التى حالىقارالىق ۇيىمداسقان قىلمىستىق توپتىڭ كوزى جويىلدى - ق ر ىشكى ىستەر مينيسترلىگى

مەملەكەت باسشىسىنىڭ ىشكى ىستەر مينيسترلىگىنىڭ الدىنا قويعان مىندەتتەرىن ورىنداۋ ماقساتىندا ۇيىمداسقان قىلمىسقا قارسى كۇرەس باعىتىندا ءبىرقاتار ءىس-شارا جۇزەگە اسىرىلدى. ناتيجەسىندە ۇيىمداسقان قىلمىستىق توپتاردى قۇرۋ، ولارعا باسشىلىق ەتۋ جانە ولاردى قارجىلاندىرۋ بويىنشا 60 تان استام قىلمىستىق ءىس تىركەلدى. ونىڭ ىشىندە ترانسۇلتتىق اۋقىمداعى فاكتىلەر دە بار. قىلمىستىق قۇرىلىمداردىڭ 250 دەن استام قاتىسۋشىسى قىلمىستىق جاۋاپكەرشىلىككە تارتىلدى، - دەپ حابارلايدى Polisia.kz سايتى.

- ەل اۋماعىندا شەتەلدىك كريميناليتەتتىڭ ىقپالىنا جول بەرمەۋ بويىنشا شارالار قابىلدانىپ جاتىر. جۇرگىزىلىپ جاتقان جۇمىستىڭ ناتيجەسىندە قۇرامىنا قازاقستان ازاماتتارى دا، جاقىن شەت مەملەكەتتەردىڭ ازاماتتارى دا كىرەتىن التى ترانسۇلتتىق ۇيىمداسقان قىلمىستىق توپتىڭ كوزى جويىلدى. اتالعان فاكتىلەر بويىنشا ترانسۇلتتىق قىلمىستىق توپتى ۇيىمداستىرعانى جانە وعان قاتىسقانى ءۇشىن توعىز قىلمىستىق ءىس تىركەلدى. سونىمەن قاتار شەتەلدىك ارىپتەستەرمەن ءوزارا ءىس-قيمىل بارىسىندا رەسپۋبليكا اۋماعىنا ءتورت شەتەلدىك قىلمىستىق بيلىك وكىلىنىڭ كىرۋ فاكتىلەرىن دەر كەزىندە انىقتاپ، جولىن كەستىك، - دەپ اتاپ ءوتتى ق ر ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ باستىعى قانات نۇرماعامبەتوۆ.

ۇيىمداسقان قىلمىسقا قارسى كۇرەس باسقارمالارىنىڭ قىزمەتكەرلەرى جىل باسىنان بەرى زاڭسىز اينالىمنان 470 اتىس جانە تراۆماتيكالىق قارۋ، 44 گرانات، ەكى گراناتا اتقىش، 400 گرام تروتيل جانە 14 مىڭنان استام وق-ءدارى تاركىلەدى.

پرەزيدەنتتىڭ تاپسىرمالارىن ورىنداۋ شەڭبەرىندە مەملەكەتتىك ورگاندارمەن، حالىقارالىق جانە ۇكىمەتتىك ەمەس ۇيىمدارمەن ءوزارا ءىس-قيمىل جاساي وتىرىپ، «قازاقستان رەسپۋبليكاسىندا ادام ساۋداسىنا قارسى ءىس-قيمىل تۋرالى» زاڭ جوباسى ازىرلەندى. ول ادام ساۋداسىنىڭ الدىن الۋ جانە وعان قارسى كۇرەستى، سونداي-اق سۋبەكتىلەردىڭ قىزمەتىن ۇيلەستىرۋ جونىندەگى ۇيىمدىق-قۇقىقتىق نەگىزدەردى رەگلامەنتتەيدى، ۋاكىلەتتى ورگانداردى ايقىندايدى جانە ادام ساۋداسىنىڭ قۇرباندارىن قورعاۋ بويىنشا شارالاردى بەلگىلەيدى. قازىرگى ۋاقىتتا زاڭ جوباسى پارلامەنت ءماجىلىسىنىڭ قاراۋىندا.

