پاۆلوداردا ابىلاي حان زامانىنىڭ جادىگەرلەرى تانىستىرىلدى
پاۆلودار. KAZINFORM - وبلىستىق بۇقار جىراۋ اتىنداعى ادەبيەت جانە ونەر مۋزەيىندە ابىلاي حان زامانىنا قاتىستى جادىگەرلەر تانىستىرىلدى. جۇرتشىلىق كوشپەلى كورمەدەن ابىلاي حان رەزيدەنتسياسىنىڭ ماكەتىن، ابىلايدىڭ ءمور ساقيناسى مەن سول زاماندا باتىرلار ۇستاعان سوعىس قارۋلارى مەن ساۋىت-سايماندى، دۋلىعالاردى تاماشالادى.
سولتۇستىك قازاقستان وبلىسىنداعى «ابىلاي حان رەزيدەنتسياسى مۋزەي كەشەنىندە» ۇلى حاننىڭ زامانىنا قاتىستى كوپتەگەن تاريحي جادىگەرلەر ساقتالعان. ازاتتىق كۇرەستىڭ جالىندى باسشىسى، قازاققا ۇلى حان بوپ وتكەن ابىلاي حاننىڭ مۇرالارى ەرتىستىڭ پاۆلودار وڭىرىندە العاش رەت پاش ەتىلدى.
كوشپەلى كورمەنى باستاپ كەلگەن «ابىلاي حان رەزيدەنسياسى مۋزەي كەشەنىنىڭ» ديرەكتورى ايان سادايەۆ مەكەمەدە جالپى سانى 500-دەن استام جادىگەر بارىن جەتكىزدى.
«ابىلاي زامانىنا قاتىستى سوعىس قارۋ-جاراعى، تاريحي قۇجاتتار، ەتنوگرافيالىق بۇيىمدار كوپ. بۇگىنگى كوشپەلى كورمەگە سولاردىڭ نەگىزگىلەرىن عانا اكەلىپ وتىرمىز. بۇل جادىگەرلەردىڭ كوبى سول زاماننىڭ ۇلگىسىمەن جاڭادان جاسالعان بۇيىمدار ەكەنىن بايقاپ وتىرعان بولارسىزدار. قالامىزدا ۆيكتور جاۆورونكوۆ ەسىمدى شەبەر ازامات بار. وعان تاپسىرىس بەرەمىز. ۇستا بۇيىمدى جاساماس بۇرىن ونىڭ تاريحي نەگىزىن زەرتتەپ، ماعلۇماتتار جينايدى. ناتيجەسىندە وتە كەرەمەت تۋىندىلار جاساپ شىعاردى. ال كەيبىر جادىگەرلەردى «مۋزەيگە سىيلىق» اكسياسى اياسىندا جەرگىلىكتى جۇرتشىلىق مۋزەيگە اكەلىپ تاپسىردى»، دەيدى ول.
كورمەدە ابىلايدىڭ اق ءۇيىنىڭ ۇلگىسى، حاننىڭ ءمور ساقيناسىنىڭ كوشىرمەسى، زۇلپىقار قىلىش، قازاق باتىرلارىنىڭ ساۋىت-سايمانى مەن سەمسەر، نايزا، شوقپار، قىلىش، ايبالتا، كۇرزى، اكيناك، سيراقتى مىلتىق سياقتى سوعىس قۇرالدارى، سول كەزەڭدەگى ديپلوماتيالىق حاتتار مەن ارحيۆتىك قۇجاتتاردىڭ كوشىرمەلەرى جانە تاعى دا باسقا كوپتەگەن جادىگەرلەر ۇسىنىلدى.
اۆتور
مۇرات اياعان