پاۆلوداردا بالاسىنا اليمەنت تولەمەي كەلگەن ايەل باس بوستاندىعىنان ايرىلۋى مۇمكىن

پاۆلودار. KAZINFORM - وڭىرلىك پوليتسيا دەپارتامەنتى جىل باسىنان بەرى كامەلەتكە تولماعان بالاسىن اسىراۋعا قاراجات تولەۋ جونىندەگى مىندەتتەردى ورىنداماعانى ءۇشىن 31 ادامعا قاتىستى قىلمىستىق ءىس جۇرگىزىلىپ جاتقانىن حابارلادى.

17 ءىس شەشىم قابىلداۋ ءۇشىن سوتقا جىبەرىلدى. ولاردىڭ قاتارىندا ەرلەر دە، ايەلدەر دە بار.

«مىسالى جەكە سوت ورىنداۋشىسى ايەلدىڭ ۇلىنا قاتىستى اليمەنت قارىزىن تولەمەۋ فاكتىسى بويىنشا پوليتسياعا جۇگىندى. ول 2009 -جىلى تۋعان كامەلەتكە تولماعان بالاسىن اسىراۋعا سوڭعى 7 جىلدا اليمەنت تولەمەگەن. 2017 -جىلى اتا-انا قۇقىعىنان ايرىلىپ، ال جاس ءوسپىرىم ەرەكشە ءبىلىم بەرۋ قاجەتتىلىكتەرى بار بالالارعا ارنالعان مەملەكەتتىك ورتالىقتا بولعان. وسى كەزەڭدەگى قارىز سوماسى 5 ميلليون 700 مىڭ تەڭگەدەن استى»، دەپ حابارلادى پوليتسيادان.

قازىر بۇل ءىستى سوت قاراستىرىپ جاتىر. زاڭناماعا سايكەس، ايەل ادام قوعامدىق جۇمىسقا تارتىلۋى نەمەسە ەكى جىلعا دەيىن باس بوستاندىعىنان ايىرىلۋى مۇمكىن.

ەسكە سالا كەتەيىك، پاۆلوداردا اليمەنت تولەۋدەن جالتارعان 100 گە جۋىق ادام ىزدەۋدە ءجۇر.

ال ەلىمىزگە تانىمال بلوگەر اليمەنتكە نەبارى 20 مىڭ تەڭگە تولەگەن.

اۆتور
مۇرات اياعان