- پوليتسيا قابىلداعان شارالاردىڭ ناتيجەسىندە بيىل ادام ساۋداسىنا بايلانىستى 150 دەن استام قىلمىستىق ءىس تىركەلدى، ونىڭ ىشىندە 28 فاكت كامەلەتكە تولماعاندارعا قاتىستى. ماسەلەن، قازان ايىندا «قورعاس» حالىقارالىق ورتالىعىنىڭ اۋماعىندا ساۋىقتىرۋ ورتالىعى مەن قوناق ءۇي كەشەنىنىڭ اتىن جامىلىپ جۇمىس ىستەگەن پريتوندار مەن جاسىرىن كازينولاردىڭ زاڭسىز قىزمەتى توقتاتىلدى. بەس كۇدىكتى قۇرىقتالدى، ونىڭ ىشىندە ەكەۋى شەتەل ازاماتى، - دەدى قانات نۇرماعامبەتوۆ.

وڭىرلەردە، اسىرەسە وقۋ ورىندارىندا بوپسالاۋ دەرەكتەرىن بولدىرماۋعا باعىتتالعان جۇمىستار قارقىندى تۇردە جۇرگىزىلىپ كەلەدى. ۇيىمداسقان قىلمىسقا قارسى كۇرەس باسقارمالارىنىڭ قىزمەتكەرلەرى بوپسالاۋدىڭ 470 فاكتىسىن انىقتاپ، جولىن كەستى، ونىڭ ىشىندە 261 قىلمىستىق ءىس بويىنشا كىنالى ادامدار جاۋاپقا تارتىلدى. بۇدان باسقا پايدالى قازبالار مەن باعالى مەتالداردى ءوندىرۋ وبەكتىلەرىندە ۇرلىققا جول بەرمەۋ بويىنشا شارالار قابىلدانىپ جاتىر.

- ايماقتاردا جەكەلەگەن قىلمىستىق توپتاردى انىقتاۋ جانە ولاردىڭ ارەكەتىنىڭ جولىن كەسۋ بويىنشا جەدەل-ىزدەستىرۋ ءىس-شارالارى تۇراقتى نەگىزدە جۇرگىزىلەدى. بيىل تەك قاراعاندى وبلىسىنىڭ وزىندە ىقپال ەتۋ سالالارىن ءوزارا بولىسكە سالىپ قانا قويماي، ءوڭىردىڭ ءىرى كاسىپورىندارىنان تاۋارلىق-ماتەريالدىق قۇندىلىقتاردى ۇرلاعان قارسىلاس ەكى ۇيىمداسقان قىلمىستىق توپقا توسقاۋىل قويىلدى. ناۋرىز جانە تامىز ايلارىندا وتكىزىلگەن ەكى اۋقىمدى ارنايى وپەراتسياعا 500 دەن استام پوليتسيا قىزمەتكەرى مەن ۇلتتىق ۇلاننىڭ ارنايى كۇشتەرىنىڭ جاۋىنگەرلەرى جۇمىلدىرىلدى. ەكى توپتىڭ 70 كە جۋىق قاتىسۋشىسى ۇستالىپ، ونىڭ ىشىندە 30 ادام قاماۋعا الىندى. 170 تەن استام ءتىنتۋ شارالارى جۇرگىزىلدى، ناتيجەسىندە 18 اتىس جانە تراۆماتيكالىق قارۋ، سۋىق قارۋ، ۇلكەن كولەمدە قاراجات، جارىلعىش زاتتار جانە باسقا دا زاتتاي ايعاقتار تاركىلەندى. ۇيىمداسقان قىلمىستىق توپ قۇرعانى، باسقارعانى جانە وعان قاتىسقانى ءۇشىن، سونداي-اق قارۋ ساقتاۋ، ۇرلىق، بۇزاقىلىق، بوپسالاۋ، دەنساۋلىققا اۋىر زيان كەلتىرۋ جانە كىسى ولتىرۋگە وقتالۋ فاكتىلەرى بويىنشا بىرنەشە قىلمىستىق ىستەر تىركەلدى، - دەدى سپيكەر.

