پاۆلوداردا قازاق ك س ر-ىنىڭ حالىق ءارتىسى، كۇيشى رۇستەمبەك وماروۆتىڭ دومبىراسى ساقتالىپ تۇر
پاۆلودار. KAZINFORM - بيىل قازاق ك س ر-ىنىڭ حالىق ءارتىسى، قۇرمانعازى اتىنداعى قازاق ۇلت اسپاپتار وركەسترىنىڭ باس دومبىراشىسى، داۋلەسكەر كۇيشى، ەرتىس - بايان ءوڭىرىنىڭ تۋماسى رۇستەمبەك وماروۆتىڭ تۋعانىنا 105 جىل تولدى. ونەر يەسىنىڭ قۇرمانعازى وركەسترىندە ۇستاعان كونە دومبىراسى جەرگىلىكتى مۋزەيدە ساقتالىپ تۇر.
قازاقتىڭ كۇيشىلىك ونەرىنىڭ دامۋى ⅩⅨ عاسىردا ءوز شىڭىنا جەتىپ، قۇرمانعازى، داۋلەتكەرەي، تاتتىمبەت، قازانعاپتىڭ شىعارمالارى ۇلت مادەنيەتىنىڭ التىن قورىنا اينالدى. مىنە، وسى قازىنانى كەلەسى ۇرپاققا جەتكىزۋشىلەردىڭ ءبىرى - ءداستۇرلى كۇيشىلەردىڭ جولىن جالعاستىرۋشى، قازاق ك س ر-ىنىڭ حالىق ءارتىسى، قۇرمانعازى اتىنداعى قازاق ۇلت اسپاپتار وركەسترىنىڭ باس دومبىراشىسى، ەرتىس - بايان ءوڭىرىنىڭ تۋماسى رۇستەمبەك وماروۆ.
بالا شاعىندا دومبىرا تارتۋدى اكەسىنەن ۇيرەنىپ، كەيىن سالىق، توقباي، تەمىربولات سىندى ءانشى-جىرشىلاردىڭ ورتاسىندا ءجۇردى. ول نەبارى 15 جاسىندا جاڭادان قۇرىلعان قازاق ۇلت اسپاپتار وركەسترىنە دومبىراشى رەتىندە قابىلدانعان.
ر. وماروۆتىڭ ورىنداۋىنداعى حالىق كۇيى «اقساق قۇلان»، قۇرمانعازىنىڭ «اقساق كيىك»، «جيما»، «ماشينا»، « قىزىق قايىڭ»، «سەرپەر»، دينانىڭ «بايجۇما»، كاۋەننىڭ «ءساناۋ»، ابىلدىڭ «ناراتۋ»، ت. ب. كۇيلەرىنىڭ نۇسقالارى كەڭ تارالىپ، دومبىراشىلاردىڭ رەپەرتۋارىنا ەندى. تاتتىمبەتتىڭ «سىلقىلداق»، «سارجايلاۋ» كۇيلەرىنىڭ نۇسقالارى ءالى كۇنگە ۇلت اسپاپتار وركەسترىمەن ورىندالىپ كەلەدى.
دومبىراشىنىڭ ورىنداۋ مانەرىن احمەت جۇبانوۆ وتە جوعارى باعالاپ، ءوزىنىڭ «عاسىرلار پەرنەسى» اتتى ەڭبەگىندە: «رۇستەمبەك كۇيدى «شەگەلەپ»، شاپشاڭ، جاي كەلەتىن بۋىندارىن ءبارىن دە تاستاي ءتۇيىپ، ەكپىنىن اۋىستىرمايدى. ورتاشا ۇزىندىقتاعى ساۋساقتارىمەن ءبىر نوتانى جازا باسپاي، ءبارىن دە ءوز ورنىندا ەتىپ ورىندايدى» دەپ جازعان.
ال كىرپياز كۇيشى- انامىز دينا نۇرپەيىسوۆا: «وسى شودىرىم (رۇستەمبەكتىڭ بەتىندە شەشەكتىڭ قوراسان داعى بولعان) شاكىرت بولۋعا جارايدى»، دەپ سوڭىنا ەرتىپ، باتاسىن بەرگەن ەكەن.
رۇستەمبەك وماروۆ ەكىنشى دۇنيەجۇزىلىس سوعىسقا قاتىسقان. مايدانداعى كەسكىلەسكەن ۇرىستاردىڭ بىرىندە ءبولىم جاۋىنگەرلەرىمەن بىرگە تۇتقىنعا ءتۇسىپ، نورۆەگيا جەرىندە كونتسلاگەردە بولعان. تۇتقىندا جۇرسە دە دومبىراشىلىق ونەرىن تاستاماي، ءوزى قولدان جاساعان دومبىرامەن نەمىس وفيتسەرلەرىن تاڭ-تاماشا ەتكەن.
ول سوعىستان كەيىن وركەستردەگى قىزمەتىن جالعاستىردى. بال بارماق كۇيشىنىڭ قولى تيگەن بۇل دومبىرا ۇزاق جىل قۇرمانعازى اتىنداعى ۇلت اسپاپتار وركەسترىندە بولعان. ونى قىزى قارلىعاش وماروۆا اكەسىنىڭ 100 جىلدىق مەرەيتويىندا، 2019 -جىلى، بۇقار جىراۋ اتىنداعى ادەبيەت جانە ونەر مۋزەيىنە تاپسىرعان. ال ونەر يەسىنىڭ جەكە ۇستاعان دومبىراسى جوعالىپ كەتكەن.
بۇگىندە پاۆلودار وبلىسىنداعى قازاق ۇلت اسپاپتار وركەسترى ر. وماروۆتىڭ ەسىمىمەن اتالادى.
ەسكە سالا كەتەيىك، پاۆلوداردا داۋىلپاز اقىن يسانىڭ دومبىراسى تابىلدى.