پاۆلودار ورمان جانە جانۋارلار دۇنيەسىن قورعاۋ مەكەمەسىنىڭ باسشىسى اجدار ءجۇسىپوۆ اققۋ كولىنەن تۇسىرىلگەن فوتوسۋرەتتەردى Kazinform اقپاراتتىق اگەنتتىگىمەن ءبولىستى.
- مۇندا قازاقستاننىڭ قىزىل كىتابىنا ەنگىزىلگەن سۇڭقىلداق اققۋلار ءجۇزىپ ءجۇر. ولار وڭتۇستىككە ۇشۋعا دايىندالىپ جاتقان سياقتى. كەرەمەت كورىنىس، كولدە اققۋلار وتە كوپ. تابيعاتتى ايالايىق،-دەيدى مەكەمە باسشىسى.
ونىڭ ايتۋىنشا، اققۋلاردىڭ كۇزگى قونىس اۋدارۋى ادەتتە قىركۇيەك ايىندا باستالىپ، قازان-قاراشادا جالعاسادى. قۇستار سۋ ايدىندارىنىڭ جاعدايىنا، اۋا رايىنا جانە قورەك قورىنىڭ جەتكىلىكتىلىگىنە قاراي جىلى جاققا بەت الادى.
كۇزگى كوش كەزىندە اققۋلار قازاقستاننىڭ وڭتۇستىك جانە وڭتۇستىك-باتىس وڭىرلەرىنە، سونداي-اق ورتالىق ازيانىڭ جىلى ايماقتارىنا قاراي ۇشۋى مۇمكىن. جول بويىندا وزەن-كولدەرگە ايالداپ، تىنىعادى جانە قورەكتەنەدى.
ماماندار پاۆلودار وبلىسىندا جابايى قۇستاردى باقىلاۋ كەزىندە ولاردىڭ سانى، ورنالاسقان جەرى مەن جاعدايى نازارعا الىناتىنىن ايتادى. ەگەر جاراقاتتانعان نەمەسە السىرەگەن قۇستار انىقتالسا، ولارعا كومەك كورسەتىلەدى.