پاۆلودار وبلىسىنىڭ اكىمى ايدوس شايمەردەننىڭ وتباسىنا كوڭىل ايتتى

پاۆلودار. KAZINFORM - پاۆلودار وبلىسىنىڭ اكىمى اسايىن بايحانوۆ مايقايىڭدا التىن كەنىشىندەگى ويىقتان قازىپ الىنعان مارقۇم ايدوس شايمەردەننىڭ وتباسىنا كوڭىل ايتتى. ال 55 جاستاعى جۇرگىزۋشى ايىپ تىلەۋبەرگەنوۆتىڭ دەنەسىن قۇتقارۋشىلار جاقىن ارادا تابادى دەپ ۇمىتتەنەتىنىن جەتكىزدى.

«ىزدەستىرۋ جۇمىستارى تۇراقتى نەگىزدە ازداعان ۇزىلىستەرمەن جۇرگىزىلگەن «مايقايىڭ- التىن» ا ق تاۋ-كەن اۋدانىنداعى وپىرىلعان جەردە ىزدەستىرۋ جۇمىستارىن جۇرگىزۋ كەزىندە ەكى قۇتقارۋشىنىڭ ءبىرىنىڭ دەنەسى تابىلدى. پاۆلودار وبلىسىنىڭ ت ج د كۇشىمەن قۇتقارۋشىنىڭ مۇردەسى جەر بەتىنە كوتەرىلىپ، جەدەل-تەرگەۋ توبىنا بەرىلدى.

تابىلعان جەتون مەن كيىمىنەن قۇتقارۋشىلار ۆزۆودى كومانديرىنىڭ 36 جاستاعى ورىنباسارى ايدوس شايمەردەننىڭ دەنەسى تابىلعانى انىقتالدى.

ايدوستىڭ اتا-اناسىنا، ونىڭ جۇبايى نۇرسۇلۋعا، سونداي-اق، تۋىستارى مەن جاقىندارىنا كوڭىل ايتامىن» دەپ جازدى پاۆلودار وبلىسىنىڭ اكىمى اسايىن بايحانوۆ تەلەگرامداعى پاراقشاسىندا.

وبلىس اكىمى اتاپ وتكەندەي، اپاتتىڭ العاشقى كۇنى ەكى قۇتقارۋشىنىڭ - سارقىت بەرلىقان مەن ولەگ تىشكەۆيچتىڭ دەنەلەرى تابىلعان بولاتىن.

«وكىنىشكە وراي، 55 جاستاعى جۇرگىزۋشى ايىپ تىلەۋبەرگەنوۆتىڭ دەنەسى ءالى تابىلعان جوق. ءبىز ءبارىمىز جاقىن ارادا ىزدەستىرۋ جۇمىستارى ءوز ناتيجەسىن بەرەدى دەپ ۇمىتتەنەمىز»، - دەدى ءوڭىر باسشىسى.

ەسكە سالا كەتەيىك، ارادا 6 جارىم اي وتكەندە مايقايىڭداعى التىن كەنىشىندە ءۇشىنشى قۇتقارۋشىنىڭ مۇردەسى تابىلدى.

مارقۇم ايدوس شايمەردەننىڭ دەنەسى 70 مەتر تەرەڭدىكتەن قازىپ الىنعان.

اۆتور
مۇرات اياعان