پاۆلوداردا كوللەدج باسشىسى 10 جىل بويى بيۋدجەت قاراجاتىن جىمقىرىپ كەلگەن

پاۆلودار. KAZINFORM - پاۆلودار قالاسىنداعى ءتۇستى مەتاللۋرگيا كوللەدجىنىڭ بۇرىنعى باسشىسى مەملەكەتكە 130 ميلليون تەڭگەدەن استام ماتەريالدىق شىعىن كەلتىرگەنى ءۇشىن 7 جىلعا باس بوستاندىعىنان ايرىلدى. بۇعان قوسا سوت شەشىمىنەن ونىڭ ەسەپشوتىنداعى قاراجاتتىڭ بارلىعى تاركىلەندى.

پاۆلودار قالاسىنىڭ № 2-سوتى لاۋازىمدى تۇلعا ب.-عا قاتىستى قىلمىستىق ءىستى قارادى. ول 2013-2023 -جىلدار ارالىعىندا ءتۇستى مەتاللۋرگيا جوعارى كوللەدجىنىڭ باسشىسى قىزمەتىندە ءجۇرىپ، بيۋدجەت قاراجاتىن جىمقىرعان.

«كوللەدج باسشىسى جالعان قىزمەتكەرلەردىڭ ەسەپشوتىنا اي سايىن بەلگىلى كولەمدە جالاقى تولەمدەرىن جۇرگىزىپ، ونى ءوزى يەمدەنىپ كەلگەن. ادەيى بۇرمالانعان مالىمەتتەرى بار جۇمىس ۋاقىتىن ەسەپكە الۋ پاراقتارىنا قول قويعان. سونىڭ سالدارىنان مەملەكەتكە جالپى سوماسى 130 ميلليون تەڭگەدەن استام ماتەريالدىق شىعىن كەلتىرىلگەن»، - دەپ حابارلادى №2-قالالىق سوتتىڭ باسپا ءسوز قىزمەتىنەن.

سوت ب.-عا بانك شوتىنداعى اقشالاي قاراجاتىن تاركىلەۋمەن 7 جىلعا باس بوستاندىعىنان ايىرۋ جازاسىن تاعايىندادى. سونداي-اق ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىردى.

ۇكىم زاڭدى كۇشىنە ەنگەن جوق.

ەسكە سالا كەتەيىك، پاۆلوداردا ەلىك اتقاندار سوتتالدى.

اۆتور
مۇرات اياعان