«التىن وردا» ماڭىنداعى كەپتەلىس: ماسەلەنى جولايرىق تا شەشە المادى

الماتى. KAZINFORM — «قازاۆتوجول» ۇ ك» ا ق وبلىستىق فيليالى Kazinform ءتىلشىسىنىڭ ساۋالحاتىنا جاۋاپ بەرە وتىرىپ، «الماتى - بىشكەك» اۆتوموبيل جولىن كەڭەيتۋ جۇمىستارى جوسپارلانعانىن مالىمدەدى.

ۇلتتىق كومپانيا مالىمەتىنشە، «التىن وردا» بازارى ماڭىنداعى كوپىر قۇرىلىسى اياقتالىپ، كەپتەلىس ماسەلەسى شەشىلگەن.

«التىن وردا بازارىنىڭ ماڭىنداعى جولدىڭ ىشكى (ترانزيت) بولىگىندە كولىك قوزعالىسى بويىنشا كەپتەلىس ماسەلەسى جويىلعان. ال سىرتقى نەمەسە ەكى جاق جول بولىگى بازار ماڭىندا ورنالاسقاندىقتان بازارعا كىرىپ-شىعاتىن كولىك سانىنىڭ كوبەيۋى سالدارىنان كەپتەلىس پايدا بولىپ وتىرادى»، - دەلىنگەن كومپانيا جاۋابىندا.

«التىن وردا» بازارى مەن «اپورت» ساۋدا ورتالىعى ماڭىندا بىرنەشە شاقىرىمعا سوزىلاتىن كەپتەلىس كەشكى ۋاقىتتا بايقالادى.

«رەسپۋبليكالىق ماڭىزى بار «الماتى - بىشكەك» اۆتوموبيل جولىنىڭ 19-27 شاقىرىم ارالىعىن (ءۇا ا ا ج - قاسكەلەڭ) كەڭەيتۋ جوسپاردا. جوسپار بويىنشا قوزعالىس جولاقتارى سانىن التى- سەگىزگە جەتكىزە وتىرىپ كەڭەيتۋ، ءۇش جەردە ءار دەڭگەيدەگى جول ايرىعى («تاعا» ءتيپتى كەرى بۇرىلىس) جانە جول ءۇستى جاياۋ جۇرگىنشىلەر وتكەلدەرى قاراستىرىلعان»، - دەپ اتاپ ءوتتى قازاۆتوجول وكىلدەرى.

ءقازىر جوبالىق- ىزدەستىرۋ جۇمىستارىنا كونكۋرۋس جاريالاندى. جوبانى ىسكە اسىرۋ 2025-2027 -جىلدارى كوزدەلگەن.

«سونىمەن قاتار، ۇستىمىزدەگى جىلى اتالعان جول بولىگىنە تاعى ءبىر ءار دەڭگەيدەگى جول ايرىعى («تاعا» ءتيپتى كەرى بۇرىلىس) نىسانىنىڭ قۇرىلىس- مونتاجداۋ جۇمىستارىن باستاۋعا دايىندىق جۇرگىزىلىپ جاتىر»، - دەپ ءتۇسىندىردى كومپانيادان.

وسىعان دەيىن «التىن وردا» بازارى ماڭىنداعى «الماتى- رايىمبەك» ۋچاسكەسىندە جاڭا باس ماگيسترالدىق ەستاكادا پايدالانۋعا بەرىلگەن بولاتىن.

ماماندار، التىن وردا» ، «بارلىق» بازارى مەن «مولل اپورت» ساۋدا - ويىن-ساۋىق ورتالىعىنىڭ ورنالاسقان جەرى ەسكەرىلگەنىن جانە ەستاكادادا قوزعالىستىڭ اشىلۋى جول ۋچاسكەسىنىڭ وتكىزۋ قابىلەتىن ارتتىرىپ، حالىققا قولايلى جاعداي جاسايتىنىن اتاپ وتكەن ەدى.

پوليتسيا دەپارتامەنتىنىڭ مالىمەتىنشە، 10 نەگىزگى ماگيسترال بويىنشا الماتى اۋماعىنا جۇمىس كۇندەرى ورتا ەسەپپەن 400 مىڭنان استام اۆتوموبيل كىرەدى. ال، وبلىستان قالاعا كىرەتىن قوسىمشا 17 جولمەن 300 مىڭنان استام كولىك كەلەدى.

وسىلايشا، مەگاپوليس كوشەلەرىمەن كۇن سايىن 700 مىڭنان استام ماشينا جۇرەدى. بۇل شامامەن قالا حالقىنىڭ ۇشتەن ءبىرى - 2,147 ميلليون ادام.

بۇعان دەيىن، «الماتى- تالعار» تاسجولىنىڭ كەڭەيتىلەتىنى تۋرالى جازعان ەدىك.

اۆتور
الما مۇقانوۆا