پاۆلوداردا ۇشەم دۇنيەگە كەلدى

پاۆلودار. KAZINFORM - پاۆلودارداعى وبلىستىق پەريتانالدىق ورتالىقتا ۇشەم دۇنيەگە كەلدى. ۇشەۋى دە ۇل بالا. اتا-اناسى سابيلەرىنە كارىم، ءامىر، تايىر دەگەن ەسىمدەر بەردى.

بۇل تۋرالى وبلىستىق پەريناتالدىق ورتالىقتان حابارلادى.

- اناسى زارينا مامبەتوۆا بۇعان دەيىن ءبىر قۇرساق كوتەرىپ، ەر بالاعا جارىق دۇنيە سىيلاعان. ەندى وتباسىن بىردەن ءۇش ەر بالا تولىقتىرىپ وتىر. ۇشەم امان-ەسەن دۇنيەگە كەلدى. العاشقى بولىپ تۋعان كارىمنىڭ سالماعى - 2020 گرام، ودان سوڭ ءامىر (2200 گرام)، ەڭ سوڭىندا تايىر (1660 گرام) دۇنيەگە كەلدى. اناسى ولاردى جۇكتىلىكتىڭ 34-اپتاسىندا بوسانعانىن ايتىپ وتكەن ابزال. قازىر اناسىنىڭ جاعدايى دا قالىپتى، - دەپ مالىمدەدى پەريناتالدىق ورتالىقتان.

نارەستەلەردىڭ اناسى مەكتەپتە ۇستاز بولىپ قىزمەت اتقارسا، اكەسى مۇناي-حيميا زاۋىتىندا ەڭبەك ەتەدى.

- قازىر ءبىز كارىم ەكەۋىمىز جاڭا تۋعان نارەستەلەردىڭ پاتولوگياسى بولىمشەسىندە جاتىرمىز. كارىم قاجەتتى ەم قابىلداپ جاتىر، جاقىن ارادا اعالارىنىڭ قاتارىنا قوسىلادى. ال جولداسىم ۇيدە سابيلەرىن اسىعا كۇتىپ وتىر. جولداسىم ەكەۋىمىز سابيلەرىمىزدى باعىپ-قاعۋ قيىندىعىنان قورىقپايمىز. ءبىزدىڭ ومىرىمىزدەگى ەڭ عاجايىپ كەزەڭنىڭ ءبىرى بولعالى تۇر. سوندىقتان بالالاردىڭ اكەسى جۇمىسىنان بالا كۇتىمى بويىنشا دەمالىس رەسىمدەۋدى جوسپارلاپ وتىر. وبلىستىق پەريناتالدىق ورتالىعىنىڭ ۇجىمىنا امان-ەسەن بوساندىرىپ العانى، ءۇش ۇلىمدى دا دۇنيەگە ساۋ اكەلگەنى ءۇشىن شەكسىز ريزاشىلىعىمىزدى بىلدىرەمىز. مۇندا ءوز ءىسىنىڭ ماماندارى ەڭبەك ەتەتىنىنە كوزىمىز جەتتى، - دەيدى ۇشەمنىڭ اناسى

ەسكە سالا كەتەيىك، پاۆلوداردا انالاردىڭ ءۇي جاعدايىندا بوسانۋى بەلەڭ الىپ بارادى.