التىن ۇرلادى دەپ ازاپتاۋ وقيعاسى: سوت ۇ ق ك بۇرىنعى قىزمەتكەرلەرىنە قاتىستى جاڭا شەشىم شىعاردى

استانا. KAZINFORM - استاناداعى ق ر اسكەري سوتى قازاقستاننىڭ ۇلتتىق قاۋىپسىزدىك كوميتەتىنىڭ بۇرىنعى ءتورت قىزمەتكەرىنىڭ اپپەلياتسيالىق شاعىمىن قارادى. سونداي-اق سوت وتىرىسى بارىسىندا جەكە قاۋلى قارالدى.

ايىپتالۋشىلار ەركىن امانوۆ، حاميت ءابۋعالي، قايرات سارتايەۆ جانە قۋاندىق مۇحتارحانوۆ اقمولا گارنيزونىنىڭ اسكەري سوتىندا شىعارىلعان شەشىممەن كەلىسپەيتىنىنە شاعىمدانعان ەدى. ولار تەك بۇيرىقتى عانا ورىنداعان. ال پارمەن بەرگەن باستىقتار بوستاندىقتا ءجۇر.

ەستەرىڭىزگە سالساق، 22-ساۋىردە سوت پودپولكوۆنيك ەركىن امانوۆتى 6,5 جىلعا باس بوستاندىعىنان ايىرعان بولاتىن. مايور حاميت ءابدۋعاني مەن كاپيتان قايرات سارتايەۆ 5 جىلعا باس بوستاندىعىنان ايىرۋ جازاسى كەسىلدى. ال «استانا» شەكارالىق باقىلاۋ باسقارماسىنىڭ مامانى قۋاندىق مۇحتارحانوۆ 4 جىلعا باس بوستاندىعىنان ايىرىلدى.

اسكەري سوتتا ەركىن امانوۆتىڭ جازاسىن جەڭىلدەتۋ بويىنشا شەشىم شىعارىلدى. وعان 5 جىل باس بوستاندىعىنان ايىرۋ جازاسى تاعايىندالدى. سەبەبى، ول ارەكەتىنە شىن وكىنىپ، ءتىپتى جابىرلەنۋشى تاراپتىڭ تۋىستارى دا كەشىرىمدى قابىل العان بولاتىن. ال قالعان 3 سوتتالۋشىنىڭ جازاسى وزگەرگەن جوق.

سوت وتىرىسى بارىسىندا جەكە قاۋلى قارالىپ، سوت ونى قاناعاتتاندىردى. قاۋلى 2024 -جىلعى 4-ماۋسىمنان باستاپ كۇشىنە ەندى. وعان سايكەس، پروكۋراتۋرا بۇل ىسكە قاتىستى تاعى دا تەرگەۋ جۇمىستارىن جۇرگىزىپ، سوت پروتسەسىندە ەسىمدەرى اتالعان باسشىلار جاۋاپقا تارتىلۋى مۇمكىن.

وسىعان دەيىن ۇ ق ك بۇرىنعى قىزمەتكەرلەرى ۇكىمدى جەڭىلدەتۋدى سۇراعان بولاتىن.

اۆتور
ورالحان قوجانوۆ