پاۆلوداردا ۋچاسكەلىك پوليتسەي اۋىل تۇرعىنىن الاياقتاردىڭ قاقپانىنان قۇتقارىپ قالدى

پاۆلودار. KAZINFORM - قاسكۇنەمدەر اۋىل تۇرعىنىنىڭ اتىنا 30 ميلليون تەڭگە نەسيە رەسىمدەگەن. ءتارتىپ ساقشىسى قاراجاتتىڭ وزگە شوتتارعا اۋدارىلۋىنىڭ الدىن الدى.

تەرەڭكول اۋدانى التاي اۋىلىنىڭ تۇرعىنى ناتاليا دۆينيانينا ايدىڭ-كۇننىڭ امانىندا الاياقتاردىڭ قۇربانى بولا جازداعان. ۇيالى تەلەفونىنا 1414 ءبىرىڭعاي بايلانىس ورتالىعىنان كەلىپ تۇسكەن SMS-كودتى الدەكىمدەرگە ايتىپ جىبەرىپ، سوڭىنان سان سوعىپ قالعان.

- بەلگىسىز بىرەۋلەر وزدەرىن پوشتا قىزمەتكەرلەرى دەپ تەلەفون شالعان ەدى. مەنىڭ بارلىق دەرەكتەرىمدى، تۇرعىلىقتى مەكەن-جايىمدى اتادى جانە كۋرەرمەن حات جىبەرەتىندەرىن ايتتى. الگىلەرگە سەنىپ، تۇسكەن كودتى ايتتىم. كەيىن پوشتاشىعا قوڭىراۋ شالعانىمدا ولار ەشقانداي پوشتالىق جونەلتىلىمنىڭ جوق ەكەنىن جەتكىزدى. ابدەن ساسىپ، ءبىزدىڭ ۋچاسكەلىك پوليتسەي رۋستام يمانبايەۆقا حابارلاستىم. رۋستام ناجىميدەن ۇلى بىردەن قولۇشىن سوزدى. مەنىڭ اتىما 30 ميلليون تەڭگە نەسيە رەسىمدەلىپ ۇلگەرگەن ەكەن. ول جەدەل تۇردە قارجى ۇيىمدارىنا حابارلاسىپ، بارلىق سومانى جويۋعا كومەكتەستى، - دەيدى ناتاليا دۆينيانا.

تۇرعىن بۇل وقيعا تۋرالى وبلىستىق پوليتسيا دەپارتامەنتىنە بەينەۇندەۋ جولداپ، ءوز ءىسىنىڭ مامانى رۋستام يمانبايەۆتىڭ اتىنا شەكسىز ريزاشىلىعىن جەتكىزگەن.
وسىلايشا ۋچاسكەلىك پوليتسەيدىڭ شيراقتىعىنىڭ ارقاسىندا قاراپايىم اۋىل تۇرعىنى الاياقتاردىڭ ارباۋىنان قۇتىلدى.

ەسكە سالا كەتەيىك، «حاس» قارجى پيراميداسىنىڭ نەگىزىن قالاۋشىلار الاياقتىق ءۇشىن سوتتالدى.