ەلوردادا تاپسىرىسپەن كىسى ءولتىرۋدىڭ ەكى دەرەگى انىقتالىپ، دەر كەزىندە توقتاتىلدى. قارىزدى قايتارماۋ قىلمىستارعا سەبەپ بولعان.

- ءبىز باسقا قۇقىق قورعاۋ جانە ارنايى ورگاندارمەن تىعىز بايلانىستامىز. ماسەلەن، قاڭتار جانە قازان ايلارىندا ۇلتتىق قاۋىپسىزدىك كوميتەتىمەن بىرلەسىپ، قىزىلوردا، جامبىل، تۇركىستان جانە جەتىسۋ وبلىستارىندا بۇزاقىلىققا، ۇرلىققا، بوپسالاۋعا، قارۋدى زاڭسىز ساقتاۋعا، زاڭسىز كوشى- قوندى ۇيىمداستىرۋعا، ادامداردى ۇرلاۋعا جانە قارۋدى قولدانا وتىرىپ جاسالعان قىلمىستىق قاقتىعىستارعا قاتىسى بار قىلمىستىق توپتاردى ۇستاۋ بويىنشا ارنايى وپەراتسيالار جۇرگىزىلدى. سونداي-اق قارجى مونيتورينگى اگەنتتىگىمەن دە بىرلەسكەن جۇمىستار جۇرگىزىلۋدە. مىسالى، اعىمداعى جىلدىڭ اقپان ايىندا بىرلەسكەن جەدەل ءىس-شارالاردى وتكىزۋ كەزىندە زاڭسىز اينالىمنان 20 مىڭ ليتردەن استام كونترافاكتىلى الكوگول، 16 مىڭ ليتردەن استام الكوگول جانە 1600000 قوراپ تەمەكى تاركىلەندى. ودان بولەك بىرلەسكەن ءىس- شارالار بارىسىندا جەلتوقسان ايىندا پاۆلودار جانە اباي وبلىستارىنىڭ اۋماعىندا جالپى قۇنى 1,5 ميلليارد تەڭگە نەمەسە 3 ميلليون ا ق ش دوللارىن قۇرايتىن اكسيزسىز تەمەكى ونىمدەرىن تاسىمالداعان ءۇش جۇك كولىگى انىقتالىپ، توقتاتىلدى. مۇنداي جەدەل ءىس-شارالار قازاقستان رەسپۋبليكاسىنىڭ زاڭناماسىنا سايكەس پروكۋراتۋرانىڭ ۇيلەستىرۋىمەن جۇرگىزىلەدى، - دەپ اتاپ ءوتتى دەپارتامەنت باستىعى.

ۇيىمداسقان قىلمىسقا قارسى كۇرەس بولىنىستەرىنىڭ جەدەل ازىرلەمەلەرىنىڭ وربيتاسىندا بيورەسۋرستاردى زاڭسىز وندىرۋمەن اينالىساتىن قىلمىستىق توپتار دا بار. قىركۇيەك ايىندا سولتۇستىك قازاقستان وبلىسىنىڭ اۋماعىندا شايانداردى زاڭسىز اۋلاعان ادامدار توبى اشكەرەلەندى. 15 توننادان استام شايان تاركىلەندى.

الدىن الا بولجام بويىنشا مەملەكەتكە 200 ميلليون تەڭگە زالال كەلتىرىلدى. قازان ايىندا باتىس قازاقستان وبلىسىندا بەكىرە تۇقىمداس بالىقتار مەن ۋىلدىرىقتاردى زاڭسىز وتكىزۋ ارناسى انىقتالدى.

ۇستالعان توپ بالىق ونىمدەرىن جالعان قۇجاتتار ارقىلى بازارلارعا جەتكىزىپ وتىرعان. ءتىنتۋ كەزىندە 1,5 توننادان استام بەكىرە بالىعى، شامامەن 30 ك گ ۋىلدىرىق، اقشا جانە اتىس قارۋى تاركىلەندى.

ۇيىمداسقان قىلمىسقا قارسى كۇرەس بويىنشا جۇمىس ءى ءى م باسشىلىعىنىڭ باقىلاۋىندا.

 

اۆتور

ەربول جانات