1959 -جىلى تابىلعان XIII- XIV عاسىرلارعا ءتان بىرەگەي كۇمىس باس كيىم - «بوككا» عىلىمي زەرتتەۋ نىسانىنا اينالعان. زەرتتەۋ جۇمىستارى كونە زەرگەرلەردىڭ شەبەرلىگىن زەردەلەۋگە، جادىگەردىڭ جاسالۋ تەحنولوگياسى مەن ىقتيمال شىعۋ تەگىن انىقتاۋعا مۇمكىندىك بەرەدى.
ماماندار رەنتگەندىك- فلۋورەستسەنتتىك تالداۋ ءادىسى ارقىلى مەتالدىڭ قۇرامىن انىقتاپ، بۇيىمنىڭ جاسالۋ ەرەكشەلىكتەرى تۋرالى جاڭا عىلىمي دەرەكتەر جيناۋدى جوسپارلاپ وتىر. الدىن الا تالداۋ ناتيجەلەرى بويىنشا بۇيىم قۇرامىنداعى كۇمىستىڭ ۇلەسى شامامەن - 97 پايىز. بۇل كورسەتكىش سول كەزەڭدەگى مەتالدى وڭدەۋ مەن تازارتۋ تەحنولوگيالارىنىڭ دەڭگەيىن زەرتتەۋگە مۇمكىندىك بەرەدى.
الداعى كەزەڭدە عالىمدار باس كيىمنىڭ جاسالۋ تاسىلدەرىن زەردەلەپ، ونىڭ جۇقا ءارى نازىك قۇرىلىمىن قالىپتاستىرۋدا قانداي تەحنولوگيالار قولدانىلعانىن انىقتاماق.
جادىگەردىڭ بۇگىنگى كۇنگە دەيىن ساقتالۋى دا زەرتتەۋشىلەردىڭ نازارىن اۋدارىپ وتىر. تابيعي- كليماتتىق جاعداي اسەرىنەن كۇمىس بۇيىمدار ۋاقىت وتە كەلە ءبۇلىنۋى مۇمكىن. ال بۇل باس كيىمنىڭ كەيبىر بولىكتەرىنىڭ قالىڭدىعى نەبارى بىرنەشە ميلليمەتر.
مامانداردىڭ باعالاۋىنشا، قازاقستان مەن وعان ىرگەلەس وڭىرلەردەن وسى كەزەڭگە جاتاتىن ۇقساس بۇيىمداردىڭ ازىرگە تابىلماۋى دا ونىڭ عىلىمي قۇندىلىعىن ارتتىرا تۇسەدى. مۋزەي مەن مارعۇلان ۋنيۆەرسيتەتى اراسىنداعى عىلىمي ىنتىماقتاستىق جادىگەردى جان- جاقتى زەرتتەۋگە مۇمكىندىك بەرىپ وتىر. مەتالل قۇرامىن انىقتاۋمەن قاتار عالىمدار باس كيىمنىڭ ىقتيمال شىعۋ تەگىن دە زەردەلەمەك.
تالداۋ ناتيجەلەرى مۇمكىندىك بەرگەن جاعدايدا بۇيىمدى جاساۋعا پايدالانىلعان كۇمىستىڭ شيكىزات كوزى مەن كەن ورنىن انىقتاۋ ماسەلەسى دە قاراستىرىلادى. زاماناۋي عىلىمي ادىستەر وتكەن داۋىرلەردەگى تەحنولوگيالىق جەتىستىكتەردى دە تەرەڭىرەك تۇسىنۋگە جول اشادى.
اتالعان باس كيىم تۋرالى بۇعان دەيىن ەگجەي- تەگجەيلى جازعانبىز. ەرتىس بويىن مەكەندەگەن ەجەلگى اتا-بابالارىمىز باس كيىمنىڭ اشەكەيلەرىنە ەرەكشە ءمان بەرگەنى بايقالادى.