پاۆلوداردا 12 جاستاعى وقۋشى قىز دۇنيەگە ءسابي اكەلدى

استانا. KAZINFORM - پاۆلودار پەريناتالدىق ورتالىعىندا كامەلەتكە تولماعان قىز بوساندى. بۇل جاعدايعا اۋداندىق ءبىلىم ءبولىمى تۇسىنىك بەرىپ، بالا قۇقىقتارى جونىندەگى ۋاكىل دە ارالاستى.

شارباقتى اۋداندىق ءبىلىم ءبولىمىنىڭ حابارلاۋىنشا، قىزدىڭ جاسى 12-دە. تامىز ايىندا 13 جاسقا تولۋى ءتيىس. وقۋشى قىزدىڭ جۇكتى ەكەنىن مۇعالىمدەرى دە بايقاعان.

- مۇعالىمدەرى دەمالىستان شىققان سوڭ بايقاعان. قىز بەن ونىڭ اناسى دەرەۋ اۋرۋحاناعا جەتكىزىلدى، - دەپ حابارلادى ءبىلىم باسقارماسى.

باسقارما اۋىل مەكتەبى ديرەكتورىنىڭ قىزمەتىنەن بوساتىلعانىن حابارلادى. اۋداندىق ءبىلىم ءبولىمىنىڭ باسشىسىنا قاتاڭ سوگىس جاريالاندى.

مەكتەپ وقۋشىسى وسى دەمالىس كۇندەرى قىز بالانى دۇنيەگە اكەلدى.

قىلمىستىق ءىس قوزعالىپ، تەرگەۋ ءجۇرىپ جاتىر.

جاعدايعا وڭىردەگى بالالار ومبۋدسمەنى ساۋلە شاكەنوۆا ارالاستى.

- وقيعا بيىلعى ءساۋىر ايىندا پاۆلودار وبلىسىنداعى اۋدانداردىڭ بىرىندە بولدى. مۇعالىمدەر دەمالىستان كەلگەن وقۋشىنىڭ ءىشى شىعىپ جۇرگەنىن بايقاعان. كوپ ۇزاماي جۇكتى ەكەنى بەلگىلى بولادى. بالانىڭ بولجامدى اكەسى دە كامەلەتكە تولماعان، قازىرگى تاڭدا ق ر قىلمىستىق كودەكسىنىڭ 120-بابى (زورلاۋ) بويىنشا قىلمىستىق ءىس قوزعالدى. قىز بۇل جاققا جاڭادان كوشىپ كەلگەن. وكىنىشكە قاراي، ونىڭ ءوزىن قالاي سەزىنەتىنىن، پسيحولوگيالىق جانە فيزيكالىق جاعدايى قانداي ەكەنىن ازىرگە ايتا المايمىن، ويتكەنى مەن قىزدى جەكە كورمەدىم جانە بۇل تۋرالى اقپارات قۇرالدارىنان ءبىلدىم، - دەدى ساۋلە شاكەنيەۆا.

پوليتسيا دەپارتامەنتى بۇل فاكتىگە قاتىستى ازىرگە تۇسىنىك بەرگەن جوق. دەنساۋلىق ساقتاۋ باسقارماسى جاس ءوسپىرىمنىڭ قازىرگى جاعدايى تۋرالى كەيىنىرەك حابارلاۋعا ۋادە بەردى.

اۆتور
ەركەجان سماعۇلوۆا