ساراپشىلار بۇعان ا ق ش دوللارىنىڭ كۇشەيۋى، مەملەكەتتىك وبليگاتسيالار كىرىستىلىگىنىڭ ءوسۋى جانە ا ق ش-تا پايىزدىق مولشەرلەمەنىڭ تاعى كوتەرىلۋى مۇمكىن ەكەنى اسەر ەتكەنىن ايتادى. بۇل تۋرالى Euronews جازدى، دەپ حابارلايدى turkystan.kz.
دۇيسەنبى كۇنى التىننىڭ ءبىر تروي ۋنتسياسى (31,1 گرام) 3832 دوللارعا دەيىن ارزانداعان. بۇل - 2025-جىلعى قازاننان بەرگى ەڭ تومەنگى كورسەتكىش. ال كۇمىستىڭ ءبىر ۋنتسياسى 46,5 دوللارعا دەيىن تۇسكەن.
17-قاراشادا باعالار ءسال قالپىنا كەلدى. التىن شامامەن %0,75 عا قىمباتتاپ، 3861 دوللارعا، ال كۇمىس %2 دان استام ءوسىپ، 47,5 دوللارعا جەتتى.
ءبىر قىزىعى، بيىل قاڭتاردا التىن باعاسى تاريحي رەكورد ورناتىپ، ءبىر ۋنتسياسى شامامەن 5600 دوللارعا جەتكەن ەدى. ال كۇمىستىڭ باعاسى 121,65 دوللارعا دەيىن كوتەرىلگەن.
سودان بەرى التىن %30 دان استام، ال كۇمىس شامامەن %60 ارزانداعان. جىل باسىنان ەسەپتەگەندە التىننىڭ قۇنى %10 دان، كۇمىستىكى %34 دان استام تومەندەدى. ەگەر قازىرگى ءۇردىس ساقتالسا، التىن 2015-جىلدان بەرگى ەڭ ۇلكەن جىلدىق قۇلدىراۋىن تىركەۋى مۇمكىن.
باستى سەبەپتىڭ ءبىرى – ا ق ش-تا پايىزدىق مولشەرلەمەنىڭ جوعارى بولۋى.
التىننىڭ وبليگاتسيا نەمەسە بانك دەپوزيتىنەن ايىرماشىلىعى - ول پايىزدىق تابىس اكەلمەيدى. سوندىقتان ينۆەستورلار جوعارى كىرىس ۇسىناتىن قارجى قۇرالدارىنا كوبىرەك قىزىعۋشىلىق تانىتا باستايدى.
قازىر ا ق ش-تىڭ 10 جىلدىق مەملەكەتتىك وبليگاتسيالارىنىڭ كىرىستىلىگى شامامەن %5 عا جەتكەن. ال فەدەرالدىق رەزەرۆ جۇيەسى جەلتوقساندا بازالىق مولشەرلەمەنى تاعى كوتەرۋى مۇمكىن دەگەن بولجام كۇشەيىپ وتىر.
بۇعان دوللاردىڭ نىعايۋى دا اسەر ەتتى. 17-قاراشادا ا ق ش ۆاليۋتاسى 2025-جىلعى ساۋىردەن بەرگى ەڭ جوعارى دەڭگەيىنە كوتەرىلگەن. دوللار كۇشەيگەن سايىن باسقا ۆاليۋتالاردى پايدالاناتىن ساتىپ الۋشىلار ءۇشىن التىن مەن كۇمىس قىمباتتايدى. بۇل دا سۇرانىستى تومەندەتۋى مۇمكىن.
ادەتتە گەوساياسي شيەلەنىس كەزىندە ينۆەستورلار التىندى قاۋىپسىز اكتيۆ رەتىندە ساتىپ الادى.