كەزەگىندە ارنايى بريگادالار شىعارىپ، قۇلاعان اعاشتار مەن شاتىر بولىكتەرىن جيناۋ، تازالاۋ جۇمىستارىن جۇرگىزىپ جاتىر، - دەپ مالىمدەدى 109 ءبىرىڭعاي بايلانىس ورتالىعىنىڭ ديرەكتورى ابزال قابدراش.

بۇعان قوسا بۇگىن تاڭەرتەڭگىلىك وبلىس ورتالىعىنداعى تۇرعىن ۇيلەردىڭ كوبىندە ىستىق جانە سۋىق سۋ جوعالىپ كەتتى. 109 ورتالىعى بۇل جاعدايعا قاتتى جەلدىڭ سالدارىنان ەلەكتر جەلىسىندە اقاۋ تۋىنداپ، سۋ سورعىلارى اجىراتىلعانى سەبەپ بولعان دەپ جاۋاپ بەردى. «ۆودوكانال» كومپانياسىنىڭ مالىمەتىنشە، قازىرگى ۋاقىتتا سۋ قۇبىرلارى تولتىرىلىپ، قىسىم قالپىنا كەلتىرىلىپ جاتىر.

پاۆلودار قالاسىنىڭ اكىمى حاسار حابىلبەكوۆتىڭ اقپارىنشا، قالا كوشەلەرىندەگى زاقىمدانعان جارىق قۇرىلعىلارى مەن باعدارشامداردى، ەلەكتر بەرۋ جەلىلەرىن قالپىنا كەلتىرۋ بويىنشا 15 اپاتتىق بريگادا، قۇلاعان اعاشتاردى جيناۋ بويىنشا 10 بريگادا جۇمىس ىستەپ جاتىر. بۇدان بولەك، وبلىس ورتالىعىندا جانە قالاعا قاراستى اۋىلداردا زاقىمدانعان ەلەكتر جەلىلەرىن قالپىنا كەلتىرۋگە «پرەك» ا ق-نىڭ 18 جەدەل بريگاداسى جۇمىلدىرىلدى.

ال «قازگيدرومەت» ر م ك پاۆلودار وبلىستىق فيليالىنىڭ باسشىسى گالينا شپاك داۋىل ەرتەڭ تاڭەرتەڭگە دەيىن جالعاساتىنىن جەتكىزدى.

- بۇگىن تاڭەرتەڭگىلىك جەلدىڭ ماكسيمالدى جىلدامدىعى اقتوعاي، باياناۋىل اۋداندارىندا تىركەلدى، سەكۋندىنا 32 مەترگە دەيىن جەتكەن. ءبىزدىڭ بولجامىمىزشا، داۋىلدىڭ جىلدامدىعى سەكۋندىنا 33 مەترگە دەيىن سوعۋى مۇمكىن. ەرتىس، شارباقتى، اقتوعاي، باياناۋىل اۋداندارىندا جەلدىڭ اسەرى ايرىقشا سەزىلەدى. بۇعان قوسا الداعى تۇندە وبلىس اۋماعىندا 7 گرادۋسقا دەيىن ايازداتۋى ىقتيمال، - دەپ حابارلادى مەكەمە باسشىسى Kazinform اگەنتتىگىنىڭ تىلشىسىنە.

وبلىستىڭ ءبىرقاتار ەلدى مەكەندەرىندە ەلەكتر جارىعىنىڭ ءوشىپ قالعانى تۋرالى حابارلار تاراپ جاتىر.

وڭىرلىك توتەنشە جاعدايلار دەپارتامەنتىنىڭ باسپا ءسوز قىزمەتى جەلدىڭ سالدارىنان تۋىنداعان وقىس وقيعالار بويىنشا مالىمەتتەر ازىرشە جيناستىرىلىپ جاتقانىن، اقپارات كەيىنىرەك بولاتىنىن حابارلاپ وتىر.

ەسكە سالا كەتەيىك، پاۆلوداردا كۇشتى جەل سالدارىنان ۇستىنە اعاش قۇلاعان ايەل جان تاپسىردى.

قاتتى جەلگە بايلانىستى پاۆلودار وبلىسىنىڭ بارلىق ايماعىندا ساباقتار ونلاينعا كوشىرىلدى.

اۆتور
مۇرات اياعان