پاۆلوداردا كادەت مەكتەبىندە وقۋشىلار توبەلەسىپ، ۇشەۋى جاراقاتتاندى

پاۆلودار. KAZINFORM - قابانباي باتىر اتىنداعى «جاس سارباز» وبلىستىق مامانداندىرىلعان اسكەري مەكتەپ- ليتسەي-ينتەرناتىنىڭ شاكىرتتەرى جاپپاي توبەلەسىپ، 3 وقۋشى جاراقات الدى. اتالعان جايت بويىنشا قىلمىستىق ءىس قوزعالدى.

وڭىرلىك پوليتسيا دەپارتامەنتىنىڭ دەرەگىنە سۇيەنسەك، 2007-2008 -جىلى تۋعان وقۋشىلار اراسىندا جانجال تۋىنداپ، ونىڭ سوڭى جاپپاي توبەلەسكە ۇلاسقان.

«پوليتسيا قىزمەتكەرلەرى مەكتەپ كابينەتتەرىنىڭ بىرىندە توبەلەس بولعانىن انىقتادى. ونىڭ بارىسىندا كامەلەتكە تولماعان ءۇش وقۋشى دەنە جاراقاتتارىن العان. ولارعا مەديتسينالىق كومەك كورسەتىلىپ، ۇيلەرىنە جىبەرىلدى. قازىرگى ۋاقىتتا ق ر قىلمىستىق كودەكسىنىڭ 293-بابى، ياعني بۇزاقىلىق بويىنشا سوتقا دەيىنگى تەرگەۋ امالدارى جۇرگىزىلىپ جاتىر»، - دەپ حابارلادى پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ.

مامانداردىڭ ايتۋىنشا، وقۋ ورنىندا تەكسەرۋ جۇرگىزىلەدى. ونىڭ ناتيجەسىندە ءبىلىم ۇياسىنىڭ قىزمەتكەرلەرىنە قاتىستى تارتىپتىك جازا قولدانىلادى.

ەسكە سالا كەتەيىك، بۇعان دەيىن پاۆلوداردا مەكتەپ وقۋشىسى سىنىپتاسى مەن مۇعالىمىنە پىشاق سالعانى تۋرالى جازعان ەدىك. كەيىن كىنالى ءجاسوسپىرىمنىڭ پسيحولوگ كومەگىنە مۇقتاج بولعانى انىقتالدى.

اۆتور
مۇرات اياعان