پاۆلوداردا جول باقىلاۋ كامەرالارىن قاساقانا بۇلدىرگەن ەر ادام ۇستالدى

پاۆلودار. KAZINFORM - پاۆلودار وبلىسىندا جول قوزعالىسى ەرەجەلەرىن بۇزۋدى تىركەيتىن التى كامەرانى زاقىمداعان ەر ادام ۇستالدى. 31 جاستاعى ازامات كەلتىرگەن زالالدىڭ مولشەرى انىقتالىپ جاتىر.

Фото: Павлодар облысы ПД

وقيعا ومبى - مايقاپشاعاي اۆتوجولىندا بولعان. موتوسيكلگە مىنگەن ەر ادام جول بويىنداعى اركالى قۇرىلىمعا جاقىنداپ، قۇقىق بۇزۋشىلىقتاردى تىركەۋگە ارنالعان التى كامەرانىڭ كورپۋسىن ادەيى بۇلدىرگەن.

ونىڭ ارەكەتى بەينەباقىلاۋ كامەرالارىنا ءتۇسىپ قالعان. سوعان قاراماستان، زاقىمدانعان جابدىق شتاتتىق رەجيمدە جۇمىسىن جالعاستىرعان.

پوليتسيا قىزمەتكەرلەرى كۇدىكتىنىڭ جەكە باسىن جەدەل انىقتادى. ول كورشىلەس ەلدى مەكەننىڭ 31 جاستاعى تۇرعىنى بولىپ شىققان. اتالعان دەرەك بويىنشا قىلمىستىق ءىس قوزعالىپ، كۇدىكتى ۇستالىپ، ۋاقىتشا ۇستاۋ يزولياتورىنا قامالدى.

- قازىرگى ۋاقىتتا تەرگەۋ امالدارى جۇرگىزىلىپ، كەلتىرىلگەن زالالدىڭ مولشەرى انىقتالىپ جاتىر، - دەپ حابارلادى پاۆلودار وبلىستىق پوليتسيا دەپارتامەنتىنەن.

پوليتسيا بوتەننىڭ مۇلكىن قاساقانا ءبۇلدىرۋ زاڭ بويىنشا جاۋاپكەرشىلىككە اكەپ سوعاتىنىن ەسكەرتەدى.

ەسكە سالا كەتەيىك، وسكەمەن كوشەلەرىندەگى 300 كامەرا ىزدەۋدە جۇرگەن ادامداردى انىقتايدى.