پاۆلوداردا «ۇلى دالا جورىعى» مارافون- بايگەسىنىڭ ءۇشىنشى ماۋسىمى باستالدى
پاۆلودار. KAZINFORM - بيىلعى جورىق كورنەكتى گەولوگ- عالىم ق. ساتبايەۆتىڭ 125 جىلدىعىنا ارنالىپ وتىر. مارافون- بايگەنىڭ ءۇشىنشى ماۋسىمى پاۆلودار - استانا باعىتى بويىنشا باستالدى.
مارافوننىڭ اشىلۋ سالتاناتىنا «AMANAT» پارتياسىنىڭ اتقارۋشى حاتشىسى داۋلەت كارىبەك، ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، پاۆلودار وبلىسىنىڭ اكىمى اسايىن بايحانوۆ، مارافون- بايگەنىڭ تەڭ ۇيىمداستىرۋشىسى الىبەك الدەنەي، «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ قاتىستى.
«AMANAT» - تىڭ اتقارۋشى حاتشىسى داۋلەت كارىبەك پارتيا ۇلتتىق سپورت تۇرلەرىن دامىتۋعا، سونداي- اق مادەني جانە تاريحي مۇرانى ناسيحاتتاۋعا باعىتتالعان باستامالاردى ءاردايىم قولدايتىنىن اتاپ ءوتتى.
«ۇلتتىق سپورتتى دامىتۋ ماسەلەسى اركەز مەملەكەت باسشىسى قاسىم-جومارت توقايەۆتىڭ نازارىندا. ۇلتتىق قۇرىلتايدا پرەزيدەنت قازاقستان ۇلى دالا كوشپەلى وركەنيەتىنىڭ تىكەلەي مۇراگەرى سانالاتىنىن جانە ءبىز ءوزىمىزدىڭ مادەني مۇرامىزدى قورعاپ، ىلگەرىلەتۋىمىز كەرەك ەكەنىن اتاپ ءوتتى. «ۇلى دالا جورىعى» بايگەسى «AMANAT» پارتياسىنىڭ قولداۋىمەن ءۇشىنشى جىل قاتارىنان وتكەلى وتىر. مارافون- بايگە قازاقستاندىقتاردى بىرىكتىرەتىن، ۇلتتىق رۋحتى نىعايتاتىن جوباعا اينالدى. «ۇلى دالا جورىعى» ءبىزدىڭ ۇلتتىق بىرەگەيلىگىمىزدى ساقتاپ، ىلگەرىلەتەدى دەپ سەنىممەن ايتۋعا بولادى»، - دەدى داۋلەت كارىبەك.
بيىل 500 شاقىرىمدىق مارافون- بايگە پاۆلودار - استانا باعىتى بويىنشا وتەدى. وعان قازاقستاننىڭ ءار وڭىرىنەن 19 كوماندا قاتىسىپ جاتىر.
«ۇلى دالا جورىعى» مارافون- بايگەسىن ءۇشىنشى رەت وتكىزىپ وتىرمىز. بۇل - ازاماتتار مەن ارعىماقتاردىڭ ءتوزىمى مەن ەرىك- جىگەرى سىنعا تۇسەتىن دودا. بارلىق سپورتشىلارىمىز وسى كۇردەلى سىناقتان سۇرىنبەي ءوتىپ، جورىتقاندا جولدارى بولسىن!»، - دەدى مارافونعا قاتىسۋشىلارعا قر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
كوماندالار بەس كۇن بويى كۇنىنە 100 شاقىرىم جول ءجۇرىپ ءوتۋى ءتيىس. ءار 50 شاقىرىم سايىن كوماندالار مەن ولاردىڭ اتتارىنا دەمالۋعا مۇمكىندىك بەرىلەدى. جىلقىلاردىڭ جاعدايىن تاجىريبەلى ۆەتەرينارلار باقىلايدى. ايتا كەتۋ كەرەك، ءار كوماندانىڭ جولعا شىعۋ ۋاقىتى ءارتۇرلى. ءبىرىنشى كوماندا ساعات 07.00-دە، كەلەسىلەر ەكى مينۋت ارالىقپەن جولعا شىقتى. ناتيجەسىندە سوڭعى كوماندانىڭ ساپارى 07.36-دا باستالدى. كوماندالاردىڭ قانداي نومىرمەن جارىساتىنى جەرەبە تارتۋ بارىسىندا انىقتالدى.
كوماندالار ءبىر- بىرىمەن جارىسپايدى، ويتكەنى ءارقايسىنىڭ قوزعالىس ۋاقىتى ءارتۇرلى. بارلىق قاشىقتىقتى ەڭ قىسقا ۋاقىتتا ەڭسەرگەن كوماندا جەڭىمپاز اتانادى.
ەسكە سالا كەتەيىك، «JORYQ» رەسپۋبليكالىق فەدەراتسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. قاۋىمداستىق قۇرامىندا بۇدان وزگە بايگە، كوكپار، اۋدارىسپاق، اسىق اتۋ، ساداق اتۋ، جامبى اتۋ، تەڭگە ءىلۋ، قۇسبەگىلىك جانە ت. ب. فەدەراتسيالار بار. قازاقستان رەسپۋبليكاسىنىڭ ۇلتتىق سپورت قاۋىمداستىعىن بەلگىلى كاسىپكەر، مەتسەنات، «Altyn Qyran Foundation» قوعامدىق قورى قامقورشىلىق كەڭەسىنىڭ ءتوراعاسى يسلامبەك سالجانوۆ باسقارادى.
اۆتور
مۇرات اياعان