كريمينالدىق پوليتسيا قىزمەتكەرلەرى مال ۇرلىعىنىڭ بىرنەشە دەرەگىنە قاتىسى بار دەگەن كۇدىكپەن ءبىر توپ ادامدى ۇستادى. ولار اۋدان تۇرعىندارىنىڭ مالىن جۇيەلى تۇردە ۇرلاپ وتىرعان. بىرنەشە اي ىشىندە كۇدىكتىلەردىڭ مال ۇرلىعىنىڭ بەس ەپيزودىنا قاتىسى بارى انىقتالدى. ۇرلانعان مالدىڭ قاتارىندا جىلقى مەن ءىرى قارا بار.
- جەدەل-ىزدەستىرۋ ءىس-شارالارىنىڭ ناتيجەسىندە بارلىق كۇدىكتىنىڭ جەكە باسى انىقتالدى. ولاردىڭ بارلىعى وبلىس تۇرعىندارى بولىپ شىقتى. مال ساتىپ الۋشىلاردىڭ ءبىرىنىڭ تۇرعىلىقتى جەرىندە جۇرگىزىلگەن ءتىنتۋ كەزىندە ۇرلانعان ەكى جىلقى، بەس ءىرى قارا جانە كولىك قۇرالدارى تابىلىپ، تاركىلەندى، - دەدى پاۆلودار وبلىسى پوليتسيا دەپارتامەنتى كريمينالدىق پوليتسيا باسقارماسىنىڭ باستىعى جاسلان تانجانوۆ.
ءتورت كۇدىكتىگە قاتىستى قاماۋدا ۇستاۋ تۇرىندەگى بۇلتارتپاۋ شاراسى قولدانىلسا، تاعى ءبىر كۇدىكتىگە ەلدەن شىقپاۋ تۋرالى قولحات بەرىلدى. قازىرگى ۋاقىتتا سوتقا دەيىنگى تەرگەپ-تەكسەرۋ امالدارى جالعاسىپ جاتىر.
سونىمەن قاتار جەدەل ۋاكىلدەر ۇستالعانداردىڭ وسىعان ۇقساس وزگە دە قىلمىستارعا قاتىستىلىعىن تەكسەرىپ جاتىر.
تەرگەۋ بارىسى پوليتسيا دەپارتامەنتى باسشىلىعىنىڭ جەكە باقىلاۋىندا.