پاۆلودار جولدارىنان الىنعان ءاربىر بەسىنشى سىناما تالاپقا ساي بولماي شىققان

پاۆلودار. KAZINFORM - پاۆلودار وبلىسىندا جول-قۇرىلىس ماتەريالدارىنىڭ ساپاسىنا جۇرگىزىلگەن زەرتحانالىق تەكسەرۋ كوڭىل كونشىتپەيتىن ناتيجە كورسەتتى. جىل باسىنان الىنعان 1648 سىنامانىڭ 357 سى، ياعني 21 پايىزى نورماتيۆتىك تالاپتارعا سايكەس كەلمەگەن.

فوتو: الەكساندر پاۆسكي / Kazinform

«جول اكتيۆتەرى ساپاسىنىڭ ۇلتتىق ورتالىعى» پاۆلودار وبلىستىق فيليالى ماماندارى جىل باسىنان وڭىردەگى اۆتوكولىك جولدارىنا 672 رەت ينسپەكتسيالىق تەكسەرۋ جۇرگىزگەن. ونىڭ ناتيجەسىندە 325 اقاۋ مەن زاڭبۇزۋشىلىق انىقتالعان. قازىرگى ۋاقىتتا ونىڭ 200 ى جويىلىپ، قالعان 125 ى مەردىگەر ۇيىمداردىڭ باقىلاۋىندا تۇر.

اتاپ ايتقاندا، جەرگىلىكتى ماڭىزى بار اۆتوكولىك جولدارىندا 60 اقاۋ تىركەلىپ، ونىڭ 40 ى تۇزەتىلگەن. ەلدى مەكەندەردىڭ كوشە- جول جەلىسىندە انىقتالعان 65 كەمشىلىكتىڭ تەك 25 ى جويىلعان. وسىلايشا، جەرگىلىكتى جولدار مەن قالا، اۋىل كوشەلەرىندە ءالى دە 60 اقاۋ بار.

الايدا جول ساپاسىنا قاتىستى ماسەلە مۇنىمەن شەكتەلمەيدى. زەرتحانالىق سىناقتاردىڭ ناتيجەسى دە بىرقاتار ولقىلىقتى كورسەتكەن.

- جىل باسىنان بەرى جولداردان 1648 سىناما الىنىپ، زەرتحانالىق تەكسەرۋدەن وتكىزىلدى. ناتيجەسىندە 357 سىناما نەمەسە جالپى كولەمنىڭ 21 پايىزى نورماتيۆتىك قۇجاتتار تالاپتارىنا سايكەس كەلمەيتىنى انىقتالدى. ونىڭ ىشىندە 211 سايكەسسىزدىك مەردىگەر ۇيىمدار تاراپىنان جوبالاردى ىسكە اسىرۋ بارىسىندا جويىلدى، - دەپ حابارلادى Kazinform تىلشىسىنە «جول اكتيۆتەرى ساپاسىنىڭ ۇلتتىق ورتالىعى» پاۆلودار وبلىستىق فيليالىنىڭ باس ينجەنەرى مارات ۆاليەۆ.

اسىرەسە جەرگىلىكتى جولدارداعى كورسەتكىش الاڭداتادى. بۇل ساناتتاعى جولداردان الىنعان سىنامالاردىڭ 88 ىنەن نورماتيۆتىك تالاپتارعا سايكەسسىزدىك انىقتالعان. الايدا سونىڭ تەك جەتەۋى عانا تۇزەتىلگەن. ياعني 81 سىناما بويىنشا ماسەلە ءالى شەشىمىن تاپپاعان.

ەلدى مەكەندەردىڭ كوشە-جول جەلىسىندەگى جاعداي ءدا ماز ەمەس. مۇندا 253 سىنامانىڭ تالاپقا ساي كەلمەيتىنى انىقتالىپ، ونىڭ 87 سى عانا نورماتيۆكە سايكەستەندىرىلگەن. ءبىراق 166 سىناما بويىنشا سايكەسسىزدىك جويىلماعان.

انىقتالعان كەمشىلىكتەرگە بايلانىستى وبلىستىق فيليال مەملەكەتتىك ساۋلەت-قۇرىلىس باقىلاۋ ورگاندارىنا 16 حات جولداعانى ايتىلادى.

ۇلتتىق جول اكتيۆتەرى ساپاسى ورتالىعى فيليالىنىڭ مالىمەتىنشە، مامانداردىڭ جۇمىسى اقاۋلاردى تىركەۋمەن شەكتەلمەيدى. نەگىزگى ماقسات - انىقتالعان كەمشىلىكتەردىڭ ۋاقىتىلى جويىلۋىن قامتاماسىز ەتۋ. اسىرەسە جەرگىلىكتى جولدار مەن ەلدى مەكەن كوشەلەرىنىڭ ساپاسىنا باسىمدىق بەرىلىپ وتىر.