التىن-ەمەلدەگى قاراقۇيرىق، قۇلان مەن ارقار سانى كوبەيدى

استانا. KAZINFORM - «التىن-ەمەل» مەملەكەتتىك ۇلتتىق تابيعي پاركىندە قىزىل كىتاپقا ەنگەن ارقار، قۇلان جانە قاراقۇيرىقتىڭ سانى انىقتالدى.

ساناق جۇمىستارىنا ءبىلىم جانە عىلىم مينيستىرلىگى ۇلتتىق عىلىم اكادەمياسىنىڭ زوولوگيا ينستيتۋتى، «وحوتزووپروم» ءو ب» ر م ق ك-ى، قازاقستان بيوالۋان تۇرلىلىكتى ساقتاۋ قاۋىمداستىعى، جەتىسۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسى، «جوڭعار- الاتاۋى» م ۇ ت پ-ى قىزمەتكەرلەرى جۇمىلدىرىلعان.

«التىن-ەمەل» مەملەكەتتىك ۇلتتىق تابيعي پاركىنىڭ باس اڭ تانۋشى مامانى مۇحيت مۇقاتاي ۇلىنىڭ اگەنتتىك تىلشىسىنە بەرگەن مالىمەتىنشە، پارك اۋماعىندا شامامەن 6 مىڭعا جۋىق قاراقۇيرىق، 4 مىڭعا جۋىق قۇلان جانە 200 گە جۋىق ارقار تىركەلگەن. وتكەن جىلدارمەن سالىستىرعاندا ءۇش جانۋاردىڭ دا ءوسىمى بايقالادى.

- جابايى جانۋارلاردىڭ ساناعى ءار جىل سايىن تەك اقپان ايىندا جۇرگىزىلەدى. كوكتەمدە جانۋارلار تولدەيدى. سايكەسىنشە، قالعان ۋاقىتتا ولاردى قۋالاۋعا بولمايدى. ساناق جۇمىستارى 307 مىڭ گەكتار اۋماقتى قامتىپ، بۇل ىسكە 46 مامان تارتىلدى. ەكى كۇن بويى كولىككە، اتقا مىنگەن ماماندار جولاي كەزدەسكەن جانۋارلاردى تىركەپ وتىردى، - دەيدى م. مۇقاتاي ۇلى.

ونىڭ ايتۋىنشا، قۇلاننىڭ سانى ارتقان سايىن ەلىمىزدىڭ وزگە وڭىرلەرىندەگى قورىقتارعا جونەلتىلەدى.

- بىلتىر «ىلە- بالقاش» قورىعىنا 60 باس قۇلان جىبەرىلدى. جانۋار كەز كەلگەن ايماققا جەرسىنە بەرەدى. الداعى ۋاقىتتا «التىن-ەمەل» مەملەكەتتىك ۇلتتىق تابيعي پاركى اۋماعىندا تاۋتەكە، قار بارىسىنىڭ ساناعى جۇرگىزىلەتىن بولادى، - دەيدى اڭ تانۋشى.

ايتا كەتەيىك، جەتىسۋ وبلىسىندا ورنالاسقان «التىن-ەمەل» مەملەكەتتىك ۇلتتىق تابيعي پاركى اۋماعىندا سۇتقورەكتىلەردىڭ 79 ءتۇرى مەكەن ەتەدى. ونىڭ 11 ى قىزىل كىتاپقا ەنگەن. سونداي-اق قۇستاردىڭ 260 ءتۇرى بار ( قىزىل كىتاپقا ەنگەنى - 29). بۇدان بولەك 4 قوسمەكەندى (ەكەۋى قىزىل كىتاپقا ەنگەن)، 25 باۋىرىمەن جورعالاۋشىلار (بىرەۋى قىزىل كىتاپ تىزىمىندە)، بالىقتىڭ 26 جانە بۋىناياقتىلاردىڭ 6000 ءتۇرى تىركەلگەن.

 

اۆتور
ورالحان قوجانوۆ