پاۆلوداردا عالي ورمانوۆتىڭ 1948 -جىلى اراب گرافيكاسىندا جارىق كورگەن كىتابى تانىستىرىلدى
استانا. KAZINFORM - كورنەكتى اقىن، جازۋشى، اۋدارماشى، جۋرناليست عالي ورمانوۆتىڭ 1948 -جىلى اراب گرافيكاسىندا جارىق كورگەن «ءومىر داستانى» اتتى كىتابىنىڭ تانىستىرىلىمى ءوتتى.
پاۆلودار قالاسى، بۇقار جىراۋ اتىنداعى ادەبيەت جانە ونەر مۋزەيىندە اقىن، جازۋشى، اۋدارماشى، جۋرناليست عالي ورمانوۆتىڭ «ءومىر داستانى» اتتى كىتابىنىڭ تانىستىرىلىمى ءوتتى. كورنەكتى قالامگەردەن مۇرا بولىپ قالعان بۇل جادىگەردىڭ ەرەكشەلىگى، كىتاپتىڭ ءتۇپنۇسقاسى ەلىمىزدىڭ وزگە كىتاپحانالارى مەن مۋزەيلەرىندە ساقتالماعان.
كىتاپ اراب گرافيكاسىندا 1948 -جىلى جارىق كورگەن. باسىلىپ شىققان ورنى - قازاقتىڭ مەملەكەتتىك باسپاحاناسى، «قازاق ەلى» جۋرنالىنىڭ باسپاسى دەپ كورسەتىلگەن. جيناقتا اقىننىڭ ولەڭدەرى توپتاستىرىلىپ بەرىلگەن. اتاپ ايتقاندا، «انا ساباعى» داستانى، «العاشقى ادىم»، «جولدا»، «قۋانىش»، «ءبىزدىڭ اۋىل»، «تەمىر ات»، «شەڭبەر»، «انا تولعاۋى»، «قىرماندا»، «ۇستاز»، «ءبىزدىڭ زامان» جانە تاعى باسقا ولەڭدەرى باسىلعان.
جادىگەردى اقىننىڭ جيەن-نەمەرەسى ايدار قىرىقباي ۇلى مۋزەيگە اماناتتادى.
عالي ورمانوۆ (1907-1978 -جىلدار ارالىعىندا ءومىر سۇرگەن) - بۇكىل سانالى عۇمىرىن ۇلتتىق ادەبيەتىمىزدىڭ ءوسىپ-وركەندەۋىنە، قازاق پوەزياسىنىڭ دامۋىنا ەرەكشە ۇلەس قوسقان اقىن. ورىستىڭ، شىعىستىڭ كلاسسيكالىق ۇلگىلەرىن اۋدارىپ، قازاق ادەبيەتى سالاسىنا ولشەۋسىز ۇلەس قوسقان اۋدارماشى، اسا قۇندى ەڭبەكتەر جازعان قاجىرلى تۇلعا. ونىڭ قالامىنان قازاق ادەبيەتىنە، قازاق رۋحانياتىنا اينالعان ولەڭدەر جيناقتارى، پوەمالارى، جىر كىتاپتارى، پروزالىق جيناقتارى جارىق كورىپ، ادەبيەتىمىزدىڭ التىن قازىناسىنا اينالعان.
اۆتور
باقىتگۇل اباي قىزى